En̄wan Udịmekọn̄ Enan̄-Mbakara Oro Otụkde Fi
1, 2. Didie ke mme asan̄autom Abasi mfịn ẹbuana ke ndisu ntịn̄nnịm n̄kukụt eke Ediyarade 9:13-19?
1 “Ọyọhọ angel itiokiet ofri ukotowo.” Ke oro ebede, “udịm ekọn̄ eke ẹdorode ke enan̄-mbakara,” emi ibat mmọ edide “thousand duop ke itie thousand duop utịm ikaba,” ẹfiori ke ọkpọsọn̄ uyo. Emi idịghe ikpîkpu udịmekọn̄. “Ibuot mme enan̄ mmọ ẹbiet ibuot lion.” Ikan̄, nsụn̄ikan̄, ye brimstone ẹto ke inua mmọ ẹwọn̄ọ, ndien “isịm mmọ ẹbiet urụkikọt.” Ndamban̄a udịmekọn̄ enan̄-mbakara emi ayakama nsobo ke akpatre. (Edi. 9:13-19) Nte ọmọfiọk usụn̄ nte edisu n̄wọrọnda ntịn̄nnịm n̄kukụt emi otụkde fi?
2 Nsụhọ oro ẹyetde aran ye nsan̄a mmọ, mme erọn̄ en̄wen, ẹdiana kiet ke ndinam ẹfiọk ubiereikpe Abasi. Utịp edi nte ke ẹyarade n̄kpakpa idaha eke spirit oro Christendom odude an̄wan̄wa. Ẹyak idụn̄ọde ikpehe iba ke ntịn̄nnịm n̄kukụt oro, emi ẹwụtde ntak emi utom ukwọrọikọ emi mme asan̄autom Abasi ẹnamde enen̄erede enyene uforo.
3. Nso ukpep ke afo ọbọ man atan̄a etop Abasi uforo uforo?
3 Ẹnọ Ukpep Ẹnyụn̄ Ẹtịm Mmọ Idem Nditan̄a Etop Abasi: Ebede ke Ufọkn̄wed Utom Ukara Abasi ye mme mbono esop eken, ẹmenọ mme asan̄autom Abasi ukpep nditan̄a etop Abasi nte mbon oro ẹnyenede odudu. Ke ẹkpebede Jesus ye mme mbet esie, mmọ ẹyom mbon oro ẹdotde, ẹnyụn̄ ẹkwọrọ ikọ ke ebiet ekededi oro ẹkemede ndikụt mme owo. (Matt. 10:11; Mark 1:16; Luke 4:15; Utom 20:18-21a) Usụn̄ ukwọrọikọ oro ọkọn̄ọde ke Bible mi enyene uforo didie ntem!
4. Mme n̄kpọutom ewe ẹdu ẹnọ ediwak mme asuanetop ndida nnam utom ukwọrọikọ?
4 Mme Christian asan̄autom ẹmesuan ediwak biliọn Bible, n̄wed, ndiye uduot n̄kpri n̄wed, ye mme magazine ke adan̄aemi ẹnamde utom ukwọrọikọ oro Abasi ọdọn̄de mmọ. Ẹsion̄o mme n̄wed emi ke se ikperede ndisịm usem 400, mmọ ẹneme nsio nsio ibuotikọ ẹnyụn̄ ẹneme n̄kpọ ke usụn̄ oro edemerede nsio nsio owo udọn̄. Nte afo ke ada mme n̄kpọutom emi anam n̄kpọ uforo uforo?
5, 6. Nso iwụt ke Jehovah ọnọ ikọt esie ibetedem?
5 Ndausụn̄ ye Ibetedem Ẹtode Heaven: Ntịn̄nnịm n̄kukụt oro anam an̄wan̄a n̄ko ke Abasi ọnọ ibetedem ke utom oro ndamban̄a udịmekọn̄ enan̄-mbakara ẹnamde. (Edi. 9:13-15) Idịghe odudu m̀mê ọniọn̄ owo ke ẹda ẹnam utom ukwọrọikọ ofụri ererimbot emi, edi ẹda spirit Abasi. (Zech. 4:6) Jehovah ada mme angel ọnọ utom emi ndausụn̄. (Edi. 14:6) Ntem, ke adianade ye mme ukeme emi mme Ntiense esie ke isọn̄ ẹsịnde, Jehovah ọnọ ikọt esie ibetedem man odụri mbon nsụkidem ada.—John 6:45, 65.
6 Sia ẹnọde mmọ ukpep, ẹnen̄ede ẹtịm mmọ idem nditan̄a etop Abasi, mmọ ẹnyụn̄ ẹnamde utom ke idak ndausụn̄ mme angel, owo ikemeke ndibiọn̄ọ ikọt Jehovah. Ẹyak nnyịn ika iso ndinam udeme nnyịn ke ndisu aduai-owo-idem ntịn̄nnịm n̄kukụt emi.