Ukwọrọikọ Obio Ubọn̄ An̄wam Ndinyan̄a Uwem!
1 Enye edi ata akpan utom oro ẹnamde ke ererimbot idahaemi. Jehovah Abasi, Jesus Christ, ye akwa udịm mme angel ke ẹnọ enye ntịn̄enyịn. Nso ke enye edi, ndien ntak emi enye edide akpan n̄kpọ? Enye edi ukwọrọikọ Obio Ubọn̄, ndien enye an̄wam ndinyan̄a ediwak uwem!—Rome 1:16; 10:13, 14.
2 Ndusụk owo ẹkeme ndikere ke nnyịn imekeme ndin̄wam mbon efen nte ọfọnde edieke nnyịn ibuanade ke ndidomo ndinam ererimbot emi akande nnyịn okụk, ọfọn. Ediwak owo ẹsịn idem ofụri ofụri ke ukeme ndinyene emem, ndikọk udọn̄ọ, m̀mê ndimenede idaha ndutịm uforo. Ndien nso idinen̄ede in̄wam mme owo?
3 Ata Akpan Utom: Etop Obio Ubọn̄ kpọt anam se uduak uwem edide, ntak ndutụhọ ubonowo, ye n̄kukụre idotenyịn ini iso oro ẹkemede ndiberi edem, an̄wan̄a. Eti mbụk anam mme owo ẹkabade ẹdi mme ufan Jehovah ndien ke ntem ẹnyenede “emem Abasi, emi ayan̄ade ifiọk owo.” (Phil. 4:7) Etop Obio Ubọn̄ kpọt ọnọ eti ndausụn̄ ndin̄wam mme owo man ẹyọ mme mfịna uwem idahaemi onyụn̄ anam an̄wan̄a nte ẹkemede ndibọhọ ke ini ẹdisobode idiọk ererimbot emi ẹfep ke ini iso. (1 John 2:17) Nte oro idotke kpukpru ukeme oro nnyịn ikemede ndisịn ke ndikwọrọ Obio Ubọn̄?
4 Ke ndinam an̄wan̄a: Nso ikpedi mfọnn̄kan usụn̄ ndin̄wam mme owo oro ẹdede idap ke obio emi mmọn̄ ekperede nditọ mmen? Ndi ekpedi ndifop mmọn̄ oro? Ndidiọn̄ obio oro oyomde nditak do? Baba-o! Ẹnyene ndidemede mbio-obio oro ke idap, ẹnọ ntọt ẹban̄a afanikọn̄ oro edide, ẹnyụn̄ ẹn̄wam mmọ ẹfehe ẹbọhọ! Mbon oro ẹdede idap ke n̄kan̄ eke spirit mfịn ẹdu ke ata itiendịk. (Luke 21:34-36) Sia editịm n̄kpọ emi edibede efep ke mîbịghike, ẹyak nnyịn idomo ndikwọrọ ikọ usọp usọp nte ikekeme nnọ kpukpru owo!—2 Tim. 4:2; 2 Pet. 3:11, 12.
5 Sịn Ifịk Nam Enye: Ẹyak nnyịn iyom usụn̄ ndida eti mbụk nsọk ediwak mbon esịt akpanikọ efen efen—ke ufọk mmọ, ke efak, ke urụk ukopikọ, ye ke ido nneme. Utom oro Jehovah ọnọde nnyịn inam edi ata akpan utom oro nnyịn ikemede ndinam. Edieke nnyịn inamde enye ifịk ifịk, nnyịn ‘iyanyan̄a idem nnyịn ye mmọ eke ẹkopde uyo nnyịn.’—1 Tim. 4:16.