Ẹtiene Christ Ebe ke Ndinyene Uku
1. Nso ebuana ke ibuotikọ mbono isua emi enyene ye edinyene uku?
1 Bible ọdọhọ ke Jehovah, kpa Andikara Ekondo, esịne ubom, m̀mê uku, ke idem. (Ps. 104:1) Kpukpru ini, Jesus ekesitịn̄ ikọ onyụn̄ anam n̄kpọ ke usụn̄ oro okponode Ete esie onyụn̄ okponode mme ndutịm oro Abasi anamde. (John 17:4) Nnyịn owo kiet kiet iyenyene ifet ndikpebe Jesus ndinyụn̄ nnọ Jehovah ubọn̄ ke Mbono District “Ẹtiene Christ!” oro edide mi.
2. Didie ke nnyịn ndiben̄e idem ndidu ke ikpehe edinam kiet kiet ọnọ Jehovah ukpono?
2 Utuakibuot Oro Enyenede Uku: Nnyịn imekeme ndikpono Jehovah ebe ke ndinam ndutịm man idu inyụn̄ idia udia eke spirit oro enye anamde eben̄e nnyịn. Ndi ama eneme ye eteutom fo onyụn̄ anam ndutịm man ekeme ndidu ke usen mbita oro, esịnede Friday? Nte emeben̄e idem ndika ke eti ini man okoyom ebiet oro editiede onyụn̄ abuana ke ikwọ ye akam ediberede? Ndi amanam ndutịm aban̄a udia uwemeyo man ekpenyene se edidiade do ke itie mbono ye nditọete fo? Ke ini ikwọukwak ọtọn̄ọde ke ntọn̄ọ ikpehe edinam kiet kiet, etieibuot okpokoro onyụn̄ ọdọhọde iketie ke itie nnyịn, nnyịn ikpenyene ndisọsọp ntre nneme nnyụn̄ n̄ketetie mben̄e idem nnọ ndutịm oro oyomde nditọn̄ọ.
3. Didie ke ndikpan̄ utọn̄ nnọ ndutịm mbono anam utuakibuot nnyịn enyene uku?
3 Ndinọ ọyọhọ n̄kpan̄utọn̄ ke ndutịm oro ọnọ Ete nnyịn eke heaven ukpono n̄ko. Ewetmbụk n̄kpọntịbe kiet emi okodụkde mbono district ama ewet ete ke mme andida nse ẹma ẹma “eti edu uwem mme andidụk mbono; nte mmọ ẹketiede sụn̄ ẹtịm ẹkpan̄ utọn̄ ẹnọ se ẹketịn̄de, emi owụtde nte mmọ ẹmade mme n̄kpọ eke spirit.” Enye ama etịn̄ n̄ko ete ke “nditọwọn̄ ẹma ẹwak etieti . . . , kpukpru mmọ ẹkama idem ukpono ukpono, ẹnyụn̄ ẹkụbọde Edisana Bible mmọ ẹka mme ufan̄ikọ oro ẹsiakde.” Nte ededi, edi n̄kpọ mfụhọ nditịn̄ nte ke ndusụk itiembono isua oko, ẹma ẹkụt uyen ifan̄ nte ẹsan̄ade ke mme afan̄ ikọt ẹnyụn̄ ẹnamde mme ido eke mîdotke. Ẹma ẹkụt mbon en̄wen nte ẹmụmde owo oro mîdịghe nsan̄andọ mmọ ubọk ẹsan̄a, nte ẹkọn̄de kiet eken ubọk ke itọn̄, nte ẹnyụn̄ ẹwan̄de kiet eken ubọk ke isịn. Ido ntem iwụtke uku mme Christian. Ini emi ikpehe edinam osụk akade iso idịghe ini ndida nneme ikpîkpu nneme, ndida nnọ etop ke urụk ukopikọ, ndida ndia udia, m̀mê ndiyo ntre nsan̄a. Mme uyen ẹkpenyene nditie ye mme ete ye eka mmọ man mme ete ye eka ẹn̄wam mmọ ẹbọ ufọn ẹto ndutịm emi. (Deut. 31:12; N̄ke 29:15) Ndinam ntem oyowụt ke imokpono mbon en̄wen inyụn̄ iwụt esịtekọm inọ akpan udia eke spirit oro ẹnọde.
4. Ntak emi nnyịn ikpakamade idem nnyịn ke usụn̄ oro owụtde uku ke itie mbono?
4 Usịnen̄kpọ Oro Enyenede Uku: Ediwak owo ẹma ẹwụt esịtekọm ẹban̄a nte ẹkedade ibuotikọ emi, “Wụt Ukpono Nte Christian Kpukpru Ini,” ẹti mme owo nte ke akpana ikọt Abasi ẹdomo ndiwụt ukpono nte mme Christian ke usịnen̄kpọ ye ke ukamaidem mmọ. Ana ifiak itịm ikere iban̄a n̄kpọ emi n̄ko isua emi. Nte nnyịn ikamade idem nnyịn owụt nte ikerede iban̄a Jehovah ye ifet edidi Mme Ntiense esie. Nnyịn ikpenyene ndisịne n̄kpọ kpukpru ini “ke ido nte odotde [mbon] oro ẹdọhọde ke ikpono Abasi.”—1 Tim. 2:9, 10.
5. Didie ke ikeme ndikama idem nte odotde ke ini iduọkde odudu ke obio mbono?
5 Nte ikpakama idem ke usụn̄ oro owụtde uku ke ini idụkde mbono kpọt? Ti ete ke ediwak owo ẹyekụt nnyịn ye kad idiọn̄ọ mbono ke obio mbono oro. Ukamaidem nnyịn ekpenyene ndinam nnyịn inen̄ede ikpụhọde ikpọn̄ mbon ererimbot. Ke ntre, ọkpọkọm edi ke ini iduọkde odudu, utọ nte ke ini iwọrọde ika ndidia n̄kpọ ke mbono ama akasuana, nnyịn ikpenyene ndisịne n̄kpọ nte mme asan̄autom emi ẹdide ndidụk mbono ke obio oro, ikponyụn̄ isịneke jeans, ibio ọfọn̄ukot, m̀mê T-shirt. Ndisịne n̄kpọ nte odotde eyenen̄ede ọnọ mme andidụn̄ ke n̄kann̄kụk oro ikọ ntiense. Esịt esinem Jehovah ke ini nnyịn ikamade idem nte mme asan̄autom esie.
6. Nso idi mme ufọn edinyene uku nte mme Christian?
6 Nti Utịp: Ndinyene uku nte mme Christian ke mme mbono nnyịn esinọ ifet ndinọ ikọ ntiense ido nneme, esinyụn̄ anam mbon oro ẹkụtde nnyịn ẹnyene eti ekikere. Ke mbono kiet ama akasuana, akwa owo ukara kiet ama ọdọhọ ete: “Akananam nnyịn ikwe mbon emi ẹnyenede utọ eti edu uwem ntem. Mbufo ẹtie nte Abasi oyomde nnyịn itie.” Ndinyene uku owụt ke imokpono inyụn̄ ima kiet eken, ndien emi esinọ Jehovah ubọn̄. (1 Pet. 2:12) Enye owụt ke nnyịn imabak Abasi, inyụn̄ iwụt esịtekọm iban̄a ukpep oro Ete nnyịn ọnọde nnyịn. (Heb. 12:28) Nnyịn ikpakam idomo ndinyene uku nte nnyịn itiede ibet Mbono District “Ẹtiene Christ!” eke isua emi.
[Ekebe ke page 5]
Se Ẹtide Owo Ẹban̄a Mbono District
◼ Mme Ini Ndutịm: Ke usen mbita emi, ndutịm editọn̄ọ ke n̄kanika 9 usenubọk. Minit ifan̄ mbemiso ikpehe edinam ọtọn̄ọde, etieibuot okpokoro ikpehe edinam oro eyetie ke mbot utịn̄ikọ ke adan̄aemi ẹbrede ikwọ Obio Ubọn̄ ndida ntọn̄ọ. Kpukpru nnyịn ikpenyene ndidu ke itie nnyịn ini oro man ndutịm ekeme nditọn̄ọ ke ido nte eyede. Ke Friday ye Saturday, ẹdiberi ndutịm ke mbubịteyo ke n̄kanika ayakde minit 25 ndimia ition; ndien ke Sunday, ke ayakde minit 20 ndimia inan̄.
◼ Edimụm Itie Nnịm: Ẹmekeme ndimụm itie nnịm nnọ mbon oro mbufo ẹsan̄ade ke n̄kpọisan̄ kiet m̀mê mbon oro ẹdụn̄de ufọk kiet.
◼ Udia Uwemeyo: Mbọk ẹda udia uwemeyo ẹdi utu ke ndikpọn̄ itiembono man ẹkedep udia ke ini nduọkodudu uwemeyo. Ẹmekeme ndikama ekpri n̄kpọ udọn̄ udia emi ẹkemede ndinịm ke idak n̄kpọitie. Owo inyịmeke ẹmen ikpọ n̄kpọ udọn̄ udia, mme ọtọ-akpa, ye ọkpọsọn̄ mmịn ẹdụk efe mbono.
◼ Mme Etịbe: Ndidiomi mbono district esịne ekese ubiatokụk. Nnyịn imekeme ndiwụt esịtekọm ke ndinọ etịbe imaesịt kaban̄a utom ofụri ererimbot ke Ufọkmbono Obio Ubọn̄ nnyịn m̀mê ke itiembono. Ẹkpenyene ndiwet “Watch Tower,” ẹwetde nte ikọ iba, ke babru okụk ban̄k ekededi oro ẹnọde nte etịbe ke itiembono.
◼ Mme Mbabuat N̄kpọntịbe: Edieke oyomde ẹsọsọp ẹnọ owo usọbọ ke itiembono, mbọk ẹneme ye adaidaha oro odude ekpere, emi edisọpde an̄wam man ẹmen owo udọn̄ọ oro ẹka Itieutom Akpa Usọbọ oro mme ọnọ usọbọ emi ẹdotde, emi ẹdude ke itiembono ẹkemede ndise nte idem esie ọdiọkde eketre nnyụn̄ nnọ un̄wam.
◼ Ẹkpeme Nte Ẹwatde N̄kpọisan̄: Mbọk ẹkpeme nte ẹwatde n̄kpọisan̄ mbufo ẹnyụn̄ ẹkpono mbet uwat ke ini ẹkade m̀mê ẹnyọn̄de mbono. Mme Christian ẹda uwem nte edisana n̄kpọ, ntre mmọ ẹsinam kpukpru n̄kpọ ndikpeme enye. (Ps. 36:9) Nditọete oro ẹdotde ẹkpenyene ndidụri mme awat o-moto oro ẹkpede-kpe utọn̄ nnyụn̄ nsịn udọn̄ nnọ mmọ ẹwat sụn̄sụn̄ ẹnyụn̄ ẹtịn̄ enyịn ẹkpeme nte ẹwatde.
◼ N̄kpọ Umụmikọ: Owo ikpenyeneke ndida n̄kpọ umụmikọ ekededi mfak ke ikan̄ ilektrik m̀mê ke ndutịm ukwak utịn̄ikọ itiembono, edi ẹkeme ndikama enye n̄kukụre ke usụn̄ oro mîdifịnake mbon efen.
◼ Edisio Ndise: Edieke osiode ndise ke ini edinam osụk akade iso, kûdomo emịnen̄mịnen̄ ikan̄. Ikpowụtke ifiọk owo ekededi ndikpọn̄ efe mbono man okosio ndise ke ini edinam osụk akade iso. N̄ko, owo inyịmeke mme osio ndise, idem mbon emi ẹdide Mme Ntiense, ẹdụk ẹdi an̄wa mbono ẹdisio ndise.
◼ Babru Follow-Up: Ke ini ẹnyenede ikọ ntiense ido nneme ye owo ekededi oro owụtde udọn̄ ke ini mbono, ẹkpenyene ndida babru Please Follow Up (S-43) ntọt. Mme asuanetop ẹkpenyene ndida babru Please Follow Up kiet m̀mê iba ndi mbono. Babru oro oyodu n̄ko ke Itie Ubọ N̄wed ke an̄wa mbono. Ẹkeme ndikpọn̄ babru oro ẹwetde n̄kpọ ẹyọhọ nnọ Itie Ubọ N̄wed man mmọ ẹnam n̄kpọ ẹban̄a, mîdịghe ẹnọ ewetn̄wed esop ke ẹma ẹkefiak ẹnyọn̄ esop mbufo.
◼ Drama: Oyowụt ima edieke nditọete iban ẹtrede ndibọbọ ikpọ bọkịt ke uwemeyo Sunday ke ini drama, sia emi mîdiyakke mbon oro ẹtiede ke edem ẹkụt se ikade iso. Oyom ẹnam emi akpan akpan ke ntak ukeuke Ufọk Mbono ye mme Ufọkmbono Obio Ubọn̄ oro ẹsidade ẹnịm mbono n̄ko.
◼ Mme Ufọkidụn̄: Ke ẹsịmde itiembono, ẹwụt mbun̄wụm spirit ke ini ẹbọde ufọkidụn̄. Ẹkûdụn̄ ke mme dọmitri edieke Itieutom Unọ Ufọkidụn̄ mîdọhọke mbufo ẹdụn̄ do. Ẹdụn̄ ke ebiet oro ẹnọde mbufo. Isua oko, ẹma ẹkụt ndusụk iren ye iban ẹtiede ẹsịm ufọt okoneyo ke efe mbono, idem ẹnade do ẹde. Emi ifọnke. Inyụn̄ ifọnke nditọete iren ndidu nsịm ufọt okoneyo m̀mê ndide ke mme ufọkidụn̄ oro ẹnọde iban m̀mê iban ndinam ntre ke eke irenowo. Ẹtem udia n̄kukụre ke mme ebiet oro ẹnọde unyịme. Ke ini edem, ẹma ẹkụt ndusụk owo ẹtemde n̄kpọ ke ini ikpehe edinam osụk akade iso. Emi edi unana ediwụt esịtekọm nnọ mme n̄kpọ eke spirit.—Luke 10:38-42.