Nyene Edu Usiakusụn̄
1. Didie ke afo akpanam edu usiakusụn̄ an̄wan̄a?
1 Edide mmọ ẹkeme ndinam utom nte mme asiakusụn̄ idahaemi m̀mê ikemeke, kpukpru mme asuanetop Obio Ubọn̄ ẹkeme ndinyene edu usiakusụn̄. Ewụhọ oro ẹkenọde ẹte ẹkwọrọ ikọ ẹnyụn̄ ẹnam mbet enen̄ede ebehe mmọ. (Matt. 28:19, 20; Utom 18:5) Mmọ ẹkere ẹban̄a mme owo ẹnyụn̄ ẹnam ekese n̄waidem ndinam utom ukwọrọikọ mmọ. (Matt. 9:36; Utom 20:24) Mme asan̄autom Jehovah ẹben̄e idem ndinam sededi oro ẹyomde man ẹn̄wam mbon en̄wen ẹkpep akpanikọ. (1 Cor. 9:19-23) Yak ineme uwụtn̄kpọ owo kiet emi ekenyenede utọ edu oro, kpa Philip ọkwọrọ ikọ.
2. Didie ke mbiowo ye mme asan̄autom unamutom ẹkeme ndikpebe ifịk Philip ke utom ukwọrọikọ?
2 Edikwọrọ Ikọ ye Edikpep Owo N̄kpọ: Philip ama akama mme akpan ifetutom ke esop akpa isua ikie. (Utom 6:1-6) Kpa ye oro, enye ekenen̄ede edi ifịk ifịk andikwọrọ gospel. (Utom 8:40) Ntre mfịn, ke adan̄aemi ẹsede ẹban̄a mme mbiomo mmọ, mbiowo ye mme asan̄autom unamutom ẹkeme ndiwụt edu usiakusụn̄ ebe ke ndida usụn̄ ke utom ukwọrọikọ ye nduaidem. Emi esidemede spirit esop didie ntem!—Rome 12:11.
3. Didie ke ikeme ndiwụt edu usiakusụn̄ ke ini isobode idomo?
3 Ke Stephen ama akakpa, ọkpọsọn̄ ukọbọ ama etịmede uwem mme mbet etieti. Nte ededi, Philip ama aka iso ndikwọrọ ikọ, ndien enye ama enen̄ede etịp esịn ke owo nditọn̄ọ utom ke otu mbon Samaria. (Utom 8:1, 4-6, 12, 14-17) Nnyịn imekeme ndikpebe uwụtn̄kpọ esie ke ndika iso nnam ẹfiọk eti mbụk ke adan̄aemi iyọde idomo ye ke ini ikwọrọde ikọ ye unana asari inọ kpukpru mbon oro isobode.—John 4:9.
4. Nso uwụtn̄kpọ ke Philip ekenịm nte andikpep?
4 Ẹkeme ndikụt usọ Philip nte andikpep Ikọ Abasi ke mbụk aban̄ade Eunuch owo Ethiopia oro akakabarede esịt. (Utom 8:26-38) Nnyịn ndikọri ukeme edida Bible nnam n̄kpọ nnyụn̄ ‘nda n̄wed Abasi mbuen ikọ’ edi usụn̄ en̄wen emi nnyịn iwụtde edu usiakusụn̄. (Utom 17:2, 3) Ukem nte Philip, nnyịn iyom ndibuana eti mbụk ke ebiet ekededi oro isobode mme owo ye ke kpukpru idaha oro ẹdotde.
5. Nso ikeme ndin̄wam mme ete ye eka ẹdide mme Christian ndisịn edu usiakusụn̄ ke esịt nditọ mmọ?
5 Ubon ye Esop: Nte eyịghe mîdụhe, eti uwụtn̄kpọ ye edu Philip ẹma ẹbe nditọ esie. (Utom 21:9) Ukem ntre, mme ete ye eka ẹdide mme Christian emi ẹsịnde ofụri uwem mmọ ke mme ufọn n̄kpọ Obio Ubọn̄ ẹsịn udọn̄ ẹnọ nditọ mmọ ndinam ukem oro. Okposụkedi ekemede ndikpa mba ke ntak akanamde ekese ofụri urua oro, ete m̀mê eka emi esikopde inem ndikwọrọ ikọ nnọ mbon efen ekeme ndinen̄ede ntụk esịt eyen esie.—N̄ke 22:6.
6. Didie ke ikeme ndiwụt esịtekọm mban̄a mme asiakusụn̄ oro ẹdude ke esop nnyịn?
6 Philip ama akama Paul ye Luke isen, kpa ifịk ifịk mme Christian oro ẹkesịnde idem ke utom Jehovah. (Utom 21:8, 10) Didie ke nnyịn ikeme ndiwụt esịtekọm nnọ nnyụn̄ nsịn udọn̄ nnọ mbon oro ẹnyenede ifịk mfịn? Ekeme ndidi imekeme ndidiomi ndisan̄a ye mme asiakusụn̄ ke usenubọk m̀mê uwemeyo ke mme usen emi ibat ibat owo ẹsiwọrọde an̄wautom. (Phil. 2:4) Nnyịn n̄ko imekeme ndikot mmọ ẹdi ufọk nnyịn ẹdinyene ebuana oro ọbọpde-bọp. Se ededi oro idaha nnyịn edide, yak kpukpru nnyịn idomo ndinyene edu usiakusụn̄.