Ke Ini Mme Owo Mîdụhe ke Ufọk
1. Nso idi n̄kpọ-ata oro nnyịn isiwakde ndisobo ke ini ikwọrọde ikọ to ke enyịnusụn̄ sịm enyịnusụn̄?
1 Ke ediwak ebiet, ke enenen̄ede ọsọn̄ ndikụt mme owo ke ufọk. Ke “ndiọkeyo” emi, ediwak owo ẹnyene ndinam utom mbịghi man ẹkpenyene se ẹdade ẹdu uwem. (2 Tim. 3:1) Ndusụk owo ẹsiwọrọ ẹka ndidep n̄kpọ m̀mê ndibuana ke edinam ini nduọkodudu. Didie ke nnyịn ikeme ndikwọrọ eti mbụk nnọ utọ mbon oro?
2. Nso ke nnyịn inyene ndinam man ikpafiak ibịne mbon oro mîdụhe ke ufọk?
2 Wet Nịm: Akpa n̄kpọ edi ndiwet ebiet oro owo mîdụhe ke ufọk. Enen̄ede edi akpan n̄kpọ ndinam emi edieke ẹsikwọrọde efakutom mbufo kpukpru ini. Nte emesiwet enyịn̄ efak, nọmba efakutom, enyịn̄ fo, ye usenọfiọn̄? Emekeme ndinịm ufan̄ man ekpewet n̄kpọ efen efen ke ini afo m̀mê asuanetop efen afiakde aka mme ufọk oro owo mîkodụhe.
3. Nso idi ndusụk ekikere oro ẹnọde ẹban̄a nte ẹkpenamde mbon oro mîkodụhe ke ufọk ẹkop eti mbụk?
3 Fiak Ka Ini Efen: Ekeme ndidi mbon oro mîkodụhe ke ufọk ke ufọturua ẹyedu ke mbubịteyo m̀mê ke utịturua. Nte emekeme ndinam ndutịm ndifiak n̄ka ke ini oro ekemede ndikụt mme owo ke ufọk? (1 Cor. 10:24) Edieke mûkemeke, dọhọ asuanetop emi edikemede afiak aka mme ufọk oro owo mîkodụhe ke ini efen. Mîdịghe emekeme ndiwet leta nnọ ẹsọk mbon oro mîkodụhe ke ufọk. Ekeme ndidi mme asuanetop oro unana nsọn̄ọidem mîyakke mmọ ẹsikwọrọ ikọ to ke enyịnusụn̄ sịm enyịnusụn̄ kpukpru ini ẹyenem esịt ndin̄wam fi ndinam emi.
4. Nso iwụt ntak edide akpan n̄kpọ ndifiak n̄ka mbịne mbon oro mîkodụhe ke ufọk?
4 Enyene se iketịbede emi owụtde ntak edide akpan n̄kpọ ndidomo ndisobo ye mbon oro mîdụhe ke ufọk. Ke mme asuanetop ẹma ẹkesan̄a ke ufọk kiet ẹyom enyeneufọk ke isua ita, mmọ ẹma edikụt enye ke akpatre. Ke ofụri ini emi, enyeneufọk oro akakam etetie ebet mme Ntiense man akpafiak ọtọn̄ọ ukpepn̄kpọ Bible oro enye ekesinyenede mbemiso ọkọwọrọde edi efak oro.
5. Ini ewe ke ẹkeme ndidọhọ ke ẹkụre efakutom?
5 Kụre Efakutom Mbufo: Ini ewe ke ẹkeme ndidọhọ ke ẹkụre efakutom? Nte ido edide, ẹsikụre efakutom ke ẹma ẹkesịn ofụri ukeme ndisobo ye owo ke kpukpru ufọk. Ọkpọfọn ndiyak tract m̀mê akani magazine mfak ke ebiet oro ọfọnde ke mme ufọk oro owo mîdụhe, akpan akpan ke efakutom oro owo mîsisọpke ikwọrọ ikọ. Ndien ẹkpenyene nditọt asan̄autom esede aban̄a efakutom man enye ekpewet esịn ke n̄wed esie.
6. Ntak emi ikpodomode ndinam kpukpru owo ke efakutom nnyịn ẹkop eti mbụk?
6 Nnyịn iyom adan̄a ediwak owo nte ẹkekeme ẹnyene ifet ẹkpep ndikot enyịn̄ Jehovah ẹnyụn̄ ẹnyene edinyan̄a. (Rome 10:13, 14) Emi esịne mbon oro mîdụhe ke ufọk ke ini ikwọrọde ikọ ke ufọk ke ufọk. Ukem nte apostle Paul, biere “ndinọ ọyọhọ ikọ ntiense mban̄a eti mbụk mfọnido Abasi oro owo mîdotke.”—Utom 20:24.