Ndiwa Uwa Ofụri Ukpọn̄ Nnọ Jehovah
“Se ededi eke mbufo ẹnamde, ẹnam ke ofụri ukpọn̄ nte ẹnam ẹnọ Jehovah.”—COL. 3:23.
1-3. (a) Ndi Jesus ndikakpa ke eto nditụhọ ọwọrọ ke Jehovah iyomke iwa uwa ndomokiet aba? Nam an̄wan̄a. (b) Nso mbụme ke ẹbụp ẹban̄a uwa eyomfịn?
JEHOVAH ama anam ikọt esie ke eyo mme apostle ẹfiọk ke uwa ufak Jesus osio mme owo ke idak Ibet Moses. (Col. 2:13, 14) Owo ikoyomke ẹwa aba kpukpru uwa oro mme Jew ẹkesiwade ke ata ediwak isua, mme uwa oro ikonyụn̄ inyeneke aba ufọn. Ibet ama okụre utom esie nte “andikpeme . . . emi adade esịm Christ.”—Gal. 3:24.
2 Oro iwọrọke ke mme Christian inyeneke n̄kpọ ndomokiet ndinam aba ye uwa. Utu ke oro, apostle Peter ọkọdọhọ ke oyom “[ẹwa] uwa eke spirit oro enemde Abasi esịt oto ke Jesus Christ.” (1 Pet. 2:5) Ke adianade do, apostle Paul ama anam an̄wan̄a ke ofụri uwem Christian emi ayakde idem ọnọ ekeme nditie nte “uwa.”—Rome 12:1.
3 Ke ntem, Christian awa uwa ọnọ Jehovah ke ndiyak ndusụk n̄kpọ ẹtak enye m̀mê ke ndinọ Jehovah ndusụk n̄kpọ. Sia nnyịn ifiọkde se ẹkeyomde ẹto nditọ Israel, nso ke ikpanam man ikụt ite ke Jehovah enyịme kpukpru uwa nnyịn mfịn?
KE UWEM EKE USEN KE USEN
4. Nso ke ana nnyịn iti kaban̄a kpukpru se inamde ke usen ke usen?
4 Nte inamde mbubehe nnyịn ke uwem eke usen ke usen, ekeme ndisọn̄ ndikere ke mme n̄kpọ oro inamde ẹnyene ebuana ye ndiwa uwa nnọ Jehovah. Ekeme nditie nte ke utomufọk, utom ufọkn̄wed, utom idịbi udia, se idepde, ye mme n̄kpọ ntre inyeneke n̄kpọ ndinam ye utuakibuot nnyịn. Edi, edieke edide afo ama ayak idem ọnọ Jehovah m̀mê ke aduak ndinam oro ke mîbịghike, do nte adade mme n̄kpọ oro enen̄ede edi akpan n̄kpọ. Nnyịn idi Christian kpukpru ini. Ana ida mme edumbet Ikọ Abasi isịn ke edinam ke ofụri uwem nnyịn. Ke ntak emi, Paul ekekpek nnyịn ete: “Se ededi eke mbufo ẹnamde, ẹnam ke ofụri ukpọn̄ nte ẹnam ẹnọ Jehovah, inamke inọ owo.”—Kot Colossae 3:18-24.
5, 6. Nso ikpebiere nte isisịnede n̄kpọ inyụn̄ idude uwem?
5 N̄kpọ emi Christian esinamde ke usen ke usen idịghe ubak utuakibuot esie. Edi sia Paul ọdọhọde inam n̄kpọ ‘ke ofụri ukpọn̄ nte inam inọ Jehovah,’ oro anam ikere iban̄a ofụri uwem nnyịn. Ntem, didie ke emi ebehe nnyịn? Ndi imesinam n̄kpọ inyụn̄ isịne n̄kpọ nte odotde kpukpru ini? Mîdịghe, ke ini inamde mme edinam eke usen ke usen, ndi bụt ekeme ndinam nnyịn ndinam ẹfiọk ke idi kiet ke otu Mme Ntiense Jehovah, ke ntak nte inamde m̀mê isịnede n̄kpọ? Inaha nnyịn iyak oro etịbe! Mme asan̄autom Jehovah idiyomke ndinam baba n̄kpọ kiet oro edinamde mme owo ẹtịn̄ idiọk ẹdian enyịn̄ Abasi.—Isa. 43:10; 2 Cor. 6:3, 4, 9.
6 Yak ineme nte udọn̄ edinam n̄kpọ “ke ofụri ukpọn̄ nte ẹnam ẹnọ Jehovah” enyenede ebuana ye ediwak n̄kpọ oro isinamde. Nte inamde oro, ti ke akana kpukpru uwa emi nditọ Israel ẹkewade ẹnọ Jehovah ẹdi mfọnn̄kan inyene mmọ.—Ex. 23:19.
NTE ENYE OTỤKDE UWEM FO
7. Nso ke Christian ndiyak idem nnọ abuana?
7 Ke ini akayakde idem fo ọnọ Jehovah, n̄kọ afo ukuyakke ubak usụhọ ubak? Ke nditịm ntịn̄, afo ọkọdọhọ ke idinịm Jehovah akpa ke ofụri uwem fo. (Kot Mme Hebrew 10:7.) Eti ubiere ekedi oro. Anaedi ọmọfiọk nte ke ini oyomde ndifiọk uduak Jehovah ke n̄kpọ onyụn̄ odomode ndinam n̄kpọ oro nte ekemde ye uduak esie, ke emi esida ata nti utịp edi. (Isa. 48:17, 18) Se inamde ikọt Abasi ẹsana ẹnyụn̄ ẹkop idatesịt edi koro mmọ ẹnyene edu Owo emi ekpepde mmọ.—Lev. 11:44; 1 Tim. 1:11.
8. Nso ke Jehovah ndikada uwa eke eset ke edisana ọwọrọ ọnọ nnyịn?
8 Jehovah akabat uwa emi nditọ Israel ẹkesiwade ẹnọ enye ke edisana. (Lev. 6:25; 7:1) Ikọ Hebrew oro ẹkabarede nte “edisana” owụt ke n̄kpọ edi san̄asan̄a, m̀mê ke enyene Abasi kpọt. Edieke anade Jehovah ọbọ uwa nnyịn, ana mmọ ẹdi san̄asan̄a, inyụn̄ inaha ido ererimbot asabade mmọ. Inaha nnyịn ima n̄kpọ ekededi emi Jehovah asuade. (Kot 1 John 2:15-17.) Nte an̄wan̄ade, emi ọwọrọ ke ana itre ndidụk ndụk ye owo ekededi m̀mê ndisịn idem ke n̄kpọ ekededi emi edinamde nnyịn idehe ke enyịn Abasi. (Isa. 2:4; Edi. 18:4) Emi onyụn̄ ọwọrọ ke inaha ise oburobụt n̄kpọ m̀mê n̄kpọ emi edehede, m̀mê iyak esịt nnyịn ekere mme n̄kpọ ntre.—Col. 3:5, 6.
9. Nte Christian anamde n̄kpọ ye mbon en̄wen edi akpan n̄kpọ adan̄a didie, ndien ntak-a?
9 Paul ọkọdọhọ ekemmọ mme Christian ete: “Ẹkûfre ndinam eti n̄kpọ ndinyụn̄ mbuana n̄kpọ ye mbon en̄wen, koro orụk uwa emi enen̄erede enem Abasi esịt.” (Heb. 13:16) Ntem, ke enyịn Jehovah, ndidi eti owo nnyụn̄ nnam nti n̄kpọ nnọ mbon en̄wen ẹdi uwa emi enye enyịmede ndibọ. Edima nnyụn̄ n̄kere mban̄a mbon en̄wen ke ẹda ẹdiọn̄ọ ata mme Christian.—John 13:34, 35; Col. 1:10.
UWA KE UTUAKIBUOT
10, 11. Didie ke Jehovah ese ukwọrọikọ ye utuakibuot nnyịn mme Christian, ndien oro akpanam inam nso?
10 N̄wọrọnda usụn̄ kiet emi nnyịn mme Christian inamde nti n̄kpọ inọ mbon en̄wen edi ke “[nditan̄a] idotenyịn nnyịn an̄wan̄wa.” Ndi afo emesida kpukpru ifet ọnọ ikọ ntiense? Paul okokot akpan utom mme Christian emi ‘uwa ekọm, oro edi, mfri n̄kpọkinua emi ẹdade ẹtan̄a enyịn̄ Abasi an̄wan̄wa.’ (Heb. 10:23; 13:15; Hos. 14:2) Ọfọn ikere iban̄a adan̄a ini emi isidade ikwọrọ eti mbụk Obio Ubọn̄ ye nte ikemede ndinam n̄kọri ke utom ukwọrọikọ nnyịn. Ẹsisịn ediwak ikpehe ke Esoputom man ẹn̄wam nnyịn inam emi. Edi ke nditịn̄ ibio ibio, sia utom ukwọrọikọ nnyịn eke ufọk ke ufọk ye eke ido nneme ẹdide “uwa ekọm,” kpa ubak utuakibuot nnyịn, ana uwa nnyịn ẹdi mfọnn̄kan uwa oro ikemede ndiwa. Kpa ye oro idaha nnyịn mîdịghe ukem, adan̄a ini emi idade ikwọrọ eti mbụk esiwak ndiwụt adan̄a nte imade n̄kpọ Abasi.
11 Mme Christian ẹsida ini ẹtie ọtọkiet m̀mê ẹtie ikpọn̄ ẹtuak ibuot kpukpru ini. Se Jehovah oyomde nnyịn inam edi oro. Edi akpanikọ ke inaha inịm Sabbath m̀mê isika mme usọrọ ke Jerusalem. Nte ededi, Christian enyene mme n̄kpọ en̄wen emi ẹdade itie mme n̄kpọ oro. Abasi osụk oyoyom nnyịn itre mme utom n̄kpa man ikpep Ikọ esie, ibọn̄ akam, inyụn̄ idụk mme mbono esop Christian. Ndien mme ibuot ufọk emi ẹdide Christian ẹsinịm utuakibuot ubon ye ikọtufọk mmọ. (1 Thess. 5:17; Heb. 10:24, 25) Ke se iban̄ade n̄kpọ eke spirit, ọfọn isibụp idem nnyịn ite, ‘Ndi mmekeme ndinam n̄kan emi ke utuakibuot mi?’
12. (a) Ẹkeme ndida incense emi ẹkesifọpde ke eset ndomo ye nso mfịn? (b) Didie ke emi okpotụk nte akam nnyịn etiede?
12 Edidem David ọkọkwọ ọnọ Jehovah ete: “Yak akam mi etie nte incense ke iso fo.” (Ps. 141:2) Kere esisịt ban̄a akam fo—ikafan̄ ke esibọn̄ ke usen, ndien akam fo esitie didie? N̄wed Ediyarade ọdọhọ ke “akam ndisana owo” etie nte incense sia akam emi ẹkopde esidọk ebịne Jehovah nte edinem utebe. (Edi. 5:8) Ke Israel eset, ẹma ẹsinen̄ede ẹtịn̄ enyịn ẹnam incense emi ẹkesifọpde kpukpru ini ke itieuwa Jehovah. Jehovah ekesinyịme incense oro edieke ẹfọpde nte enye eketemede. (Ex. 30:34-37; Lev. 10:1, 2) Edieke ibọn̄de akam ntre n̄ko ke ofụri esịt, do imekeme ndinịm ke Jehovah oyokop akam oro.
NDINỌ YE NDIBỌ
13, 14. (a) Nso ke Epaphroditus ye esop Philippi ẹkenam ẹnọ Paul, ndien apostle oro akada oro didie? (b) Didie ke ikeme ndikpebe Epaphroditus ye mbon Philippi?
13 Ẹkeme ndidọhọ ke okụk emi ẹtịpde man ẹda ẹnam utom ofụri ererimbot etie nte uwa, edide itịp esisịt m̀mê itịp ediwak. (Mark 12:41-44) Ke eyo mme apostle, esop Philippi ẹma ẹnọ Epaphroditus aka Rome akan̄wam Paul. Epaphroditus ama ada okụk emi esop Philippi ẹkenọde, aka. Idịghe akpa ini emi esop oro ẹkefọnde ido ye Paul edi oro. Mmọ ẹkefọn ido ntre man Paul okûtịmede esịt aban̄a okụk, man onyụn̄ ekeme ndida ekese ini n̄kwọrọ ikọ. Paul akada enọ oro didie? Enye okokot enọ oro “edinem utebe, uwa emi ẹnyịmede, emi etịmde enem Abasi esịt.” (Kot Philippi 4:15-19.) Paul ama enen̄ede enem esịt ke se esop oro ẹkenọde enye, Jehovah ama enem esịt n̄ko.
14 Mfịn n̄ko, Jehovah esinen̄ede enem esịt ke se itịpde man ẹda ẹnam utom ofụri ererimbot. Akan oro, enye ọn̄wọn̄ọ ke edieke nnyịn ikade iso inịm n̄kpọ Obio Ubọn̄ akpa, ke imọ iyese iban̄a kpukpru se nnyịn iyomde, ke n̄kan̄ eke spirit ye eke obụkidem.—Matt. 6:33; Luke 6:38.
WỤT ESỊTEKỌM
15. Nso idi ndusụk n̄kpọ emi ẹsinamde fi owụt esịtekọm ọnọ Jehovah?
15 Ayada ata anyan ini nditịn̄ ediwak ntak emi ẹnamde nnyịn iwụt esịtekọm inọ Jehovah. Ndi ikpodotke nnyịn ikọm enye kpukpru usen ke ndinọ nnyịn uwem? Enye esinọ nnyịn kpukpru se iyomde man ika iso idu uwem—udia, ọfọn̄, itie udakibuot, ye ofụm emi in̄wekde. Akan oro, mbuọtidem emi inyenede ke ntak emi ifiọkde akpanikọ anam inyene idotenyịn. Enen̄ede odot ituak ibuot inọ Jehovah inyụn̄ iwa uwa ekọm inọ enye ke ntak owo emi enye edide ye ke se enye anamde ọnọ nnyịn.—Kot Ediyarade 4:11.
16. Didie ke ikpanam n̄kpọ iban̄a uwa ufak Christ?
16 Nte ikokụtde ke ibuotikọ oro ekebemde iso, ata ọsọn̄urua enọ emi Abasi ọkọnọde ubonowo edi uwa ufak Christ. Enye edi ata akpan usụn̄ emi Abasi owụtde ke imama nnyịn. (1 John 4:10) Nso idi nnennen usụn̄ ndiwụt esịtekọm mban̄a emi? Paul ama etịn̄ ete: “Koro ima Christ onụk nnyịn, koro ibiere ntem ite, owo kiet akakpa aban̄a kpukpru owo; . . . ndien enye akakpa ọnọ kpukpru owo man mbon oro ẹdude uwem ẹkûdu aba ẹnọ idemmọ, edi ẹdu ẹnọ enye emi akakpade ọnọ mmọ onyụn̄ esetde.” (2 Cor. 5:14, 15) Ke nditịm ntịn̄, Paul ọkọdọhọ ke edieke iwụtde esịtekọm iban̄a mfọnido Abasi oro owo mîdotke, ke nnyịn idida uwem nnyịn ikpono Enye ye Eyen esie. Nnyịn iwụt ima oro imade ye esịtekọm oro inyenede inọ Abasi ye Christ ke ndikop uyo mmọ, ye ke ndinyene udọn̄ ndikwọrọ ikọ nnyụn̄ nnam mme mbet.—1 Tim. 2:3, 4; 1 John 5:3.
17, 18. Didie ke ndusụk owo ẹnam n̄kọri ke uwa ekọm oro mmọ ẹwade ẹnọ Jehovah? Nọ uwụtn̄kpọ.
17 Ndi emekeme ndinam n̄kọri ke uwa ekọm oro esiwade ọnọ Abasi? Ke ediwak owo ẹma ẹketie ẹkere kpukpru se Jehovah anamde ọnọ mmọ, mmọ ẹdiomi ini ye mme edinam mmọ man ẹnen̄ede ẹsịn idem ke utom edikwọrọ Obio Ubọn̄ m̀mê ke mme edinam ukara Abasi eken. Ndusụk mmọ ẹsinam utom usiakusụn̄ unọ un̄wam ọfiọn̄ kiet m̀mê akande oro kpukpru isua, ndien mbon eken ẹdụk utom usiakusụn̄ ofụri ini. Ndusụk owo ẹdụk utom ubọpn̄kpọ Obio Ubọn̄. Ndi mmọ emi idịghe ata nti usụn̄ ndiwụt esịtekọm? Edieke ẹnamde ye eti uduak—oro edi, man ẹwụt esịtekọm—Abasi esinyịme mme utom emi ẹnamde ẹnọ enye mi.
18 Ediwak Christian ẹkere ke ana iwụt esịtekọm inọ Jehovah, ndien emi esisịn udọn̄ ọnọ mmọ ẹnam n̄kpọ. Morena edi kiet ke otu mmọ. Enye ama oyom ibọrọ mbụme emi ẹban̄ade Abasi ke ido ukpono Catholic, emi enye akamanade-mana edidụk, ye ke ukpepn̄kpọ akwaifiọk Asia. Edi enye ikenyeneke in̄wan̄-in̄wan̄ ibọrọ ke mbiba. Ke ini enye ọkọtọn̄ọde ndikpep Bible ye Mme Ntiense Jehovah ke enye ekenyene in̄wan̄-in̄wan̄ ibọrọ. Morena ama enen̄ede owụt esịtekọm aban̄a kpukpru ibọrọ N̄wed Abasi oro enye ekenyenede, ye nte mmọ ẹnamde uwem esie enyene iwụk, tutu enye oyom ndikọm Jehovah ke ndida ofụri odudu esie nnam n̄kpọ Jehovah. Ke enye ama akana baptism, enye ama ọtọn̄ọ ndinam utom usiakusụn̄ unọ un̄wam anyan ini, ndien ke ndondo oro idaha esie ayakde, enye ama akabade edi asiakusụn̄ ofụri ini. Oro eketịbe ke isua 30 emi ẹkebede, ndien Morena ke ananam utom uyọhọ ini.
19. Didie ke afo ekeme ndinen̄ede n̄wa uwa nnọ Jehovah?
19 Edi odu ediwak mme anam-akpanikọ asan̄autom Jehovah emi idaha mmọ mîyakke mmọ ẹdi mme asiakusụn̄. Se ededi emi ikemede ndinam ke utom Jehovah, kpukpru nnyịn imekeme ndiwa uwa eke spirit emi enye amade ndibọ. Ana itịn̄ enyịn ida ndinen edumbet isịn ke edinam ke edu uwem nnyịn, iti ke nnyịn idi Mme Ntiense Jehovah kpukpru ini. Iwụt mbuọtidem ke ndinen̄ede nnịm ke Abasi ayanam se enye aduakde. Inam nti utom ke nditiene n̄kwọrọ eti mbụk. Otode ke uyụhọ esịt nnyịn ye ke ntak esịtekọm oro iwụtde inọ Jehovah ke kpukpru se enye anamde ọnọ nnyịn, ẹyak ika iso iwa uwa ofụri ukpọn̄ inọ Jehovah.
SE M̀MÊ EYEKEME NDIBỌRỌ:
․․․․․
Didie ke ikeme ndikpono Jehovah ke mme edinam nnyịn eke usen ke usen?
․․․․․
Mme uwa ewe ke iwa ke utuakibuot Abasi?
․․․․․
Didie ke ikeme ndinọ Jehovah inyene nnyịn?
[Se ẹwetde ke ikpọ abisi ke page 25]
Ndi mfọnido Jehovah anam fi anam n̄kọri ke uwa ekọm oro awade?
[Ndise ke page 23]
Ndi afo emesida kpukpru ifet ọnọ ikọ ntiense?