Nte Afo ke Etịm Asiak Ikọ Abasi?
1 Jesus Christ ekedi akakan andikpep emi akanam odude uwem ke isọn̄. Enye ekesitịn̄ ikọ ke usụn̄ oro otụkde esịt mme owo, edemerede mmọ ntụk, onyụn̄ onụkde mmọ ẹnam nti utom. (Matt. 7:28, 29) Enye kpukpru ini ekesida Ikọ Abasi nte isọn̄ kaban̄a ukpepn̄kpọ esie. (Luke 24:44, 45) Enye ọkọnọ Jehovah Abasi itoro ke kpukpru se enye ọkọfiọkde okonyụn̄ ekemede ndikpep. (John 7:16) Jesus ama enịm ata eti uwụtn̄kpọ ọnọ mme anditiene enye ebe ke nditịm nsiak Ikọ Abasi.—2 Tim. 2:15.
2 Apostle Paul n̄ko ekedi n̄wọrọnda uwụtn̄kpọ ebe ke ndisiak Ikọ Abasi uforo uforo. Enye ama anam se ikande ikpîkpu edikot N̄wed Abasi nnọ mbon en̄wen; enye ama esinam an̄wan̄a onyụn̄ ọkọk ibuot ke se enye okotde, ọnọde uyarade otode Ikọ Abasi nte ke Jesus ekedi Christ. (Utom 17:2-4) Kpasụk ntre, Apollos, mbet oro ekedide owo udọnikọ, ama “ọsọn̄ọ ọfiọk n̄wed Abasi eti-eti,” ndien enye ama esitịm asiak mmọ ke ndinọ okopodudu utịn̄ikọ oro aban̄ade akpanikọ.—Utom 18:24, 28.
3 Di Andikpep Ikọ Abasi: Mme anditan̄a Obio Ubọn̄ eyomfịn ẹmekụt mfọnn̄kan unen ke ndinọ mbon esịt akpanikọ ukpep ebe ke ndika mbịne nnyụn̄ nda Bible n̄kọk ibuot. Ke idaha kiet, eyenete eren kiet ama ekeme ndida Ezekiel 18:4 ọkọrọ ye mme itien̄wed Abasi ẹnyenede ebuana n̄kọk ibuot ye pastọ ye mbon ufọkabasi esie ita mban̄a se inade ibet ndiọi owo ye nti owo. Nte utịp, ndusụk mme andibuana ke ufọkabasi oro ẹma ẹtọn̄ọ ndikpep n̄kpọ, ndien nte ini akade owo kiet ke otu mmọ ama ọbọ akpanikọ. Ke idaha en̄wen, ẹma ẹdọhọ eyenete an̄wan kiet anam ntak emi Mme Ntiense Jehovah mîsinịmke Christmas ye usen emana an̄wan̄a esịn-ubiọn̄ọ ebe eyenan̄wan emi ekenyenede udọn̄. Nte enye okokotde mme ibọrọ N̄wed Abasi nnennen nnennen oto n̄wed Reasoning, eren oro ama enyịme. N̄wan esie ama okop inemesịt etieti ke enye ndikenyịme tutu enye ọdọhọ ete: “Nnyịn iyesidi mme mbonoesop mbufo.” Ndien ebe esie ama enyịme!
4 Da Un̄wam Oro Odude Nam N̄kpọ: Utom Obio Ubọn̄ Nnyịn ye ndutịm Esoputom ẹnọ eti ndausụn̄ ndin̄wam nnyịn ke ndisiak Ikọ Abasi. Ediwak mme asuanetop ẹwụt esịtekọm ẹban̄a nsio nsio nneme oro ẹnọde ekikere ẹban̄a oro ẹmịn̄de ẹnyụn̄ ẹnamde ẹwụt ke ufọn nnyịn ẹmi ẹdide ke ata ekemini ẹnyụn̄ ẹnyenede uforo. Reasoning From the Scriptures ọdọn̄ọ akpakịp ekikere ke nte ẹkemede nditịm nnam se ibede mme akpan ibuot nneme 70 ẹmi ẹtịn̄de ẹban̄a ke Ikọ Abasi an̄wan̄a. Ifiọk Oro Adade Osịm Nsinsi Uwem etịn̄ n̄kpọ ibio ibio aban̄a kpukpru isọn̄ ukpepn̄kpọ Bible oro oyomde mbufa owo ẹfiọk. Ukpepn̄kpọ 24 ye 25 ke Ñwed-item Ufök-ñwed Utom Ukara-Abasi ẹwụt nte mme andikpep ẹmi ẹnyenede usọ ẹtịmde ẹsiak, ẹkot, ẹnyụn̄ ẹwụt ebuana itien̄wed Abasi. Nnyịn ikpenyene ndida kpukpru un̄wam emi odude ọnọ nnyịn mi nnam n̄kpọ ke eti usụn̄.
5 Ke ini nnyịn itịmde isiak Ikọ Abasi, nnyịn iyokụt ite ke enye “enyene uwem . . . onyụn̄ enyene ukeme ndidụn̄ọde ekikere ye uduak esịt” mbon oro nnyịn ikwọrọde ikọ inọ. (Heb. 4:12) Unen oro nnyịn ikụtde oyonụk nnyịn nditịn̄ akpanikọ ye uko oro okponde akan kpukpru ini!—Utom 4:31.