Nte Afo Emesiwụt Esịtekọm ọnọ Ndisana N̄kpọ?
1 Ke ẹbụpde m̀mê nnyịn imesiwụt esịtekọm inọ ndisana n̄kpọ, eyedi nnyịn iyọsọsọp ibọrọ ih! Nso idi ndusụk ndisana n̄kpọ Abasi oro nnyịn iwụtde esịtekọm inọ?
2 Nnyịn ida ọkpọkpọ itie ebuana oro ẹyakde nnyịn inyene ye Ete nnyịn eke heaven ke ọsọn̄urua n̄kpọ didie ntem! Enye ọnọ nnyịn nsọn̄ọ ete ke edieke nnyịn ‘isan̄ade ikpere imọ, imọ iyasan̄a ikpere nnyịn.’ (Jas. 4:8) Ke ẹsiode uwa ufak Jesus Christ ẹfep, baba owo kiet ikpekemeke ndinyene nsinsi uwem. (John 3:16) Ke ndiwụt ata esịtekọm, nnyịn imesitịn̄ ntotụn̄ọ esịtekọm oro inyenede inọ ọsọn̄urua enọ Abasi emi ke usen ke usen ke akam.
3 Nnyịn ida Ikọ Abasi eke odudu spirit, kpa Edisana Bible, n̄ko ke edisana n̄kpọ, kpa nte idade esop Jehovah eke isọn̄. Nnyịn iwụt esịtekọm oro odotde inọ mme enọ Jehovah emi ke ini nnyịn idade mme edumbet Bible idu uwem, isọn̄ọde mbọbọ ima nditọete, itịn̄de enyịn inịm mme mbet ukara Abasi, inyụn̄ ibere ye mbon oro ẹdade usụn̄.—1 Pet. 1:22.
4 Ebede ke asan̄autom emi anamde akpanikọ, onyụn̄ enyenede ọniọn̄, nnyịn imọbọ akpakịp udia eke spirit. Oro edidi ntre isua emi ke Mbono District “Mme Anam Ikọ Abasi.” Do nnyịn iyọbọ akpan item inyụn̄ idara ufiop ufiop itie ebuana oro nnyịn inen̄erede iyom. Didie ke nnyịn ikeme ndiwụt ntotụn̄ọ esịtekọm nnọ edisana enọ emi?
5 Kûkpọn̄ Ufọk Jehovah: Nehemiah ama eteme mbon oro ẹkenamde utom ọkpọsọn̄ ndifiak mbọp ibibene Jerusalem ete ‘ẹkûkpọn̄ ufọk Abasi mmọ.’ (Neh. 10:39) Mfịn, “ufọk” Jehovah edi ndutịm utuakibuot esie. Mme mbono district nnyịn ẹdi ubak ndutịm oro. Man idikpọn̄ ndutịm emi, ana nnyịn idu do inyụn̄ inọ ọyọhọ n̄kpan̄utọn̄, iwụtde Jehovah ke imenen̄ede ida enọ esie ke akpan n̄kpọ. (Heb. 10:24, 25) Nso ndutịm ke nnyịn ikpanam idahaemi ndiwụt nte ke imowụt ọyọhọ esịtekọm inọ edisana edinam emi?
6 Dụk Ofụri Usen Ita: Kpukpru nnyịn ikpenyene ndinam ndutịm ndidụk ofụri usen mbono ita oro. Nte afo ke anam ndutịm ndibabak nsịm kpukpru usen nnyụn̄ ndu tutu ẹbọn̄ akpatre akam ke Sunday? Ke edide ntre, uwak edidiọn̄ ẹyedi okwo. Ndidụk mbono isiwakke ndidi mmemmem n̄kpọ. Ndinam ukpụhọde oro ekemde ye utom idịbi udia fo ekeme ndiyom afo enyene iwụk. Ndutịm ukaisan̄ ekeme nditre ndidi mmemmem n̄kpọ kpukpru ini. Edi kûyak mme n̄kpọ emi ẹbiọn̄ọ fi ndidụk mbono.
7 Kere Ban̄a Ata Eti Uwụtn̄kpọ Emi: Otu nditọete ke idụt Africa kiet oro ndutịme mbio obio odude ẹma ẹsobo ye otu mbonekọn̄ kiet ke usụn̄ uka mbono district isua oko. Ẹma ẹbụp nditọete oro ẹte: “Mbufo ẹdi mmanie, ẹnyụn̄ ẹka m̀mọ̀n̄?” Mmọ ẹma ẹbọrọ ẹte: “Nnyịn idi Mme Ntiense Jehovah, ika mbono district.” Kiet ke otu mbonekọn̄ oro ama ọdọhọ ete: “Mbufo Mme Ntiense Jehovah ibakke n̄kpọ ndomokiet. Ẹbe ẹka, mbufo ẹyenyụn̄ ẹkeme ndinịm mbono mbufo ye unana mfịna ndomokiet. Nte ededi, ẹfiọk ẹte ke mbufo ẹyesobo ediwak mbonekọn̄. Ẹsan̄a ke ufọt usụn̄ kpukpru ini! Edieke mbufo ẹkụtde ediwak owo ẹbohode ọtọkiet, ẹka iso ẹsan̄a ke ufọt usụn̄!” Mmọ ẹma ẹnam ntre ẹnyụn̄ ẹkesịm itie mbono ke ifụre. Nditọete emi ẹma ẹbọ utịp koro mmọ ẹkewụtde esịtekọm oro mmọ ẹnyenede ẹnọ ndisana n̄kpọ.
8 Nnyịn n̄ko imosobo mme n̄kpọ-ata, ukem nte nditọete nnyịn ke idụt oro. Edi nte eyịghe mîdụhe, nnyịn imekeme ndikpebe mbuọtidem mmọ inyụn̄ ibiere ndidụk kpukpru ikpehe edinam mbono district nnyịn. Edieke oyomde anam mme ukpụhọde, beri edem ke Jehovah kaban̄a ndausụn̄, ọfiọkde ete ke enye ọyọdiọn̄ ukeme nnyịn ndidụk ofụri edinam oro.
9 Bọ Mme Edidiọn̄: Nnyịn imesiyom Ikọ Abasi, sia ifiọkde ite ke ebede ke enye nnyịn imekeme ndikọri nsịm edinyan̄a. (1 Pet. 2:2) Nnyịn ndidụk mbono district nnyụn̄ n̄kpan̄ utọn̄ nnọ ndutịm ẹyen̄wam owo nnyịn kiet kiet ndibọp mbuọtidem oro ọsọn̄de idem akan ke Ikọ oro ndien ke ntem idude ke idaha oro ọfọnde akan ndikeme ndisọn̄ọ nda mbiọn̄ọ n̄kpọsọn̄ en̄wan Satan. Ke ndinam ntre, nnyịn iyowụt Jehovah ye kpukpru mme andida nse nte ke nnyịn imowụt esịtekọm ọyọhọ ọyọhọ inọ ndisana n̄kpọ, inyụn̄ “idịghe mbon mfiakedem . . . edi idi mmọ emi ẹbuọtde idem isịm edinyan̄a ukpọn̄.”—Heb. 10:39; 12:16; N̄ke 27:11.
10 Nnyịn imekeme ndidori enyịn ke Jehovah Abasi ndiberede window heaven nnyụn̄ n̄n̄wan̄a akpakịp edidiọn̄ eke spirit nnọ nnyịn. (Mal. 3:10) Nam edi utịtmbuba fo ndidụk Mbono District “Mme Anam Ikọ Abasi” ọtọn̄ọde ke akam ediberede ke usenubọk Friday tutu esịm akam ediberi ye “Amen!” ke uwemeyo Sunday. Oyokop idatesịt ke ndikanam ntre!