“Ẹnịm Idem Mbufo ke Ima Abasi”
1. Ntak emi ẹkesiode n̄wed “Ẹnịm Idem Mbufo ke Ima Abasi”?
1 Nnyịn ke itie ye ọkpọsọn̄ udọn̄ ibet ndikpep obufa n̄wed oro “Ẹnịm Idem Mbufo ke Ima Abasi” ke Ukpepn̄kpọ Bible Esop ọtọn̄ọde ke urua February 7. Leta oro Otu Ukara ekewetde ọnọ kpukpru mbon oro ẹmade Jehovah ekeberi ntem, ete: “Nnyịn imenen̄ede idori enyịn ke n̄wed emi ayan̄wam fi aka iso anam akpanikọ ke uwem fo man enịm idemfo ke ‘ima Abasi . . . ye idotenyịn ndinyene nsinsi uwem.’—Jude 21.”
2. Obufa n̄wed emi edin̄wam nnyịn ke mme ewe ikpehe ke uwem?
2 Se Idoride Enyịn Ndikụt: Didie ke mme edumbet Bible ẹnyene ebuana ke mme n̄kpọ ẹban̄ade nsan̄a, unọ idem inemesịt, ndikpono odudu ukara, ọkpọkpọ ido uwem, ndọ, nte ikpetịn̄de ikọ, ye mme ido edinam? Mme n̄kokon̄ idaha edinen ido oro ẹwụtde ke Ikọ Abasi ẹyenọ ubieresịt nnyịn ukpep. (Ps. 19:7, 8) Nte nnyịn ikade iso nditịm mfiọk usụn̄ ukeren̄kpọ Jehovah, udọn̄ oro nnyịn inyenede ndinem enye esịt ayanam nnyịn ikop uyo esie ke kpukpru ikpehe uwem nnyịn.—N̄ke 27:11; 1 John 5:3.
3. Ntak emi ikpesịnde ofụri ukeme nditiene mbuana ke ukpepn̄kpọ n̄wed emi kpukpru urua?
3 Biere Nditiene Mbuana: Nte afo etịmde idem ọnọ ukpepn̄kpọ emi, nam edi utịtmbuba fo nditoro Abasi ke mboho ikọt esie. (Heb. 13:15) Ofụri esop ẹdikpep obufa n̄wed ukpepn̄kpọ emi ọtọkiet. Sia mme ikpehe ekikere oro ẹdikpepde ke urua ke urua ẹdide mbio mbio, emi ayanam kpukpru nnyịn inen̄ede itịm idem, man ikeme ndibuana se ikpepde ye mbon en̄wen uko uko. Mbio mbio ibọrọ oro idade ini itịm ẹyedemede mbon efen ọnọ ima ye nti utom onyụn̄ anam ukpepn̄kpọ esịne ufiop, mme owo ẹnyụn̄ ẹbọ ufọn. (Heb. 10:24) N̄ko-n̄ko, iyenen̄ede ikop idatesịt ke ini nnyịn owo kiet kiet itịn̄de ikọ iban̄a mbuọtidem nnyịn.
4. Ntak emi oyomde inịm mme ewụhọ Jehovah?
4 Ke akpatre okoneyo oro Jesus okodude ke isọn̄, enye ama anam an̄wan̄a ete ke oyom ẹnịm mme ewụhọ Jehovah man ẹdu ke ima esie. (John 15:10) N̄wed “Ima Abasi” ayan̄wam nnyịn inen̄ede ibiere ndida mme edumbet Bible nsịn ke edinam ke uwem nnyịn eke usen ke usen, nnyụn̄ ‘n̄ka iso nnịm idem nnyịn ke ima Abasi.’—Jude 21.