Ekebe Mbụme

◼ Mmanie ẹnyene mbiomo edinam Ufọkmbono Obio Ubọn̄ asana?

Ufọkmbono Obio Ubọn̄ oro asanade onyụn̄ eyede ada itoro ọsọk etop oro nnyịn ikwọrọde. (Men 1 Peter 2:12 domo.) Ndinịm ufọkmbono asana onyụn̄ eye edi akpan n̄kpọ, ndien kpukpru owo ẹkeme ndinyene udeme ke ndinịm enye asana. Nnyịn ikpodorike enyịn ibat ibat owo ndibiom ofụri mbiomo emi. Nte ido edide, ẹsidiomi edinam asana ẹtiene mme otu Ukpepn̄kpọ N̄wed Esop, ndien ada ukpepn̄kpọ m̀mê udiana esie edide adausụn̄. Ke mme ufọkmbono ẹmi se iwakde ibe esop kiet ẹsisopde idem, mbiowo ẹyenam ndutịm man kpukpru esop ẹbuana ke ndinịm enye asana.

Didie ke nnyịn ikeme ndise mban̄a utom emi ke mfọnn̄kan usụn̄? Ẹkpenyene nditiene ndutịm ofụri ini ke ndinam Ufọkmbono Obio Ubọn̄ asana. Mme n̄kpọ ẹyomde ye n̄kpọutom ẹkpenyene ndidu ke itie man ẹda ẹnam enye asana. Ẹkpenyene ndiwet mme n̄kpọ oro oyomde ẹnam ndian ke ebiet oro mbonutom ẹkemede ndikụt man ọnọ ndausụn̄. Ẹkeme ndinyene nsio nsio uwetn̄kpọ iba, kiet kaban̄a mfefere edinam asana eke ofụri ini ke mbono esop kiet kiet asuanade ndien enye eken kaban̄a ọyọhọ ọyọhọ edinam asana eke urua ke urua. Ada ukpepn̄kpọ n̄wed ekpenyene ndidiomi ọyọhọ ọyọhọ edinam asana ke usen ye ini oro ọfọnde ye kpukpru mbon oro ẹmekde. Ẹkpenyene n̄ko ndinọ ntịn̄enyịn ke mbiet, mme flawa, ye n̄ken̄e eto kpukpru ini. Ẹkpenyene ndikụt nte ke mbio ibonoke ke mbenusụn̄ ye itie ubon n̄kpọisan̄. Ẹkpenyene ndinam ọyọhọ ọyọhọ edinam asana, eyedi esisịt ini mbemiso Editi. Emi ekeme ndisịne ndiyet mme window ye ibibene, ndiyet ubrin̄kpọ isọn̄ufọk, nnyụn̄ n̄kwọhọde mme n̄kpọmbana.

Nte ededi, kpukpru nnyịn imekeme ndinam utom emi efere ebe ke nditre ndiduọn̄ọ mme babru, chewing gum, m̀mê mme n̄kpọ eken ke esịt m̀mê an̄wa ufọkmbono. Nnyịn imekeme ndinam itie uken̄idem asana kpukpru ini oro idade enye inam n̄kpọ, ikpọn̄de enye edisana edisana inịm inọ owo efen. Tịn̄ enyịn mbak udubiat n̄kpọutom m̀mê mme n̄kpọmbana. Nọ ntịn̄enyịn ke n̄kpọ ọtọide ke ubrin̄kpọ isọn̄ufọk, mme n̄kpọitie oro ẹbiarade, mfịna mmọn̄ esan̄ukwak, mme bulb oro mîsakke ikan̄ aba, ye ntre ntre eken, nyụn̄ tọt mme n̄kpọ ẹmi usọp usọp nọ eyenete oro esede aban̄a edidiọn̄ Ufọkmbono Obio Ubọn̄.

Ẹyak nnyịn idu ke mben̄eidem ndinam udeme nnyịn. Emi ayanam ẹnyene itie utuakibuot oro eyede onyụn̄ anamde nnyịn idi isio nte mme owo ẹmi ẹsanade, oro ẹkponode Jehovah Abasi.—1 Pet. 1:16.