Ẹka Iso ‘Ẹn̄wụm Ekese Mfri’
1 Jesus ama etịn̄ aban̄a idemesie ke ndamban̄a usụn̄ nte ata vine, Ete esie nte Ọtọin̄wan̄, ye mbet esie oro ẹyetde aran ke spirit nte mme n̄kọk vine oro ẹn̄wụmde mfri. Ke ini enye eketịn̄de aban̄a se Ọtọin̄wan̄ emi edinamde, Jesus ama owụt ke oyom n̄kọk vine ọsọn̄ọ eyịre ke vine. (John 15:1-4) Se ikpepde ito emi edi nte ke ana kpukpru mbon oro ẹnyenede ọkpọkpọ itie ebuana ye Jehovah ẹn̄wụm mfri nte n̄kọk “ata vine,” kpa Jesus Christ. Ana ika iso ision̄o “mbun̄wụm spirit” inyụn̄ in̄wụm mfri Obio Ubọn̄.—Gal. 5:22, 23; Matt. 24:14; 28:19, 20.
2 Mbun̄wụm Spirit: Nte ision̄ode mbun̄wụm spirit ekeme ndiwụt adan̄a nte inamde n̄kọri ke n̄kan̄ ke spirit. Ndi emesidomo ndision̄o mbun̄wụm spirit Abasi ebe ke ndikpep nnyụn̄ ntie n̄kere Ikọ Abasi kpukpru ini? (Phil. 1:9-11) Kûmen̄e ndibọn̄ akam mben̄e edisana spirit, emi ekemede ndinam enyene mme edu oro ẹnọde Jehovah ubọn̄ onyụn̄ aka iso anam n̄kọri ke n̄kan̄ eke spirit.—Luke 11:13; John 13:35.
3 Ndision̄o mbun̄wụm spirit ayanam nnyịn idi mme asan̄autom oro ẹnen̄erede ẹnyene ifịk. Ke uwụtn̄kpọ, ima ye mbuọtidem ẹsinam idedep ifet ito mme n̄kpọ eken man itiene ibuana kpukpru ini ke utom ukwọrọikọ. Emem, anyanime, mfọnido, ifụre ifụre ido, ye mfara ke idem ẹsin̄wam nnyịn ndinam n̄kpọ ke eti usụn̄ ye mme andibiọn̄ọ. Idatesịt esinam nnyịn ikop uyụhọ ke an̄wautom idem ke ini mme owo mîmaha ndikpan̄ utọn̄.
4 Mfri Obio Ubọn̄: Oyom in̄wụm mfri Obio Ubọn̄ n̄ko. Oro abuana ndiwa ‘uwa ekọm, kpa mfri n̄kpọkinua emi ẹdade ẹtan̄a enyịn̄ [Jehovah] an̄wan̄wa.’ (Heb. 13:15) Nnyịn imekeme ndinam emi ebe ke ndisịn ifịk n̄ka iso ntan̄a eti mbụk. Ndi ke odomo ndin̄wụm ediwak mfri Obio Ubọn̄ ebe ke ndinam n̄kọri ke utom ukwọrọikọ fo?
5 Jesus ama owụt ke mme anam-akpanikọ mbet imọ idin̄wụmke mfri ukem ukem. (Matt. 13:23) Mmọdo, ikpanaha nnyịn idomo idem nnyịn ye mbon en̄wen, edi ikpenyene ndisịn ofụri ukeme nnyịn ke utom Jehovah. (Gal. 6:4) Ndida Ikọ Abasi ndụn̄ọde idem nnyịn ke esịt akpanikọ ayanam ika iso inọ Jehovah ubọn̄ inyụn̄ ‘in̄wụm ekese mfri.’—John 15:8.