Ẹsịn Ifịk Ẹkwọrọ Ikọ Ẹnọ Irenowo
1. Nso ke ẹnen̄ede ẹyom man ẹse ẹban̄a n̄kpọ Obio Ubọn̄?
1 Nte utom Obio Ubọn̄ akade-ka iso ndikọri ke mme akpatre usen emi, ẹnen̄ede ẹyom nditọete irenowo emi ẹdotde ndinọ ndausụn̄. (Mark 4:30-32; Utom 20:28; 1 Tim. 3:1-13) Edi, ke ndusụk ebiet iban ẹnyịme ndikop etop Obio Ubọn̄ ẹkan irenowo. Ke ndusụk obio, irenowo ẹyak mbiomo edikpep nditọ mmọ Ikọ Abasi ẹnọ iban. Didie ke nnyịn ikeme ndisịn udọn̄ nnọ irenowo ndikere mban̄a n̄kpọ Abasi nnyụn̄ ntiene nnyịn mbuana ke utuakibuot akpanikọ?
2. Didie ke ukeme oro Paul ye Peter ẹkesịnde ndinọ irenowo ikọ ntiense ẹkenyene nti utịp?
2 Ẹyom Irenowo: Ke ini ibuot ufọk enyịmede akpanikọ, enye esiwak ndinam mbon en̄wen ke ubon ẹdiana ye enye ke utuakibuot akpanikọ. Ke uwụtn̄kpọ, ke ini emi Paul ye Silas ẹkedude ke ufọk-n̄kpọkọbi ke ntak utom ukwọrọikọ mmọ, mmọ ẹma ẹkwọrọ ikọ ẹnọ ekpeme ufọk-n̄kpọkọbi. Ete oro ye ofụri ufọk esie ẹma ẹna baptism. (Utom 16:25-34) Ukwọrọikọ Paul ke Corinth akanam “Crispus akwa owo emi etiede ibuot ke synagogue akabade edi andinịm Ọbọn̄ ke akpanikọ, kpasụk ntre ye ofụri ufọk esie.” (Utom 18:8) Jehovah ama anam Peter ọkwọrọ ikọ ọnọ Cornelius, kpa akwa owoekọn̄ emi ẹdọhọde ke ekedi “owo emi eten̄ede Abasi onyụn̄ abakde Abasi.” Cornelius ye iman esie ye mme n̄kpet n̄kpet ufan esie ẹma ẹna baptism.—Utom 10:1-48.
3. Ukem nte Philip, mmanie emi ẹdude ke “ikpọ itie” ke afo ekeme ndikwọrọ ikọ nnọ?
3 Ndinọ irenowo emi ẹdude ke “ikpọ itie” ikọ ntiense ekeme ndinyene nti utịp. (1 Tim. 2:1, 2) Ke uwụtn̄kpọ, angel Jehovah ama ọdọhọ Philip etịn̄ ikọ ọnọ “akamba owo” emi ẹkesede aban̄a ofụri n̄kpọuto ọbọn̄ an̄wan mbon Ethiopia. Philip ama okop nte owo oro ‘okotde n̄wed prọfet Isaiah’ onyụn̄ anam eti mbụk oro aban̄ade Jesus an̄wan̄a enye. Owo Ethiopia emi ama akabade edi mbet, ndien etie nte enye ama asuan eti mbụk nte enye ọkọnyọn̄de obio emana esie. Ekeme ndidi enye ama onyụn̄ ọkwọrọ ikọ ọnọ ọbọn̄ an̄wan ye mbon oro ẹkedude ke ufọkubọn̄ esie, kpa mbon oro mîkpekenyeneke ifet ndikop eti mbụk.—Utom 8:26-39.
4. Didie ke nnyịn ikeme ndinọ irenowo ifet ndikop eti mbụk?
4 Nte Ẹkpekụtde Ediwak Irenowo: Sia irenowo ẹsiwakde ndidu ke itieutom mmọ uwemeyo, ndi emekeme ndidiomi ndisiwọrọ an̄wautom ediwak mbubreyo, ke mme utịturua, m̀mê ke mme ini nduọkodudu? Ndinam utom ndien ndien ke mme efakutom mbubehe ayanam fi ekeme ndikwọrọ ikọ nnọ irenowo emi mîsiwakke ndidu ke ufọk. Nditọete irenowo ẹkeme n̄ko ndinen̄ede nsịn ukeme ndinọ mme nsan̄autom mmọ emi edide irenowo ikọ ntiense ke ido nneme. Ke ini ẹkwọrọde ikọ ke ufọk ke ufọk, akpan akpan ke efakutom oro ẹsinamde utom ndien ndien, nditọete irenowo ẹkeme ndidọhọ ke iyom nditịn̄ ikọ ye ibuot ufọk.
5. Nso ke eyenete an̄wan akpanam ke ini enye okụtde erenowo oro enyenede udọn̄ ke etop Obio Ubọn̄?
5 Eyenete an̄wan emi okụtde erenowo emi enyenede udọn̄ ke akpanikọ inyeneke ndisan̄a ikpọn̄ mfiak n̄ka do. Enye ekeme ndisan̄a ye ebe esie m̀mê asuanetop efen. Nte owo emi anamde n̄kọri, ọkpọfọn ẹkpọn̄ ukpepn̄kpọ oro ẹnọ eyenete erenowo emi odotde.
6. Didie ke nnyịn ikeme ndikpebe apostle Paul man ‘ikpanyan̄a ata ediwak owo’?
6 Ẹmek Mme Ibuotikọ Oro Irenowo Ẹsimade: Apostle Paul ama esikere aban̄a otuowo esie onyụn̄ okpụhọde nneme esie man enye ‘akpanyan̄a ata ediwak owo.’ (1 Cor. 9:19-23) Kpasụk ntre, nnyịn ikpenyene ndikere m̀mê ewe ibuotikọ ke irenowo oro idisobode ẹdima inyụn̄ itịm idem ọfọn. Ke uwụtn̄kpọ, irenowo ẹsikere ẹban̄a nte n̄kpọ ọsọn̄de, eti ukara, ye ifụre ubon mmọ. Mmọ ẹkeme n̄ko ndinyene udọn̄ ke uduak uwem, ini iso ererimbot, ye ntak emi Abasi ayakde ndutụhọ odu. Edieke inemede mme utọ n̄kpọ emi, mmọ ẹyenen̄ede ẹma etop Obio Ubọn̄ oro ikwọrọde.—N̄ke 16:23.
7. Didie ke kpukpru owo ke esop ẹkeme ndin̄wam mme ebe oro mînịmke ke akpanikọ, emi ẹdụkde mbono esop?
7 Ẹdomo Ndin̄wam Mme Ebe Oro Mînịmke ke Akpanikọ: Ke adan̄aemi eti edu nditọete nnyịn iban esiwakde nditụk mme ebe mmọ oro mînịmke ke akpanikọ, nte mbon eken ke esop ẹnamde n̄kpọ ẹkeme n̄ko ndinyene eti utịp. (1 Pet. 3:1-4) Ke ini ebe oro mînịmke ke akpanikọ etienede n̄wan esie edi mbono esop, nte mme owo ke esop ẹkọmde enye ọyọnọ akwa ikọ ntiense. Enye ndidi owụt ke enye enyene udọn̄ ke akpanikọ, ndien enye ekeme ndinyịme ukpepn̄kpọ Bible.
8. Didie ke nditọete irenowo ẹkeme ndin̄wam mme ebe oro mînịmke ke akpanikọ oro ẹnyenede esisịt udọn̄ ke etop Bible?
8 Ndusụk ebe isisọpke inyene udọn̄ ke nneme Bible, edi nte ini akade mmọ ẹkeme ndinyịme owo emi mmọ ẹmade ekpep mmimọ Bible. Ke esop kiet, nditọete irenowo ẹma ẹsika ẹkese ubon oro ebe mîdịghe andinịm ke akpanikọ ẹsinyụn̄ ẹnyene nneme ye enye ẹban̄a mme n̄kpọ oro enye amade. Emi ama ada ekesịm ukpepn̄kpọ Bible, ndien ete oro ana baptism idahaemi. Ini efen, eyenete kiet ama an̄wam ebe oro mînịmke ke akpanikọ ọbọp ọkọ akanade ufọk esie. Utọ mfọnido emi ama anam ete oro enyịme enye esikpep imọ Bible. (Gal. 6:10; Phil. 2:4) Edieke afo edide eyenete erenowo, ntak emi mûdomoke ndisan̄a n̄kpere mme ebe oro mînịmke ke akpanikọ?
9. Nso utịp ke ẹkeme ndinyene edieke ẹnọde nditọete irenowo ukpep?
9 Ẹnọ Irenowo Ukpep Ẹban̄a Ini Iso: Irenowo oro ẹnyịmede etop Obio Ubọn̄ ẹnyụn̄ ẹnyanarede ẹbịne ifetutom ke esop Jehovah ẹkeme ndikabade ndi “enọ,” oro edi, mbiowo oro ẹdade ukeme ye odudu mmọ ẹnam ufọn ẹnọ ikọt Jehovah ke mme esop Christian. (Eph. 4:8; Ps. 68:18) Mme utọ irenowo oro ẹkpeme esop ke imaesịt, iyakke ẹnyenyịk mmọ. (1 Pet. 5:2, 3) Mmọ ẹdi ata edidiọn̄ ẹnọ ofụri otu nditọete.
10. Didie ke ukeme oro Ananias ekesịnde ndin̄wam Paul enyene ufọn ọnọ ediwak owo?
10 Ke uwụtn̄kpọ, Saul ama akabade edi “apostle [ọnọ] mme idụt,” kpa ye oro enye ekesikọbọde mme Christian. (Rome 11:13) Ke ntọn̄ọ, Ananias ikamaha ndikọkwọrọ ikọ nnọ Saul ke ntak emi. Edi Ananias ama okop uyo Ọbọn̄ onyụn̄ ọkọkwọrọ ikọ ọnọ Saul emi akakabarede edi apostle Paul. Ke ediwak isua oro ẹkebede, ukwọrọikọ Paul ama enyene ufọn ọnọ ediwak owo oro ẹkekopde, ndien ediwak miliọn owo ẹbọ ufọn ẹto mme leta esie oro ẹdọn̄ọde ke Bible.—Utom 9:3-19; 2 Tim. 3:16, 17.
11. Ntak emi ikpanamde ukpụhọde ekededi oro anade inam man ikeme ndikwọrọ ikọ nnọ irenowo?
11 Nnyịn ikpakam inam ukpụhọde ekededi oro anade inam man ikeme ndikwọrọ ikọ nnọ irenowo. Edieke inamde emi, imenyene mbuọtidem ke Jehovah ọyọdiọn̄ ukeme ofụri esịt oro isịnde ndinam uduak esie nnyụn̄ nse mban̄a mme n̄kpọ Obio Ubọn̄.