Ndisuan Eti Mbụk Eti N̄kpọ
1 Enyọn̄-Ukpeme amanam n̄kpọ nte andida nnọ akpanikọ Bible ke isua 117. Idahaemi, ẹmịn̄ idem 18,950,000 ke nsiondi kiet kiet ke usem 125. Awake! n̄ko amada ọnọ Ikọ Abasi ke anyanini, ndien idahaemi ẹsuan idem 15,730,000 ke usem 80.—Men Colossae 1:23 domo.
2 Mme Magazine Ẹyụhọ Udọn̄ eke Spirit: Enyọn̄-Ukpeme ye Awake! ẹnọ ediwak miliọn mbon ẹmi ẹnyenede esịt akpanikọ ufọn ke ndin̄wam ndiyụhọ udọn̄ eke spirit mmọ. Ẹsimịn̄ mme ibuotikọ oro ẹbọpde mbuọtidem. Ke uwụtn̄kpọ, ke Enyọn̄-Ukpeme eke February 1, 1996, nnyịn ima ikpep ibuotikọ oro ekenyenede n̄kpọ ndinam ye edibuọt idem ke Jehovah ye Ikọ esie. Nsiondi Enyọn̄-Ukpeme eke March 1, 1996, ama esịn udọn̄ ọnọ nnyịn ndisịn idem ke utom Jehovah nnyụn̄ n̄ka iso ndori enyịn ke enye. Edineme prọfesi Zephaniah ọyọhọ ọyọhọ ekedi n̄kpọ nduaidem didie ntem! Ekem ọsọn̄ọ-mbuọtidem nneme aban̄ade nsọn̄ọnda Christian ama odu ke Enyọn̄-Ukpeme eke March 15, 1996. Nsiondi eke May 15, 1996, ama ọsọn̄ọ etịn̄ ufọn edikot ye edikpep Ikọ Abasi kpukpru ini. Mme ibuotikọ ẹmi ẹnam nnyịn inyene ntotụn̄ọ ifiọk Ikọ Abasi, ndien ẹmanam nnyịn itịm ifiọk ufọn Obio Ubọn̄ esie.
3 Ke adianade do, mme magazine ẹmi ẹdọn̄ọ mme ekemini ibuotikọ oro ẹnyenede ufọn ke ido Abasi, ido uwem Christian, ye mme ibuot nneme eken ẹdide ata akpan n̄kpọ. Mmọ ẹse ẹban̄a mme ata mfịna oro ẹtụkde uwem nnyịn. Nte utịp, nnyịn idara orụk uwem oro okon̄de akan idahaemi ke adan̄aemi ibetde mme edisu un̄wọn̄ọ Abasi ke n̄kpọ emi akam ọfọnde akan ke ini iso.—Isa. 48:17; 1 Tim. 6:19.
4 Ibio ibio edidụn̄ọde se idude ke page 4 ke nsiondi Awake! kiet kiet ọnọ nnyịn eti ntak nditoro magazine emi nte mfọnn̄kan n̄wed oro ẹkpekotde nnọ mme owo ke kpukpru ebiet, n̄kpri ye ikpọ ukem ukem. Enye ọdọhọ do ete: “Awake! edi kaban̄a edisịn ofụri ubon ke un̄wana. Enye owụt nte ẹkpeyọde mme mfịna ẹdude mfịn. Enye ọtọt mbụk, etịn̄ aban̄a mme owo ke ediwak idụt, odụn̄ọde ido ukpono ye ifiọk ntaifiọk. Edi enye anam akan oro. Enye otịm odụn̄ọde ntotụn̄ọ ntotụn̄ọ onyụn̄ anyan ubọk owụt se mme n̄kpọntịbe eke ndondo emi ẹnen̄erede ẹwọrọ, edi enye ada san̄asan̄a kpukpru ini ọkpọn̄ ukaraidem inyụn̄ imenekede orụk kiet ke enyọn̄ ikan eken. Ke edide akpan n̄kpọ akan, magazine emi ọbọp mbuọtidem ke un̄wọn̄ọ Andibot eke emem emem ye ifụre ifụre obufa ererimbot oro ekperede ndida itie idiọk, abiatibet editịm n̄kpọ emi odude kemi.”
5 Buana Mme Magazine ye Mmọ En̄wen: Tat ubọk ke ndisuan Enyọn̄-Ukpeme ye Awake! (Men 1 Timothy 6:18 domo.) Nyene mme magazine man ekeme ndikpọn̄ mmọ nnọ owo ekededi emi afo osobode. (Eccl. 11:6) Kpukpru nnyịn, esịnede n̄kpri ye mbufa asuanetop, imekeme ndinyene ọyọhọ ebuana ọfiọn̄ emi ke ndinọ mme editobo. Ke ebiet emi owo mîbọhọ editobo, kama mbio mbio nneme ẹmi ẹkọn̄ọde ke mme nsiondi eke ndondo emi. Tịm mehe ye se isịnede ke mmọ, nyụn̄ nọ mmọ ke esịt akpanikọ ye uko.
6 Enyọn̄-Ukpeme ye Awake! ẹdọn̄ọ mme ntọt oro kpukpru owo ẹyomde. Ndisuan mmọ edi kiet ke otu mfọnn̄kan usụn̄ ndin̄wam mbon en̄wen ẹkpep ẹban̄a eti mbụk eti n̄kpọ oro edidide ke mîdibịghike!