Mme Andikot N̄wed Nnyịn Ẹbụp Ẹte . . .

Ntak Emi Abasi Ọkọdọhọde Abraham Awa Eyen Esie?

▪ N̄wed Genesis ọdọhọ ke Jehovah Abasi ọkọdọhọ Abraham akawa eyen esie. (Genesis 22:2) Mbụk emi esifịna ndusụk owo. Prọfesọ kiet emi ekerede Carol ọdọhọ ete: “Esịt ama enen̄ede ayat mi ke ini n̄kokopde mbụk emi ke ini eyenọwọn̄. Ntak emi Abasi ọkpọdọhọde owo anam utọ enyene-ndịk n̄kpọ oro?” Edi kpa ye emi ekemede nditie owo ntem ke idem, enyene mme n̄kpọ emi nnyịn mîkpefreke.

Akpa kan̄a, ana ikere iban̄a se Jehovah mîkanamke. Jehovah ikayakke Abraham awa eyen esie, kpa ye edide enye ama eben̄e idem ndinam oro. Ndien tọn̄ọ oro, Enye inyụn̄ ifiakke idọhọ baba eyen Adam kiet anam utọ n̄kpọ oro. Jehovah oyom kpukpru mme asan̄autom esie, kpa ye nditọwọn̄, ẹdu uwem ẹbịghi ẹnyụn̄ ẹkop inem uwem.

Ọyọhọ iba, Bible owụt ke Jehovah ama enyene ata akpan ntak emi akanamde enye ọdọhọ Abraham awa Isaac eyen esie. Abasi ama ọfiọk ke ata ediwak isua ke iso, ke imọ iyayak Jesus Eyen imọa edikpa ọnọ nnyịn. (Matthew 20:28) Jehovah okoyom nnyịn ifiọk se emi editakde imọ. Enye ọkọdọhọ Abraham awa edima eyen esie man owụt se imọ idinamde ke ini iso. Ntak emi idọhọde ntre?

Kop se Abasi ọkọdọhọde Abraham mi: “Mbọk, da eyen fo, ikpọn̄-ikpọn̄ eyen fo, Isaac, emi afo enen̄erede ama, ka isọn̄ Moriah kawa.” (Genesis 22:2) N̄kọ omokụt ke Jehovah ọkọdọhọ Abraham ke Isaac edi eyen emi enye “enen̄erede ama.” Jehovah ama ọdiọn̄ọ adan̄a nte Abraham akamade Isaac. Enye ọdiọn̄ọ n̄kọ adan̄a nte imọ imade Jesus Eyen imọ. Jehovah enen̄ede ama Jesus tutu enye etie ke heaven etịn̄ ikaba ete ke Jesus edi “edima Eyen [imọ].”—Mark 1:11; 9:7.

Anaedi emeti ke Jehovah ama esịn “mbọk” ke ini ọkọdọhọde Abraham awa eyen esie. Àtá ekpep n̄kpọ mban̄a Bible ọdọhọ ke emi owụt ke “ỌBỌN̄ ama ọdiọn̄ọ ke se idọhọde Abraham anam imemke utom.” Imekeme ndidọhọ ke imọfiọk nte akabiakde Abraham ndida edima eyen esie n̄ka ndiwa nte Abasi ọkọdọhọde, edi nnyịn ikemeke nditịn̄ nte akabiakde Jehovah ndikụt edima Eyen esie ọbọde ufen onyụn̄ akpa. Akananam n̄kpọ ibiakde Jehovah ntem, inyụn̄ idụhe se idibiakde enye ntem.

Ke ntre, kpa ye emi se Jehovah ọkọdọhọde Abraham anam ekemede ndifịna owo, nnyịn ikpenyene nditi ke Jehovah ikayakke Abraham awa eyen esie. Enye ikayakke n̄kpọ anam Isaac, m̀mê ndiyak Abraham okụt akpatre idiọkn̄kpọ emi ekemede ndiwọrọ ete eyen, oro edi, eyen esie ndikpa. Edi Jehovah ama ayak Eyen esie edikpa “ke ibuot kpukpru nnyịn.” (Rome 8:32) Ntak emi Jehovah akayakde utọ enyene-ndịk n̄kpọ emi ọwọrọ enye? Enye akanam emi “man nnyịn ikpenyene uwem.” (1 John 4:9) Emi enen̄ede owụt nte Abasi amade nnyịn. Ndi emi ikpanamke nnyịn inen̄ede ima enye n̄ko?b

[Mme Ikọ Idakisọn̄]