Nam Edi Utịtmbuba Fo Ndinịm Ukpepn̄kpọ Bible
1 “Ẹmenede enyịn ẹse in̄wan̄, ẹte n̄kpọ ẹdat se ẹkpen̄ede.” (John 4:35) Mme ikọ Jesus Christ emi ẹnen̄ede ekem ye idaha oro mme Christian ẹdude mfịn.
2 Ke ẹkụt mbon esịt akpanikọ emi ẹyomde ẹkpep mmimọ mme usụn̄ Jehovah. Se inamde ẹfiọk emi edi ibat mbufa mbet emi ẹsinịmde baptism kpukpru isua. Nso ke afo ekeme ndinam edieke enen̄erede ọdọn̄ fi ndinịm ukpepn̄kpọ Bible?
3 Nịm Utịtmbuba: Akpa kan̄a, nịm utịtmbuba nditọn̄ọ ukpepn̄kpọ Bible nnyụn̄ n̄ka iso nnịm enye kpukpru ini. Nyene utịtmbuba fo ke ekikere ke ini abuanade ke utom ukwọrọikọ. Sia utom Christian nnyịn abuanade edinọ ukpep ye edikwọrọ ikọ, kpukpru nnyịn ikpenyene ndiyom ndinam n̄kọri ke utom edikpep owo Bible.—Matt. 24:14; 28:19, 20.
4 Mme N̄kpọ Efen Oro Anade Ekere Aban̄a: Ana mme asuanetop Obio Ubọn̄ ẹsibọn̄ akam ke ofụri esịt. Ndusụk ini nnyịn imesisobo mme owo oro ẹkebọn̄de akam ẹyom un̄wam man ẹnyene ifiọk Abasi. Nso edidiọn̄ ke edi ntem Jehovah ndida nnyịn nyom mme utọ owo emi, nnyụn̄ nnọ mmọ ukpep!—Hag. 2:7; Utom 10:1, 2.
5 Eyenete an̄wan kiet ama ọbọn̄ akam oyom ukpepn̄kpọ Bible ndien ekem esibon tract oro Nte Afo Akpama Ndifiọk N̄kpọ Efen Efen Mban̄a Bible? ke itieutom esie. Ke n̄wan kiet emende kiet ke otu tract oro okot onyụn̄ oyomde ndiwet ndọhọ ẹdikpep imọ Bible, eyenete emi ama enyene nneme ye enye onyụn̄ ọtọn̄ọ ukpepn̄kpọ Bible.
6 Ekemmọ mme asuanetop emi ẹnyenede uforo ke nditọn̄ọ nnyụn̄ n̄ka iso nnịm mme ukpepn̄kpọ Bible ẹkeme ndin̄wam fi esịm utịtmbuba fo oro edide ndinịm ukpepn̄kpọ Bible. Bọn̄ akam ben̄e ukeme nditọn̄ọ ukpepn̄kpọ Bible, nyụn̄ da kpukpru un̄wam emi ẹnọde fi nam n̄kpọ man esịm utịtmbuba emi. Ibịghike ekeme ndidi afo eyenyene ukpepn̄kpọ Bible.