Nte Afo Emekeme Ndinọ Idemfo?

¹ N̄wọrọnda n̄kpọ ama etịbe ke 778 M.E.N. Isaiah ama okụt ke n̄kukụt nte “[Jehovah] etiede ke edikon̄ ye edimenede ebekpo.” Ekem Isaiah ama okop nte mme seraph ẹdụride ntịn̄enyịn ẹwụt ubọn̄ Jehovah, ẹdọhọde ẹte: “Edisana, edisana, edisana, Jehovah mme udịm.” Anaedi oro okodoro owo uten̄e didie ntem! Ke idaha oro, Jehovah ama obụp mbụme emi akamade n̄kpọ-ata mi: “Anie ke ndidọn̄ utom? Anie edinyụn̄ aka n̄kpọ ọnọ nnyịn?” Owo inamke se orụk utom emi edide an̄wan̄a, n̄ko m̀mê owo emi oyomde ndika eyenyene ufọn oto enye. Kpa ye oro, Isaiah ọbọrọ ye unana mmen̄e ete: “Se mi, dọn̄ mi utom.” (Isa. 6:1, 3, 8) Nte afo emeben̄e idem ndibọrọ ye edu unyịmesịt ebietde eke Isaiah?

² Ẹnen̄ede ẹyom nditọete ndinam utom ke Bethel. Emi oyom mmọ ẹnyene ọkpọsọn̄ udọn̄ ndinịm mme ufọn n̄kpọ Obio Ubọn̄ akpa nnyụn̄ nnyịme ndinam se ededi oro ẹdiyomde man ẹnọ utom ukwọrọikọ ofụri ererimbot ibetedem. (Matt. 6:33) Ke akpanikọ, ndinam utom nte andibuana ke ubon Bethel ọnọ owo anana-mbiet ifet ndinam n̄kpọ Jehovah ke ofụri esịt. Didie ke edi ntre?

³ Nsio Nsio Utom: Utom oro ẹnọde mbonubon Bethel ẹdi ke orụk ke orụk. Ke Brooklyn ye ke ediwak n̄kọk itieutom efen, ndusụk nditọete ẹnam utom ke ufọk umịn̄n̄wed oro ẹmịn̄de mme Bible, mme n̄wed, mme magazine, ndiye uduot n̄kpri n̄wed, ye mme tract man ẹsuan ke ofụri ererimbot. Mbon eken ẹbuana ke ndidian mme n̄wed ye Bible, ke adan̄aemi utom mbon en̄wen abuanade edinọ mme n̄wed emi ẹka mme esop ke ofụri ererimbot. Ẹnọ ediwak owo utom edise mban̄a mme n̄kpọutom ye ufọk. Ekese utom ẹbuana ke ndise mban̄a ubon Bethel. Ke uwụtn̄kpọ, ke n̄kọk itieutom Nigeria, ẹsida minit 20 ẹnọ n̄kpọ nte owo 500 udia usenubọk. Ke adianade do, mme akamaufọk ẹsinịm mme ufọkidụn̄ ẹnen̄ede ẹsana ẹnyụn̄ ẹse ẹban̄a ata ediwak akpan utom en̄wen.

⁴ Ndinam kpukpru emi edi ọkpọsọn̄ utom, edi esinọ uyụhọ ke n̄kan̄ eke spirit. Ndifiọk nte ke ida ofụri odudu ye ukeme nnyịn inọ utom edikwọrọ Obio Ubọn̄ ye edikpep ibetedem ọnọ akwa idatesịt. Utom Bethel an̄wam nnyịn ndifiọk esop Jehovah ata ntotụn̄ọ ntotụn̄ọ. Ẹti nnyịn nte ke andiwet psalm ama esịn udọn̄ ọnọ nditọ Israel ndinen̄ede mfiọk iwụk ebiet ukara Abasi eke isọn̄ ke eyo mmọ.—Ps. 48:12 13.

⁵ Mme Edidiọn̄ Utom Bethel: Mbon oro ẹnamde utom ke Bethel ẹse ifetutom mmọ didie? Kop ikọ ẹtienede mi, oro mbufa ye n̄kani mbonubon Bethel ẹtịn̄de. Owo ubon Bethel kiet emi ama akanam utom isua ita ke Bethel ọdọhọ ete: “Ndidụn̄ ke Bethel ọmọsọn̄ọ itie ebuana mi ye Jehovah. Adan̄a nte nnamde utom mbịghi nnyụn̄ n̄kpepde mban̄a nte ẹnamde n̄kpọ ke Bethel, ntre ke emi etetịm ekpep mi aban̄a edu Jehovah. Utom Bethel amatat mi enyịn n̄ko ndikụt nte ke Jehovah ada mme owo anam utom—kpukpru orụk owo. Ndien iyomke afo edi mfọnmma mbemiso enye ada fi.”

⁶ Ekpri eyenete kiet ọdọhọ ete: “Mmeti nte n̄kekerede nte, ‘Ekpeye didie ntem ndidụk obufa ererimbot nnyụn̄ nsian mme anam-akpanikọ iren eset nte ke n̄kanam utom ke Bethel ke ediwak isua utu ke ndin̄wana okụk ke an̄wa.’”

⁷ Eyenete an̄wan kiet ekere aban̄a mme edidiọn̄ oro enye ọbọde kan̄a ke emi, onyụn̄ ọdọhọ ete: “Mme ndutịm eke spirit ke Bethel ẹmekpep mi ekese n̄kpọ ẹban̄a Jehovah ye nte n̄kemede ndinen̄ede n̄kpebe enye ke ekikere, ntụk, ye edinam. Ndien sia ukpep emi akade-ka iso, enye edi edidiọn̄ oro akade-ka iso.”

⁸ Eyenete eren emi esịnde isua 59 ke utom ukwọrọikọ uyọhọ ini, emi isua 43 ke otu oro ẹdide ke Bethel, ọkọdọhọ ete: “Bethel itiehe nte ufọkidụn̄ n̄ka mọn̄k, nte ndusụk owo ẹkemede ndikere. Nnyịn imesinam ekese ke ntak oro uwem nnyịn enyenede ndutịm. . . . Akananam idụhe usen utom emi se nnamde mînemke mi. Ntak-a? Koro ke ini nnyịn inọde Jehovah idem nnyịn ke ofụri ukpọn̄, nnyịn imokop inemesịt ndifiọk nte ke nnyịn ‘inam kpa se nnyịn ikpanamde.’”—Luke 17:10.

⁹ Eyenete eren efen oro ama akanam utom isua 62 ke Bethel ọkọdọhọ ete: “Mmenen̄ede nnịm ke akpanikọ nte ke Bethel edi mfọnn̄kan itie ke isọn̄ mbemiso Paradise isọn̄ oro edide. Akananam isịbeke idụk mi ekikere nditua n̄kpọfiọk ke ndinam utom uyọhọ ini edi ubọkọkọ ofụri eyouwem mi. Nso idatesịt ke edi ntem ndikụt nnyụn̄ mbuana ke akwa n̄kọri esop Jehovah eke isọn̄! Ye un̄wam Jehovah, edi ubiere mi ndinam Bethel edi ufọk mi nnyụn̄ nsịn idemmi ofụri ofụri ndinam mme ufọn n̄kpọ Obio Ubọn̄ ẹkọri.”

¹⁰ Mbonubon Bethel emi ẹtịn̄ ibat ibat edidiọn̄ oro afo ekemede ndinyene edieke afo ọnọde idemfo ndinam utom Bethel. Edi kpa nte edide ye edibọ ifetutom ekededi, afo enyene ndibem iso nsịm mme n̄kpọ oro ẹyomde. Nso idi ndusụk n̄kpọ oro ẹyomde man owo anam utom nte owo ubon Bethel?

¹¹ Se Ẹyomde Kaban̄a Utom Bethel: Ẹwụt mme akpan n̄kpọ oro ẹyomde ẹto mbon oro ẹyomde ndisịn n̄wed eben̄e utom Bethel ke ekebe oro etienede mi. Adianade do, edi akpan n̄kpọ mmọ ndinam utom ifịk ifịk, idịghe ‘mme ama mbre.’ (2 Tim. 3:4; 1 Cor. 13:11) Mbonubon Bethel ẹkpenyene ndidi iren ye iban eke spirit emi ẹma ẹkekọri nti edu ukpepn̄kpọ ẹnyụn̄ ẹkọ ifiọk ‘ndidiọn̄ọ se ifọnde ye se idiọkde.’ (Heb. 5:14) Ekpenyene ndidi mmọ ẹma ẹwowụt edikọri nsịm ọyọhọ idaha Christian ke kpukpru ikpehe uwem, esịnede usịnen̄kpọ, ukamaidem, ye ikwọ ye unọ idem inemesịt oro ẹmekde. Mbonubon Bethel oro ẹdide mbon unyịmesịt ẹsinam utom ke ebiet ekededi oro ẹyomde mmọ. Ẹsiwak ndinọ mbonubon ẹdide n̄kparawa utom oro oyomde odudu, esịnede edimịn̄ mme n̄wed, editịm ye edinọ mme n̄wed ẹwọrọ, edidiọn̄ mme n̄kpọutom, edikama ufọk, edinịm itie asana, ediyet ọfọn̄, ye editem udia. (N̄ke 20:29) Nte ededi, sia mîtiehe nte utom idịbi udia, kpukpru utom ẹnọ akwa idatesịt sia mmọ ẹdide edisana utom oro ẹnọde Jehovah ubọn̄.—Col. 3:23.

¹² Ke nsụhọde n̄kaha ana mbon oro ẹkotde ke Bethel ẹdu isua kiet. Emi anam ẹkeme ndinọ mmọ ukpep man ẹkabade ẹdi mbonutom oro ẹnyenede uforo. Ẹdori enyịn nte ke mmọ ẹyenam Bethel edi ufọk mmọ. Ima ẹnyenede ẹnọ Jehovah anam mbonubon Bethel ẹnam utom Obio Ubọn̄ edi ebeiso ọnọ mme ọkpọkpọ udọn̄ mmọ, ndien emi enem Jehovah esịt.—Matt. 16:24.

¹³ Se Ẹyomde Idahaemi: Ke ntak orụk utom oro ẹnamde ke Bethel, nditọete iren oro mîdọhọ ndọ ke nnyịn inen̄ede iyom idahaemi. Ẹnen̄ede ẹma mbon oro ẹdide mme asiakusụn̄ ofụri ini, sia mmọ ẹma ẹkedodu ke utom uyọhọ ini, okposụkedi emi mîsịneke ke mme n̄kpọ oro ẹyomde. Ndusụk ini ẹkeme ndiyom nditọete iban oro mîdọhọ ndọ ye mme ọdọ ndọ oro ẹdude ke ufọt isua 19 esịm 35 emi ekemede ndidi ẹnyene mme akpan usọ oro ẹyomde ke Bethel. Adianade do, ẹsịn udọn̄ ẹnọ nditọete iren ye iban oro ẹbede isua 35 esisịt, edi emi ẹnyenede akpan usọ m̀mê ẹkebọde san̄asan̄a ukpep oro ẹkemede ndida nnam utom ke Bethel ndisịn eben̄e. Ke uwụtn̄kpọ, emi esịne mbia edet, mbiausọbọ, nta abatokụk, mme ewet mbuwed ufọk, mme ọdiọn̄-ukwakutom, mme nurse oro ẹsịnde enyịn̄ ke n̄wed ukara, mme ọdiọn̄ ubomisọn̄, m̀mê mme ọdiọn̄ ilektrọnik, ke ndisiak ibat ibat. Nte ededi, nnyịn isịnke udọn̄ inọ mme owo ite ẹka n̄wed ẹkebọ akpan ukpep ye ekikere nte ke emi ayanam ẹsọp ẹkot mmimọ ke Bethel. Mbon emi ẹma ẹkebọbọ akpan ukpep, eyedi mbemiso ẹbọde akpanikọ, ẹkeme ndiwet ọyọhọ ntọt aban̄ade ubọkọkọ mmọ ẹdian ke n̄wed eben̄e Bethel.

¹⁴ Kûyak idem emem fi edieke afo esịnde eben̄e ndien owo ikotke fi edinam utom ke Bethel. Afo emekeme ndisifiak nsịn eben̄e ini kiet ke isua. Ndusụk nditọete ẹmenyịme ndidi ndinam utom ke ibio ini. Mmọ ẹkeme ndisịn eben̄e ndinam utom ibio ini ke Bethel ke ọfiọn̄ kiet esịm ọfiọn̄ ita.

¹⁵ Ndinam n̄kpọ Jehovah ke n̄kpet n̄kpet ebuana ye nditọete Christ edi san̄asan̄a ifet emi mbon oro ẹnamde utom ke Bethel ẹnyenede. Otu Ukara owụt esịtekọm aban̄a edu n̄waidem ofụri mbon oro ẹnọde idemmọ ndinam n̄kpọ nnọ nditọete ofụri ererimbot.—Phil. 2:20-22; 2 Tim. 4:11.

¹⁶ N̄kpri Owo—Ẹtịm Idem Idahaemi ẹnọ Utom Bethel: Editịm idem nnọ utom Bethel ọtọn̄ọ anyan ini mbemiso ẹsịmde n̄kpri-n̄kan isua oro ẹyomde owo esịm, emi edide isua 19. Nso ke n̄kpri owo ẹkeme ndinam man ẹtịm idem ẹnọ utom Bethel? Jesus ọkọdọhọ ete: “Anie owo ke otu mbufo, emi oyomde ndikọn̄ tower, idibemke iso itie ibat se iditakde?” (Luke 14:28) Sia ntịmidem ye ndutịm ẹdide akpan n̄kpọ man ẹkụt unen ke utom ubọpn̄kpọ ekededi, edi akpan n̄kpọ didie ntem mme uyen ndinọ ọyọhọ ntịn̄enyịn ke nte mmọ ẹbọpde ẹnọ ini iso ke utom Jehovah! Ana ẹbabak ẹsịn eti itiat idakisọn̄ man mmọ ẹsịm mme utịtmbuba eke spirit. Nte uyen, afo esịn itiat idakisọn̄ ọfọn adan̄a didie? Edieke afo amade ndinam utom ke Bethel, afo ọyọbọ ufọn oto nditịn̄ enyịn n̄kere mban̄a se itienede emi.

¹⁷ ‘Bọ’ San̄asan̄a Ifetutom Emi: Nnyịn isịn udọn̄ inọ n̄kpri owo nnyịn ite mmọ ẹda odudu mmọ ẹbịne utom uyọhọ ini ke adan̄aemi mmọ mînyeneke kan̄a mme mbiomo ubon. Ekem, ke ndusụk ini ẹma ẹkebe, edieke mmọ ẹbierede ndidọ ndọ, mmọ ẹyekabade ẹdi ata nti ebe ke ntak ẹkenyenede ekese ifiọk ke uwem ye ke utom Christian. Ke ẹma ẹkenam utom ke ediwak isua ke Bethel, ndusụk owo ẹmedọ ndọ ẹnyụn̄ ẹka iso ndinam utom do nte ebe ye n̄wan. Nte ini akade, edieke mmọ ẹnyenede mme ifetutom en̄wen, utọ nte utom akpan asiakusụn̄ m̀mê utom oro ẹsan̄ade-san̄a, ke akpanikọ mmọ ituaha n̄kpọfiọk iban̄a ini oro mmọ ẹkesịnde ke utom Bethel.

¹⁸ Kûyak Mme N̄kpọ Obụkidem Ẹwọn̄ọde Ntịn̄enyịn Fo: Ọkpọfọn uyen kiet kiet obụp ete: ‘Ke mma n̄kokụre ufọkn̄wed, ndi utịtmbuba mi edi ndibịne utom idịbi udia uyọhọ ini m̀mê edi ndinam n̄kpọ Jehovah ke uyọhọ ini?’ Edi akpanikọ, ndinam n̄kpọ Jehovah ke uyọhọ ini oyom n̄waidem. Edi ndibịne ubọkọkọ oyom n̄waidem n̄ko! Ke akpatre, ewe utịtmbuba edinen̄ede enyene nsinsi utịp? Jesus ama ọnọ in̄wan̄-in̄wan̄ ibọrọ. (Matt. 6:9-21) Esịt nnyịn akpakam etre ndibian̄a nnyịn ibịne ubọkọkọ ererimbot m̀mê mme n̄kpọ obụkidem utu ke utom ofụri esịt oro inamde inọ Jehovah.

¹⁹ Ana Mbon Oro Ẹnamde Utom ke Bethel Ẹsana ke Ido Uwem: Andiwet psalm okobụp ete: “Eyenọwọn̄ ada nso anam usụn̄ esiemmọ asana?” Enye ọkọbọrọ ete: “Ekpeme enye nte ikọ fo asan̄ade.” (Ps. 119:9) Oro abuana ndifep n̄kpọ ekededi oro enyenede ebuana ye mbiara edu uwem editịm n̄kpọ Satan. Ndise idan̄ ke Intanet, edinam n̄kpọ nte mîdotke ye owo isio uduot, ikwọ oro asabarede owo, esuene esuene unọ idem inemesịt, ye edin̄wọn̄ ọkpọsọn̄ mmịn ke owo mîsịmke kan̄a isua un̄wọn̄ mmịn ẹkam ẹdi ndusụk n̄kpọ etabi oro Satan adade ọbiọn̄ọ mme uyen nnyịn ndisịm mme utịtmbuba eke spirit. Oyom ọkpọsọn̄ ubiere man ẹbiọn̄ọ mme n̄kukan emi. Nte uyen, edieke afo okụtde ke emesịn idem ke ekededi ke otu n̄kpọ emi, sian mbiowo esop mbufo nyụn̄ tre mme n̄kpọ emi mbemiso esịnde eben̄e utom Bethel. Ndinyene edisana esịt edi akpan n̄kpọ ke ndinam n̄kpọ Jehovah ọyọhọ ọyọhọ.—1 Tim. 1:5.

²⁰ Kpep Ndinyene Eti Itie Ebuana ye Mbon En̄wen: Akpan n̄kpọ kiet oro ẹyomde man owo okụt unen ke utom Bethel edi ndinyene eti itie ebuana ye mbon en̄wen. Nditọete iren ye iban ẹtode nsio nsio idaha ke uwem ẹnam ubon Bethel. Ke adan̄aemi nsio nsio edu emi anamde Bethel etetịm eye, ndusụk ini enye ekeme ndikama n̄kpọ-ata. Edieke afo oyomde ndidụk utom Bethel, ọyọfọn afo obụp idemfo ete: ‘Ndi mmesisọp ndiyat esịt edieke mbon en̄wen mînyịmeke ekikere mi? Ndi mbon en̄wen esikeme ndibuana n̄kpọ ye ami?’ Edieke oyomde afo anam n̄kọri ke mme ikpehe emi, tọn̄ọ ndinam oro idahaemi. Afo ndinam oro ayan̄wam fi ndisọp nnam ukpụhọde oro oyomde man odụn̄ onyụn̄ anam utom ye mbonubon Bethel.

²¹ Mme Ete ye Eka, Ẹnọ Nditọ Mbufo Ukpep: Nso ke mme ete ye eka ẹkeme ndinam man ẹsịn udọn̄ ẹnọ nditọ mmọ ndibịne utom uyọhọ ini? Jesus ọkọdọhọ ete: “Kpukpru eyen ukpep-n̄kpọ ẹyetie nte andikpep enye ke ini ẹtịmde ẹkpep enye n̄kpọ ẹma.” (Luke 6:40) Nte ido edide, eyen ukpepn̄kpọ oro ẹnen̄erede ẹnọ ukpep edinyene ukem nti edu ifịk ifịk andikpep esie. Mme ete ye eka ẹdide Christian ẹkpenyene nditi edumbet emi nte mmọ ẹnamde utom ọkpọsọn̄ ndinọ nditọ mmọ ukpep man “[ẹnyene] uten̄e Abasi.” (1 Tim. 4:7) Sia nditọ ẹnyenede ntụhọ ediwụt mme edu oro ete ye eka mmọ ẹnyenede ẹban̄a mme n̄kpọ eke spirit, ọfọn mme ete ye eka ẹbụp idemmọ ẹte: ‘Nte nnyịn ke idem nnyịn imenen̄ede idara utom oro ẹnamde ke Bethel man ẹmenede utuakibuot akpanikọ Jehovah ke enyọn̄? Nte nnyịn imokụt edidiọn̄ Jehovah ke ndutịm Bethel? Nte nnyịn imenịm ke akpanikọ nte ke ndisịn idem ke utom Jehovah edi mfọnn̄kan ubọkọkọ oro nditọ nnyịn ẹkpemekde?’ Ntotụn̄ọ esịtekọm oro nnyịn ke idem nnyịn inyenede iban̄a Bethel ye utom oro ẹnamde do ayan̄wam nnyịn ndisịn ukem ima oro ke esịt nditọ nnyịn.

²² Elkanah ye Hannah ẹma ẹnyene ntotụn̄ọ esịtekọm ẹban̄a utuakibuot akpanikọ. (Ex. 23:17; 1 Sam. 1:3, 4, 9, 19; 2:19) Hannah ekenyene ukem udọn̄ oro ebe esie ekenyenede aban̄a utuakibuot akpanikọ. Mbiomo oro enye ekenyenede nditịp n̄kpọ nsịn ke utuakibuot akpanikọ ke ataya ama enen̄ede otụk enye. Hannah ama ọn̄wọn̄ọ ete ke edieke Jehovah ọnọde imọ eyeneren ke imọ iyọnọ enye akanam utom ke ataya. (1 Sam. 1:11) Ibet Moses ama enyịme ebe abiat akan̄a n̄wan esie oro mîdotke. (Num. 30:6-8) Nte ededi, ana in̄wan̄-in̄wan̄ nte ke Elkanah ama enyịme akan̄a Hannah, owụtde ke enye n̄ko ama ọnọ edinam utuakibuot akpanikọ oro ibetedem!—1 Sam. 1:22, 23.

²³ Ndi esịtekọm ye eti edu oro ete ye eka esie ẹkewụtde ama otụk Samuel eyen mmọ ke eti usụn̄? Ih, ama otụk. Nte ekpri eyen, Samuel ama anam utom esie ke unyịmesịt ye ke edinam akpanikọ ndien ẹma ẹnọ enye ukpep kaban̄a ọsọn̄urua ifetutom efen efen ke utom Abasi. Udọn̄ oro Elkanah ye Hannah ẹkenyenede ke utom Samuel ke ataya ikokụreke ke enye ama ọkọtọn̄ọ utom esie do. Mmọ ẹma ẹsika ẹkese enye kpukpru isua man ẹnọ enye nsịnudọn̄ ye un̄wam nte enye akanamde utom uyọhọ ini.—1 Sam. 2:18, 19.

²⁴ Nso eti uwụtn̄kpọ ke Elkanah ye Hannah ẹkenịm ntem ẹnọ mme ete ye eka ẹdide Christian mfịn! Ke ini nditọ nnyịn ẹkopde mme ikọ esịtekọm oro nnyịn itịn̄de iban̄a ifet edinam utom ke Bethel, ẹnyụn̄ ẹkụtde edu n̄waidem oro nnyịn iwụtde ke ndinam mme ufọn n̄kpọ Obio Ubọn̄ ẹkọri, mmọ n̄ko ẹyekọri udọn̄ ofụri esịt ndinam n̄kpọ nnọ mbon efen. Ediwak ete ye eka ke ẹkụt unen ndisịn eti udọn̄ emi ke esịt nditọ mmọ.

²⁵ N̄kpri owo, ẹti ẹte ke “ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.” (1 John 2:17) Ẹka iso ndibịne mme utịtmbuba eke spirit, esịnede san̄asan̄a ifet edinam utom ke Bethel. Mme ete ye eka, ẹkpebe uwụtn̄kpọ mbon oro ẹkenamde akpanikọ ke eset, emi ẹkesịnde udọn̄ ẹnọ nditọ mmọ ndikọri uten̄e Abasi. (2 Pet. 3:11) Ndien kpukpru nnyịn ikpakam inam udeme nnyịn ndin̄wam n̄kpri nditọete iren ye iban ndinam n̄kpọ Akwa Andibot nnyịn ke ọyọhọ udomo nte ẹkekeme, sia “un̄wọn̄ọ uwem emi odude ke emi ye eke uwem emi edidide asan̄ade ye enye.”—1 Tim. 4:8; Eccl. 12:1.

[Ekebe ke page 4]

Mme Akpan N̄kpọ Oro Ẹyomde Man Ẹnam Utom ke Bethel

● Owo emi ama akana baptism ke nsụhọde n̄kaha isua kiet

● Owo eke spirit emi enyenede ọkpọsọn̄ ima ọnọ Jehovah ye esop esie

● Owo emi enyenede nsọn̄idem eke spirit, eke ekikere, eke ntụk, ye eke ikpọkidem

● Owo emi ekemede ndikot, ndiwet, ndinyụn̄ ntịn̄ Ikọmbakara edifọn edifọn

● Owo emi edide isua 19-35