N̄wam Mbon Efen Ẹbọ Ufọn Ẹto Ufak
Ẹdinịm Editi N̄kpa Christ ke April 12
1. Nso idi usụn̄ kiet oro ikọt Abasi ẹwụtde esịtekọm ẹban̄a ufak?
1 “Ekọm enyene Abasi ke ntak enọ mfọn esie oro owo mîkemeke ndibụk.” (2 Cor. 9:15) Mme ikọ emi ẹnen̄ede ẹwụt nte nnyịn idade eti ido ye ima-mfọnido oro Abasi adade Eyen esie, Jesus Christ, owụt ikọt esie. Nnyịn iyenen̄ede iwụt utọ esịtekọm oro ke ini ibohode ọtọkiet ke April 12 man inịm Editi n̄kpa Christ.
2. Mmanie ẹsitiene mme asan̄autom Jehovah ẹdụk Editi, ndien nso ke oyom mmọ ẹnam man ẹbọ ufọn ẹto ufak?
2 N̄kpọ nte owo miliọn duop ẹsitiene mme asan̄autom Jehovah ẹdụk Editi ke isua ke isua. Mmọ ndinam ntre owụt esịtekọm oro mmọ ẹnyenede ẹban̄a uwa Christ. Nte ededi, ana mmọ ẹnyene mbuọtidem man ẹbọ ufọn ẹto ufak. (John 3:16, 36) Didie ke nnyịn ikeme ndin̄wam mmọ ẹnyene utọ mbuọtidem oro? Nnyịn imekeme ndisịn udọn̄ nnọ mmọ ndinyene ọkpọkpọ ukpepn̄kpọ Bible nnyụn̄ ndụk mme mbono esop eke urua ke urua ke ini Editi emi. Kere ban̄a mme ekikere oro ẹtienede mi.
3. Didie ke ikeme nditọn̄ọ ukpepn̄kpọ Bible ke ini ikotde owo edidụk Editi?
3 Ukpepn̄kpọ Bible: Ke ini okotde mbon oro ẹnyenede udọn̄ edidụk Editi, ntak mûdomoke nditọn̄ọ ukpepn̄kpọ Bible ye mmọ ke n̄wed Bible Ekpep? Nam Editi an̄wan̄a owo oro ebe ke ndikụbọde n̄ka page 206-208 nnyụn̄ nneme ibuotikọ oro, “Udia Mbubịteyo Ọbọn̄—Edinam emi Ọnọde Abasi Ukpono.” Afo emekeme ndineme ibuotikọ emi inikiet m̀mê ikaba, iso-ọfọn ke ini enịmde ukpepn̄kpọ Bible ke enyịnusụn̄. Ke ama ekeneme ibuotikọ oro ama, ekeme ndidi owo oro ayama ndineme ibuot 5, “Ufak—Akakan Ẹnọ Abasi.” Ke owo emi enyịmede aka iso ekpep imọ Bible, tọn̄ọ ke akpa ibuot kpep.
4. Nnyịn ikpọtọn̄ọ ukpepn̄kpọ Bible ye mmanie ke ini Editi emi?
4 Nnyịn ikpada utọ usụn̄ emi itọn̄ọ ukpepn̄kpọ Bible ye mmanie? Ekeme ndidi ndusụk nsan̄autom, nsan̄a ufọkn̄wed, m̀mê mbọhọidụn̄ fo ẹyeyom enyene utọ nneme oro ye mmimọ. Nditọete iren ẹkeme ndika mbịne mme ebe oro mînịmke ke akpanikọ, emi iban mmọ ẹdude ke esop. Ti ndika mbịne mme iman fo oro mîdịghe Mme Ntiense. Ke adianade do, inyene ndisịn akpan ukeme n̄kot mbon oro ẹkesibuanade ye esop ifịk ifịk ini kiet ko ẹdi Editi. (Luke 15:3-7) Nnyịn ikpakam idomo ndin̄wam kpukpru utọ mbon oro ẹbọ ufọn ẹto ufak.
5. Didie ke nnyịn ikeme ndisịn udọn̄ nnọ nditọ ukpepn̄kpọ Bible ye mbon oro ẹnyenede udọn̄ ndidụk mme mbono esop eke urua ke urua?
5 Mme Mbono Esop: Editi edi akpa mbono esop oro ediwak nditọ ukpepn̄kpọ Bible ye mbon oro ẹnyenede udọn̄ ẹsidụkde. Didie ndien ke nnyịn ikeme ndisịn udọn̄ nnọ mmọ ẹbọ ufọn ẹto mme mbono esop eken? Utom Obio Ubọn̄ Nnyịn eke April 2005, page 8, ọnọ mme ekikere oro ẹtienede mi: “Siak ibuotikọ utịn̄ikọ an̄wa efen oro editienede. Wụt mmọ itie oro ẹdikpepde ke Ukpepn̄kpọ Enyọn̄-Ukpeme ye ke Ukpepn̄kpọ N̄wed Esop. Tịn̄ ban̄a Ufọkn̄wed Utom Ukara Abasi ye Esoputom. Ke ini afo enyenede n̄kpọ ndinam ke ufọkn̄wed emi, afo emekeme ndinam n̄wụt mmọ nte afo edinamde. Neme mme akpan n̄kpọ oro ẹkenemede ke mme mbono esop. Da mme ndise ke mme n̄wed nnyịn n̄wam mmọ ẹfiọk se isikade iso ke mme mbono esop emi. Tọn̄ọ ke akpa ukpepn̄kpọ kot mmọ ẹditiene ẹbuana ke mme mbono esop emi.”
6. Ewe usụn̄ iba ke nnyịn ikeme ndin̄wam mbon esịt akpanikọ ẹbọ ufọn ẹto ufak?
6 Ke ini ẹnịmde ukpepn̄kpọ Bible ye mbon esịt akpanikọ, mmọ ẹnyụn̄ ẹdụkde mme mbono esop kpukpru ini, mmọ ẹsisọp ẹnam n̄kọri ke n̄kan̄ eke spirit. Ke ntre, nnyịn ikpakam isịn udọn̄ inọ mbon efen ndibọ ufọn nto mme ndutịm eke spirit emi nnyụn̄ mbọ ufọn nto akakan ẹnọ Abasi emi edide ufak.