Ekebe Mbụme

◼ Nso ke ẹkpenyene ke ekikere kaban̄a edikot mme ikpehe ekikere ke mme mbonoesop?

Ẹsida ekese ini ẹnọde ndida nnịm Ukpepn̄kpọ Enyọn̄-Ukpeme ye Ukpepn̄kpọ N̄wedesop ẹkot mme ikpehe ekikere. Emi ọwọrọ ete ke eyenete oro ẹdọhọde okot n̄wed obiom ndodobi mbiomo nte andikpep. Ana enye okot ke usụn̄ oro ‘etịmde asiak’ se ẹwetde man otodo okûn̄wan̄wan̄a mme andikpan̄ utọn̄ kpọt edi n̄ko onụk mmọ ndinam n̄kpọ. (Neh. 8:8) Ntem, oyom andikot n̄wed etịm idem mfọn mfọn ọnọ ukot n̄wed esie. (1 Tim. 4:13; se ukpepn̄kpọ 6 ke Ñwed-item Ufök-ñwed.) Ndusụk akpan n̄kpọ ẹdi ẹmi ọnọ an̄wan̄wa edikot ke usụn̄ emi ọwọrọde n̄kpọ.

Da Nnennen Edisọn̄ọ Ntịn̄ Ikike Ikọ: Bem iso biere m̀mê mme ikọ m̀mê mme ubak udịmikọ ewe ẹyom ẹdori nsọn̄uyo man otodo an̄wan̄a owo nte enende.

Kot Mme Ikọ nte Enende: Oyom ẹkot mme ikọ ọfọn onyụn̄ an̄wan̄a edieke anade mme ikọ ẹdude ke n̄wed ẹn̄wan̄a otuowo. Se mme ikọ oro mûmeheke m̀mê oro owo mîwakke ndida ke n̄wed ukabadeikọ, mîdịghe kpan̄ utọn̄ ke kaset N̄ka.

Tịn̄ Ikọ Uyo Ọwọrọ ye Ufiopesịt: Nditịn̄ ikọ nsịn ufiop anam owo enyene udọn̄, edemerede ntụk, onyụn̄ edemerede udọn̄ owo emi akpan̄de utọn̄.

Sịn Ufiop Nyụn̄ Da Ido Nneme: Edikot ke ndammana usụn̄ asan̄a ye edikot ikọ ọdọnọ. Ke etịmde idem onyụn̄ anamde ndomonse, andikot n̄wed ekeme nditie ifụre ifụre, utịp oyonyụn̄ akama inem utu ke nditie ibe ibe nnyụn̄ mfefek owo.—Hab. 2:2.

Kot N̄kpọ nte Ẹmịn̄de: Nte ido edide ẹsikot mme ikọ idakisọn̄ ọkọrọ ye ntọt esịnede ke idiọn̄ọ ubak ọfiọn̄ m̀mê braket uyo ọwọrọ edieke mmọ ẹnamde n̄kpọ ẹmi ẹmịn̄de ke ikpehe ẹn̄wan̄a. N̄kukụre n̄kpọ oro owo mîdikotke edi mme n̄wed ndụn̄ọde oro ẹwụtde ebiet ẹmi ẹdade n̄kpọ ẹto. Ẹkpenyene ndikot ikọ idakisọn̄ ke itie oro ẹsiakde enye ke ikpehe ekikere oro, ẹbemde iso ẹdọhọ ẹte: “Ikọ idakisọn̄ okot ete . . .” Ke ama okokot okụre, kam ka iso ye se isụhọde ke ikpehe ekikere oro.

Ke ini an̄wan̄wa edikot n̄wed ọfọnde, enye edi kiet ke otu akpan usụn̄ oro nnyịn ikemede ‘ndikpep mbon en̄wen ẹnam kpukpru n̄kpọ’ oro Akwa Andikpep nnyịn ‘eketemede.’—Matt. 28:20.