San̄a Kpere Abasi
“Ami Jehovah Abasi Fo Mmụm Fi Ubọk Nnasia”
ETE kiet emi asan̄ade ye ekpri eyen esie aka ndibe usụn̄ emi ubomisọn̄ awakde etieti ọdọhọ eyen emi ete: “Men ubọk fo di.” Idem inyekke ekpri eyen emi ke ini ete esie omụmde enye ubọk ọsọn̄ asan̄a ebe usụn̄ oro. Ndi akanam ọdọn̄ fi ndinyene owo emi omụmde fi ubọk, owụt fi nte akpasan̄ade ọyọ mme mfịna uwem emi? Edieke edide ntre, ọwọrọ se idude ke n̄wed Isaiah eyenen̄ede ọdọn̄ fi esịt.—Kot Isaiah 41:10, 13.
Isaiah eketịn̄ ikọ emi ọnọ nditọ Israel. Kpa ye emi nditọ Israel ẹkedide “akpan inyene” Abasi, mme asua ẹkedodu ẹkan mmọ ẹkụk. (Exodus 19:5) Ndi ndịk ama anam nditọ Israel? Jehovah ama ọnọ Isaiah etop ndọn̄esịt ọsọk mmọ. Nte iyomde ndidun̄ọde etop emi, ikpenyene ndifiọk ke se Abasi onyụn̄ ọdọhọde ikọt esie mfịn edi emi.—Rome15:4.
Jehovah ọkọdọhọ ete: “Kûkop ndịk.” (Ufan̄ikọ 10) Enyene se inamde enye etịn̄ ikọ emi. Jehovah anam an̄wan̄a ntak emi ikọt imọ mîkpokopke ndịk, ete: “Koro ami ndude ye afo.” Enye itiehe ke anyan usụn̄ idọhọ ke ini ekededi emi nnyịn iyomde un̄wam ke imọ iyedi ke nnennen ini idin̄wam nnyịn. Enye oyom ikọt esie ẹfiọk ke imọ do ye mmọ, nte n̄kpọ eke isan̄ade ikpat kiet ye mmọ, iben̄e idem kpukpru ini ndin̄wam mmọ. Emi enem nnyịn etieti.
Jehovah afiak ọdọhọ ikọt esie emi ete: “Kûwụk enyịn use.” (Ufan̄ikọ 10) Ikọ Hebrew emi ẹdade ẹwet itien̄wed emi ọwọrọ owo “ndisuan enyịn nse m̀mê enyene eke edịbede ebet ndinam imọ ibak.” Jehovah etịn̄ ntak emi mme asan̄autom imọ mîkpasuanke enyịn ke ntak ndịk, ete: “Koro ami ndide Abasi fo.” Ewe ikọ ndọn̄esịt ikan emi? Jehovah edi “Ata Edikon̄” ye “Ata Ọkpọsọn̄.” (Psalm 91:1) Ntak emi nditọ Israel ẹkpefehede ndịk ke ini edide mmọ ẹnyene Jehovah, Ata Ọkpọsọn̄, nte Abasi?
Nso, ndien, ke Jehovah oyom ndinam nnọ ikọt esie? Enye ọn̄wọn̄ọ ete: “Ami nditreke ndida ubọk nnasia edinen ido mi nsọn̄ọ mmụm fi n̄kama.” (Ufan̄ikọ 10) Enye onyụn̄ ọdọhọ ete: “Ami Jehovah Abasi fo mmụm fi ubọk nnasia.” (Ufan̄ikọ 13) Nso isidụk fi esịt ke ini okopde ikọ emi? N̄wed kiet ọdọhọ ete: “Ufan̄ikọ iba emi anam owo ekere aban̄a ete emi asan̄ade ye ekpri eyen esie. [Ete emi] isan̄ake eyen emi ke edem nte owo ukpeme, edi asan̄a ikpat kiet ye enye, iyakke n̄kpọ ndomokiet adian̄ade mmọ.” Omokụt do ke Jehovah idikpọn̄ke ikọt esie idem ke ini nnanenyịn.—Mme Hebrew 13:5, 6.
Ikọ n̄wed Isaiah emi ekeme ndidọn̄ ikọt Jehovah esịt mfịn. Mme mfịna “ndiọkeyo emi ọsọn̄de ndiyọ” mi ẹkeme ndinam uwem efek nnyịn ndusụk ini. (2 Timothy 3:1) Edi ikpanaha ibiom mme mfịna emi ikpọn̄. Jehovah eben̄e idem ndimụm nnyịn ubọk, oro edi, ndiwụt nnyịn nte ikpasan̄ade iyọ mme mfịna. Nnyịn imekeme ndiyak enye omụm nnyịn ubọk kpa nte emi eyen esiyakde ete esie omụm enye ubọk, koro imọfiọk ke enye ayada nnyịn usụn̄ onyụn̄ an̄wam nnyịn ke mme ini nnanenyịn.—Psalm 63:7, 8.
Itie Bible emi okpokotde ke January: