Kpep Nditọ Fo

Eyen Eyeneka Paul Ama Anyan̄a Paul

NDI ama ọfiọk ke apostle Paul ama enyene iman emi ekedide mbet Jesus?a— Etie nte eyeneka esie an̄wan ye eyen esie ẹma ẹtiene ẹdi mbet Jesus. Ndien eyen eyeneka esie emi ama anyan̄a Paul! Nnyịn ifiọkke enyịn̄ esie inyụn̄ ifiọkke enyịn̄ eka esie, edi imọfiọk se enye akanamde. Ndi akpama ndikop mbụk emi?—

Paul ndisụk nnyọn̄ isan̄ isụn̄utom esie ọyọhọ ita ndisịm Jerusalem edi oro. Etie nte ekedi ke isua 56 E.N. Ẹmụm Paul ẹnyụn̄ ẹyom ndikpe ikpe nnọ enye. Edi mme asua esie iyomke enye aka ikpe oro. Mmọ ẹyom ndiwowot enye! Ntre mmọ ẹdọhọ n̄kpọ nte owo 40 ẹkedịbe ke usụn̄ ẹbet man ẹwot Paul.

Edi eyen eyeneka Paul okop ediomi mmọ. Ndi ọmọfiọk se enye anamde?— Enye aka eketịn̄ n̄kpọ emi ọnọ Paul. Inikiet inikiet, Paul ọdọhọ akwa owoekọn̄ ete: “Da akparawa emi sọk etubom ekọn̄, koro enye enyene n̄kpọ nditịn̄ nnọ enye.” Owoekọn̄ oro ada akparawa oro ọsọk Claudius Lysias emi edide etubom ekọn̄ onyụn̄ ọdọhọ enye ke akparawa oro enyene akpan etop nditobo enye. Claudius emen eyen eyeneka Paul ọwọrọ, ndien enye asian Claudius kpukpru n̄kpọ.

Claudius ọdọhọ eyen eyeneka Paul ete: “Kûtịn̄ unọ baba owo kiet ete imọ ima inam mme n̄kpọ emi ẹn̄wan̄a mi.” Ekem enye Claudius okot ikpọ mbonekọn̄ iba onyụn̄ ọdọhọ mmọ ete ẹnam mbonekọn̄ 200, mme awat enan̄-mbakara 70, ye mbon eduat 200 ẹben̄e idem ndika Caesarea. Ofụri irenowo 470 oro ẹda Paul ke n̄kanika usụkkiet okoneyo ẹka Caesarea, ẹnyụn̄ ẹyak enye ke ifụre ẹnọ Felix emi akarade Rome. Claudius ama ewet leta ọnọ ẹsọk Felix onyụn̄ asian enye ke mme owo ẹduak ndiwot Paul.

Ntre ana mme Jew ẹtiene ẹka esop ke Caesarea ẹketịn̄ se inamde mmọ ẹyom ndiwot Paul. Edi mmọ inyeneke n̄kpọ ndomokiet ndiwụt ke Paul edue. Kpa ye oro, mmọ ẹkọbi Paul isua iba ke ufọk-n̄kpọkọbi. Ntak edi oro enye eben̄ede ete ẹkekpe ikpe imọ ke Rome, ẹnyụn̄ ẹnọ enye aka do.—Utom 23:16–24:27; 25:8-12.

Nso ke ikeme ndikpep nto se eyen eyeneka Paul akanamde?— Ikpep ite ke oyom inyene uko nditịn̄ se ifiọkde ke edi akpanikọ, ndien edieke inamde oro, iyanyan̄a mme owo. Jesus ama aka iso ọkwọrọ Obio Ubọn̄ Abasi kpa ye oro enye ọkọdiọn̄ọde ke mme asua ‘ẹyom ndiwot imọ.’ Enye ọdọhọ nnyịn inam ntre n̄ko. Nte iyanam oro? Iyanam edieke inyenede uko nte eyen eyeneka Paul.—John 7:1; 15:13; Matthew 24:14; 28:18-20.

Paul ama esịn udọn̄ ọnọ ekpri Timothy ufan esie ete: “Nọ ntịn̄enyịn kpukpru ini ke idemfo ye ke ukpepn̄kpọ fo. Sọn̄ọ yịre ke mme n̄kpọ emi, koro ke ndinam emi afo ayanyan̄a idemfo ye mmọ eke ẹkopde uyo fo.” (1 Timothy 4:16) Ke akpanikọ, eyen eyeneka Paul ama anam n̄kpọ ekekem ye item Paul emi. Nte afo ayanam item emi?

[Mme Ikọ Idakisọn̄]

Mme mbụme:

○ Mmanie ikedi ndusụk iman Paul, ndien nso ke nnyịn ikpep iban̄a mmọ?

○ Nso ke eyen eyeneka Paul akanam man anyan̄a Paul?

○ Nso ke Jesus ọkọdọhọ nnyịn inam, emi ekemede ndinyan̄a mme owo mfịn?