Ifiọk Otode Abasi Ọbọrọ Ediwak Mbụme
1 Mbemiso afo ekedide edinyene nnennen ifiọk akpanikọ, eyedi afo ama enyene ediwak mbụme aban̄a uwem oro afo mûkekemeke ndibọrọ. Afo okokop inemesịt didie ntem ndinyene mme ibọrọ ẹtode Bible ke mme mbụme ẹmi! Idahaemi afo emekeme ndin̄wam mbon en̄wen ẹkụt mme ukem ibọrọ oro. (Men 2 Timothy 2:2 domo.) Afo emekeme ndibuana ifiọk Abasi emi adade esịm nsinsi uwem ye mmọ. (John 17:3) Edi didie ke afo ekeme ndin̄wam owo ọdiọn̄ọ ufọn ifiọk emi? Ọfọn, kere ban̄a mme mbụme oro akpanikọ ọkọbọrọde ọnọ fi. Ọdọn̄ mme oyom akpanikọ ndifiọk nso? Ndikere n̄kpọ ke mme afan̄ ẹmi ekeme ndin̄wam fi ọnọ n̄wed Ifiọk Oro Adade Osịm Nsinsi Uwem. Mme ekikere ẹtienede mi ẹkeme ndin̄wam fi ke ini etịmde idem ọnọ edinọ ikọ ntiense ke June.
2 Sia ediwak owo ẹkerede ntak emi ata ekese ndutụhọ odude ke ererimbot, usụn̄ enyeemi ekeme ndinyene eti utịp:
◼ “Ke ini afanikọn̄ etịbede m̀mê ke ini mme edinam ubiatibet ye afai ẹkọride, mme owo ẹsiwak ndibụp ntak mme utọ enyene-ndịk n̄kpọ oro ẹtịbede. Nso ikpedi ibọrọ fo?” Bet nyụn̄ kọm owo oro ke ibọrọ esie. Ekem kụbọde ka ibuot 8 ke n̄wed Ifiọk, nyụn̄ dụri ntịn̄enyịn wụt se idude ke ikpehe ekikere 2. Nam an̄wan̄a nte ke n̄wed emi ọnọ edinam an̄wan̄a eke Bible kaban̄a ntak emi ndiọi n̄kpọ ẹtịbede, nyụn̄ dọhọ ete: “Nyokop inemesịt ndinọ fi n̄wed emi ke etịbe edide ₦55.”
3 Ke ini afiakde aka ebiet ekenịmde n̄wed “Ifiọk,” afo emekeme ndidọhọ:
◼ “Ami mmenyene udọn̄ ke ubiere oro afo ekesịmde emi aban̄ade ntak emi ekese ndutụhọ ẹdude ke ererimbot. Nte afo emenyịme ye ibọrọ Bible nte ẹwụtde ke n̄wed emi?” Bet ibọrọ. Kot ikpehe ekikere 17 ke page 77 ke n̄wed Ifiọk, nyụn̄ dọhọ ke imọn̄ ikot Rome 9:14 ke Bible enyeneufọk. Ekem dọhọ ete: “Eti mbụk edi nte ke Abasi nte mînenke isinamke nnyịn ikop ubiak m̀mê ndutụhọ. Enye ọmọn̄wọn̄ọ ndinọ nnyịn nsinsi uwem ke emem ye inemesịt. Enyịn̄ akpa ibuot ke n̄wed mi edi ‘Afo Emekeme Ndinyene Inem Inem Ini Iso!’ N̄kpama ndinam an̄wan̄a nte oro ekemede nditịbe nnọ fi ye mbonima fo.” Kụbọde ka ibuot 1, nyụn̄ nam wụt nte nnyịn isinịmde ukpepn̄kpọ. Kpep ekese ke ibuot oro nte mme idaha ẹyakde.
4 Afo emekeme ndimek ndida ntọn̄ọikọ oro odude ke page 6 ke ekpri n̄wed “Nte Ẹkpetọn̄ọde Ẹnyụn̄ Ẹkade Iso ke Mme Nneme Bible,” ke idak ibuotikọ oro “Usọn̄/N̄kpa”:
◼ “Nte akanam afo omobụp ete, ‘Nte n̄kpa edi utịt kpukpru n̄kpọ? Mîdịghe nte n̄kpọ efen odu ke owo ama akakpa?’ [Bet ibọrọ.] Bible anam mbụme ekededi emi nnyịn ikpenyenede iban̄a n̄kpa an̄wan̄a. [Kot Ecclesiastes 9:5, 10.] Enye n̄ko owụt ete ke ata idotenyịn odu ọnọ mbon oro ẹnyenede mbuọtidem. [Kụbọde ka ikpehe ekikere 13 ke page 84 ke n̄wed Ifiọk; kot nyụn̄ nam mme ikọ Jesus ẹdude ke John 11:25 ẹn̄wan̄a.] Ẹnam ofụri ibuot emi ẹnọ ndibọrọ mbụme emi, Nso itịbe inọ mbonima nnyịn oro ẹkpan̄ade? Enyeemi ekeme ndidi okwo ke etịbe edide ₦55.”
5 Ke ini anamde mfiakn̄ka, afo emekeme ndifiak nsọn̄ọ itie ọdiọn̄ọ onyụn̄ ọdọhọ ete:
◼ “Isan̄ oko nnyịn ima ineme iban̄a se isitịbede ke ini owo akpade. Ediwak owo ẹnịm ke akpanikọ ẹte ke uwem ekededi ke owo ama akakpa edidi ke heaven m̀mê hell. Edi ndi akanam afo emekere aban̄a nte mme akpan̄kpa ẹkemede ndifiak ndu uwem mi ke isọn̄? [Bet ibọrọ.] Nte ekemde ye Bible, mbon oro ẹsetde ẹyesịne ke otu mbon nsụkidem oro ẹdade isọn̄ ẹnyene. [Kot Psalm 37:11, 29, ekem nneme ikpehe ekikere 20 ke page 88 ke n̄wed Ifiọk.] Idotenyịn oro ọmọnọ ediwak miliọn owo ẹmi ẹkekopde ndịk n̄kpa ndọn̄esịt. N̄wed emi ayanam n̄kpọ emi etịm an̄wan̄a fi. Nte mmekeme ndinam n̄wụt fi?”
6 Edieke afo amade mmemmem nneme, afo emekeme ndidomo enyeemi nse:
◼ “N̄kpama ndiwụt fi ndise ke n̄wed emi, Ifiọk Oro Adade Osịm Nsinsi Uwem. Nte emi idịghe ediye ndise?” Kụbọde n̄wed oro man enyeneufọk ekeme ndikụt page 4-5. Bet ibọrọ esie. Ekem kot mme ikọ ẹdude ke page 5. Beri ke ndidọhọ ete: “Afo emekeme ndinyene n̄wed emi man okot ke idemfo ke etịbe edide ₦55.” Bụp ban̄a ini emi edifọnde ndifiak ndi man anam n̄kpọ aban̄a udọn̄ ekededi oro ẹwụtde.
7 Nnyịn imenyene ifiọk otode Abasi emi ekemede ndibọrọ mme akpan mbụme ke uwem. Tịm idem mfọn mfọn, Jehovah oyonyụn̄ ọdiọn̄ mme ukeme fo ndibuana ọnọ-uwem ntọt emi ye mbon ẹmi ẹyomde akpanikọ.