Ekebe Mbụme
◼ Ntak ọfọnde otuowo ndikụbọde mme itien̄wed ke ini etịn̄ikọ ọdọhọde ẹnam ntre ke ini enye ọnọde utịn̄ikọ?
Se idibierede ibat itien̄wed oro ẹkemede ndidọhọ otuowo ẹkụbọde edi ibuot nneme oro ẹnemede ye m̀mê utịn̄ikọ oro esịne edineme ufan̄ikọ kiet kiet ke ikpehe Ikọ Abasi.
Edi akpan n̄kpọ nditi nte ke ntak kiet ndikụbọde N̄wed Abasi edi ndisọn̄ọ nte ke se ẹtịn̄de oto Bible. (Utom 17:11) Uduak efen edi ndidụn̄ọde uyarade N̄wed Abasi ndisọn̄ọ se ẹnemede man ẹsọn̄ọ mbuọtidem kpukpru owo. Ndikụt se Bible enen̄erede etịn̄ ke adan̄aemi okotde akpan itien̄wed eyetịm otụk ekikere. Ke adianade ye edikụbọde mme itien̄wed Abasi, ọfọn ndiwet mme n̄kpọ nnịm nnyụn̄ ntiene nte ẹnamde mme ekikere ẹn̄wan̄a.
Ke adan̄aemi n̄wed utịn̄ikọ N̄ka ekemede ndisiak ediwak itien̄wed Abasi ndida ntat ibuot nneme, ẹdọn̄ mmọ emi ke ufọn etịn̄ikọ, man an̄wam enye ke ntịmidem esie. Mmọ ẹkeme ndinọ ọyọhọ ntọt nnyụn̄ n̄n̄wam enye enyene mme akpan edumbet N̄wed Abasi edifọn edifọn ke ekikere nnyụn̄ mfiọk nte ẹtatde ibuot nneme oro. Etịn̄ikọ ebiere m̀mê ewe itien̄wed edi akpan n̄kpọ ke ndida ntat utịn̄ikọ oro onyụn̄ ọdọhọ otuowo etiene nte enye okotde onyụn̄ anamde mme utọ itien̄wed oro ẹn̄wan̄a. Etịn̄ikọ ekeme ndikot m̀mê ndikam mfiak ntịn̄ mme itien̄wed oro ẹsọn̄ọde ibuot nneme oro ke ikọ en̄wen, edi ke mme utọ idaha oro iyomke otuowo ẹkụbọde mme itien̄wed.
Ke ini etịn̄ikọ okotde mme itien̄wed oro asatde-sat, enye okot nnennen oto Bible, ikotke ito babru oro ẹkemịn̄de ke kọmputa. Ke ini etịn̄ikọ ọdọhọde otuowo etiene ese nte okotde, enye asiak itie Bible, ibuot, ye (mme) ufan̄ikọ nte an̄wan̄ade. Ke ndituak nda man obụp mbụme m̀mê etịn̄ ibio ibio ntak anamde okot itien̄wed oro, enye ọnọ otuowo ini ndikụt itien̄wed oro. Ndifiak nsiak itien̄wed ayan̄wam otuowo n̄ko nditi itie ẹkotde. Nte ededi, owo itoroke ite ẹsiak nọmba page, sia emi ekemede ndidi isio ọkọn̄ọde ke akpan nsiondi Bible oro mme owo oro ẹdude ke otu ẹkamade. Ndikụbọde Bible ke ini ẹnọde ikot ndinam ntre an̄wam otuowo ndibọ ufọn nto odudu Ikọ Abasi nte ẹnamde enye an̄wan̄a ke ini utịn̄ikọ oro.—Heb. 4:12.