Edieke Enyenede Mme Utịp, Kama Enye!
1 Utom Obio Ubọn̄ Nnyịn esika iso ọnọ nnyịn nsio nsio nneme oro ẹnọde ekikere ndikama ke utom ukwọrọikọ. Emi esinọ nnyịn mbufa ekikere ke nte ikpedemede udọn̄ ke etop Obio Ubọn̄. Ekeme ndidi nte ke afo emesisịn ukeme ke ọfiọn̄ kiet kiet ndikpep kiet m̀mê awakde akan oro ke otu nneme ẹmi. Nte ededi, ndusụk asuanetop ẹkeme ndikụt ke mbemiso idade kiet ke otu mmọ inam n̄kpọ ke esisịt ini, nsiondi Utom Obio Ubọn̄ Nnyịn en̄wen ọnọ mbufa nneme. Nte an̄wan̄ade eyedi kpukpru owo idikemeke ndikpep obufa nneme mbemiso ẹmehede ye akpa.
2 Nte ededi, ediwak tọsịn mme asiakusụn̄ ye mme asuanetop ẹdu ẹmi ẹsibiatde ekese ini ke utom an̄wautom. N̄ko-n̄ko, ediwak esop ẹsikụre ofụri efakutom mmọ ke urua ifan̄. Ke mme idaha ẹmi, mme asuanetop ẹsidara ndinyene mbufa usụn̄ edisobo ye mme owo ye mme ekikere ke ndinọ etop emi. Emi esin̄wam mmọ ndifori mme ukeme mmọ. Enye n̄ko esinam utom ukwọrọikọ mmọ enen̄ede enyene inem onyụn̄ on̄wụm mfri onyụn̄ an̄wam mmọ ndikan mme n̄kpọ-ata oro mmọ ẹsisobode.
3 Ke usụn̄ ekededi, edieke edide afo ama etịm nneme oro enyenede uforo ke ndikọri udọn̄, ke usụn̄ ekededi ka iso kama enye! Iyomke etre ndikama nneme emi enyenede uforo oro enyenede mme utịp. Kam nam enye ekekem ye mme n̄wed oro ẹnọde ke ọfiọn̄ oro. Nte afo odụn̄ọde mme ekikere oro ẹnọde ke Utom Obio Ubọn̄ Nnyịn, yom mme akpan n̄kpọ udọn̄ oro afo ekemede ndida mbuan ke nneme fo.
4 Ntre ke ini afo ọbọde obufa nsiondi Utom Obio Ubọn̄ Nnyịn, ti ete ke nneme oro ẹdọn̄ọde ke enye n̄kukụre ẹdi mme ekikere. Edieke ekemede ndikama mmọ, ọfọn. Edi edieke edide afo ama enyenyene nneme oro enyenede mme utịp ke efakutom fo, kama enye! Akpan n̄kpọ edi “nam utom fo ma” ke eti usụn̄, oyomde mbon oro ẹdotde onyụn̄ an̄wamde mmọ ẹkabade ẹdi mme mbet.—2 Tim. 4:5.