Bọ Ufọn To Ufọkn̄wed Utom Ukara Abasi eke 1996—Ikpehe 2
1 Esisịt ini ke ẹma ẹketọn̄ọ Ufọkn̄wed Utom Ukara Abasi ke 1943, kiet ke otu n̄kọk itieutom N̄ka ama ọtọt ete: “Ke ekpri ibio ini ata eti ndutịm emi ama okụt unen ke ndin̄wam ediwak nditọete ẹmi ẹkekerede ke mmimọ idikemeke ndidi mme etịn̄ikọ an̄wa ẹnen̄ede ẹnyene uforo ke mbot utịn̄ikọ ẹnyụn̄ ẹtịm ẹkụt unen ke an̄wautom.” Ufọkn̄wed emi akaiso ndinọ ata eti ukpep, emi kpukpru nnyịn iyomde.
2 Edikot Bible: Idịghe mbon oro ẹnọde mme ikpehe utịn̄ikọ kpọt ẹsibọ ufọn ẹto ufọkn̄wed emi. Ke akpanikọ, kpukpru nnyịn imenyene se ẹnọde ẹnam—edikot Bible eke urua ke urua. Ndutịm ufọkn̄wed emi owụt m̀mê ewe ibuot Bible ke ẹdikot ke urua kiet kiet. Ediwak n̄kpọ editi eke N̄wed Abasi ẹdu oro ẹsọn̄ọde ẹwụt ufọn edikot Bible ke usen ke usen. (Josh. 1:8; Ps. 1:2; Utom 17:11) Edikot Bible edi akpan n̄kpọ ọnọ eti nsọn̄idem eke spirit; enye esibọk ekikere ye esịt. Edieke nnyịn ikotde Bible ke nsụhọde n̄kaha minit ition ke usen, nnyịn iyekeme ndisan̄a ikpat kiet ye ndutịm emi. Ke utịt isua, nnyịn iyekeme ndikot se ibede ibuot 150 ke Ikọ Abasi. Edieke inịmde Bible ikpere, nnyịn ikpenyene ndikeme ndikot ndusụk itie kpukpru usen.
3 Utịn̄ikọ Item: Man onụk nditọete ndinam ifịk ifịk utom edinam akpanikọ, oyom etịn̄ikọ oro ọnọde utịn̄ikọ item akama nti usụn̄ unọ ukpep, anam esịne ifiọk, onyụn̄ anam esịtekọm oro ẹnyenede ẹnọ Jehovah, Ikọ esie, ye esop esie ọkọri. Mbiowo ye mme asan̄autom unamutom ẹkeme ndinam emi ebe ke nditịm idem mfọn mfọn, ẹnamde utịn̄ikọ mmọ ọkọn̄ọ ke ibuotikọ, ẹtịn̄ ikọ ye nsọn̄uyo, ẹnyụn̄ ẹnam utịn̄ikọ etie in̄wan̄în̄wan̄. (Heb. 4:12) Edi akpan n̄kpọ ete etịn̄ikọ anam n̄kpọ ke ini oro ẹnọde enye. Ndidiana Kiet ke Utuakibuot ye mme ibuotikọ Enyọn̄-Ukpeme ẹyọhọ ye mme itien̄wed Bible ẹnyụn̄ ẹwụt udịm udịm utịn̄ikọ N̄wed Abasi oro ẹkemede ndinọ nnyịn ufọn ke n̄kan̄ eke spirit.
4 Mme Akpan N̄kpọ Ẹtode Bible: Nditọete oro ẹnọde n̄kpọ emi ndinam ẹkpenyene ndisat mme akpan ufan̄ikọ oro ẹkemede ndida nnam n̄kpọ ke nti usụn̄ ke ufọn esop. Emi oyom edikot mme ibuotikọ oro ẹnọde, editie n̄kere mmọ, ye edinam ndụn̄ọde ke mme ufan̄ikọ oro ẹsatde-sat man ẹyom mme akpan n̄kpọ oro ẹdinamde se mme itien̄wed Abasi oro ẹwọrọde an̄wan̄a. Ke edem Watch Tower Publications Index, “Scripture Index” odu, emi ekemede ndin̄wam ke ndiyom mme ntọt ẹban̄ade mme akpan ufan̄ikọ Bible. Nditọete oro ẹsede ẹban̄a ikpehe emi ẹkpenyene ndiwụt mbufiọk nnyụn̄ mfep edida n̄kpọ oro mînyeneke ufọn ndisịn. Mmọ ikpenyeneke nditịm mme n̄kpọ awak akan se ẹkemede ndikụre ke usụn̄ owụtde ifiọk ke minit itiokiet.
5 Kpukpru nnyịn imekeme ndibọ ufọn nto Ufọkn̄wed Utom Ukara Abasi. Enye ekeme ndin̄wam nnyịn ifori ukeme utịn̄ikọ ye eke unọ ukpep nnyịn. Ndibọ ọyọhọ ufọn nto ndutịm emi ke akpanikọ eyen̄wam nnyịn ndinam ‘kpukpru owo ẹkụt n̄kọri nnyịn.’—1 Tim. 4:15.