Ukpepn̄kpọ N̄wed Esop—Ntak Emi Iyomde Enye
1. Didie ke ndutịm Ukpepn̄kpọ N̄wed Esop ọkọtọn̄ọ?
1 Ke 1895, ẹkedidiọn̄ọ otu Nditọ Ukpepn̄kpọ Bible, nte ẹkesikotde Mme Ntiense Jehovah ini oro, nte Otu Usiere Ukpepn̄kpọ Bible (Dawn Circles for Bible Study). Ẹkesikpep mme Eboho Millennial Dawn. Nte ini akakade, ẹkedikot mme mboho emi Otu Ukpep Bible Mbon Beroea. (Utom 17:11) Ediwak ini, ekpri otu ẹsịnede owo ifan̄ kpọt ẹkesisobo ke ufọk owo ke mbubịteyo oro ọfọnde ye mmọ. Mme mboho emi ẹkebem Ukpepn̄kpọ N̄wed Esop iso.
2. Didie ke nnyịn ikeme nditịp n̄kpọ nsịn ke ‘edidọn̄ kiet eken esịt’ ke ukpepn̄kpọ n̄wed?
2 Nsịnudọn̄ ye Un̄wam: Sia ẹnamde mme otu ukpepn̄kpọ n̄wed ẹdi n̄kpri n̄kpri, akwa ifet odu ọnọ mbon oro ẹdụkde ndida mme ibọrọ mmọ nyarade mbuọtidem mmọ. Utịp edi nte ke ‘ẹsida mbuọtidem edem mbiba ẹdọn̄ kiet eken esịt.’—Rome 1:12.
3, 4. Didie ke ndutịm ukpepn̄kpọ n̄wed an̄wam nnyịn ndinam utom nnyịn mma?
3 Ndise nte esenyịn ukpepn̄kpọ n̄wed ọnọde ukpep ekeme ndin̄wam nnyịn ‘nditịm nsiak ikọ akpanikọ.’ (2 Tim. 2:15) Tịm se nte enye odoride nsọn̄uyo ke itie N̄wed Abasi emi ukpepn̄kpọ oro ọkọn̄ọde. Edieke odotde ye n̄wed oro ẹkpepde, enye ekeme ndida Bible kpọt nsio mme akpan n̄kpọ n̄wụt ke anamde ndụn̄ọde ke utịt ukpepn̄kpọ. Eti uwụtn̄kpọ esie ekeme ndin̄wam nnyịn ndinam n̄kọri ke unọ ukpep nnyịn ke utom ukwọrọikọ Christian.—1 Cor. 11:1.
4 Ke adianade ye ndinịm ukpepn̄kpọ eke urua ke urua, esenyịn ukpepn̄kpọ n̄wed esida usụn̄ ke utom ukwọrọikọ. Enye esidiana ye esenyịn utom anam ndutịm oro odotde ọnọ utom an̄wautom. Enye esiyom ndin̄wam kpukpru mbon oro ẹdude ke otu oro ndibiom mbiomo Christian mmọ eke edikwọrọ eti mbụk ye edinam mbet.—Matt. 28:19, 20; 1 Cor. 9:16.
5. Ọkpọkpọ un̄wam ewe ke ẹsinọ ke ukpepn̄kpọ n̄wed?
5 Esenyịn ukpepn̄kpọ n̄wed enyene udọn̄ ke mfọnọn̄kpọ eke spirit owo kiet kiet ke otu oro. Enye esiwụt udọn̄ emi ke mme mbono esop ye ke ini enye asan̄ade ye mbon eken ke an̄wautom. Enye n̄ko esida ini oro enye esikade ekese nditọete ke ufọk mmọ ndinọ enọ eke spirit. Akpana kpukpru owo ẹnyene ifụre ndika mbịne esenyịn ukpepn̄kpọ n̄wed n̄koyom un̄wam eke spirit ini ekededi oro mmọ ẹyomde un̄wam.—Isa. 32:1, 2.
6. (a) Didie ke mme mbono esop oro ẹdụkde ke n̄kpri otu ẹkesọn̄ọ nditọete nnyịn idem ke ndusụk idụt? (b) Didie ke afo ọbọ ufọn oto ndutịm ukpepn̄kpọ n̄wed?
6 Ẹsọn̄ọ Kiet Eken Idem: Ke mme idụt oro ẹdoride ukpan ke utom ikọt Abasi, nditọete do ẹsiwak ndisop idem ke n̄kpri otu. Eyenete kiet ama eti ete: “Kpa ye oro ẹkedoride ukpan ke mme utom Christian nnyịn, ini ekededi oro ikekemede, nnyịn ima isinịm mme mbono esop nnyịn eke urua ke urua ke otu oro edide owo 10 m̀mê 15. Ke mme mbono esop emi, nnyịn ima isinyene ukeme eke spirit ito ukpepn̄kpọ Bible nnyịn ye ebuana nnyịn ke ini ukpepn̄kpọ asuanade. Nnyịn ima isibuana ifiọkutom nnyịn ye kiet eken, ndien emi ama an̄wam nnyịn ndifiọk nte ke nnyịn owo kiet kiet ikenyene ndiyọ ukem n̄kpọ.” (1 Pet. 5:9) Ukem ntre, ẹyak nnyịn isọn̄ọ kiet eken idem ebe ke ndibere ọyọhọ ọyọhọ ye ndutịm Ukpepn̄kpọ N̄wed Esop.—Eph. 4:16.