Ndi Emesịk Okwo Enịm?

Ndisịk nso nnịm? Ndiwet n̄kpọ nyọhọ kad DPA (durable power of attorney) emi ẹnọde Mme Ntiense oro ẹma ẹkena baptism. Sia ‘mûfiọkke se uwem fo edidide n̄kpọn̄,’ enen̄ede edi akpan n̄kpọ ndibem iso mbiere nnyụn̄ n̄wet orụk ibọk ye mme usụn̄ usọbọidem oro edinyịmede edieke ọdọn̄ọde. (Jas. 4:14; Utom 15:28, 29) Ẹsio vidio Transfusion-Alternative Health Care—Meeting Patient Needs and Rights man an̄wam fi. Se vidio emi edieke edide omokop Ikọmbakara, sia enye odu ke Ikọmbakara kpọt, ekem bọn̄ akam nyụn̄ da se idude ke idak emi dụn̄ọde se ekpepde.—Tịm fiọk: Sia vidio emi esịnede n̄kpri itie oro ẹsiakde owo idem, mme ete ye eka ẹkpenyene ndibiere m̀mê akpana iyak n̄kpri nditọ mmimọ ẹtiene ẹse vidio emi.

(1) Ndusụk mbiausọbọ ẹfiak ẹnam ndụn̄ọde ẹban̄a edisịn owo iyịp ke idem sia ediwak mbon udọn̄ọ imaha ẹsịn mmimọ iyịp. Mbiausọbọ emi ẹkpụhọ ekikere ke ntak mfịna oro edisịn iyịp esidade edi, ye ekọmurua iyịp. (2) Mbiausọbọ ẹkeme ndinam awak-n̄kukọhọ usiakidem ye unana edisịn owo iyịp ke idem. Nte ẹwụtde ke vidio oro, uwụtn̄kpọ awak-n̄kukọhọ usiakidem ita oro ẹkenamde ẹdi, edisiak nditọwọn̄ esịt, edisiak edidiana ekpa, ye edisiak owo idem nnen̄ede ọkpọ. (3) Se ibede mbiausọbọ ye mme asiak-owo-idem 100,000 ke idụt 150 ke ofụri ererimbot ẹnyịme ndisọbọ mbon udọn̄ọ ye unana edisịn mmọ iyịp ke idem. Ntak emi mmọ ẹnyịmede ndinam ntre? Man ẹwụt ukpono ẹnọ ubiere oro mbon udọn̄ọ ẹnamde.

(4) Ndụn̄ọde oro ẹnamde ke ufọkibọk ke ndondo emi owụt ke ekese mbon oro ẹsisịnde mmọ iyịp ke idem isinen̄ekede iyom iyịp. Ẹkụt ke idem esisọp ọsọn̄ ediwak mbon udọn̄ọ emi owo mîsisịnke iyịp akan mbon emi ẹsisịnde. (5) Ndusụk mfịna oro ẹsan̄ade ye edisịn owo iyịp ke idem esịne edimen n̄kpri unam udọn̄ọ ye ifọt udọn̄ọ, odudu editịbe ke idem owo ndisụhọde, ye ndudue oro mbiausọbọ ẹsinamde. (6) Ediwak mbiausọbọ ẹkụt ke ibọkusọbọ en̄wen oro ẹnọde utu ke edisịn owo iyịp ke idem emem urua onyụn̄ ọfọn ye mbon udọn̄ọ akan. Odot ẹtịm ẹfiọk ke ibọkusọbọ oro mîkamake afanikọn̄, emi ememde urua, onyụn̄ ọfọnde ye mbon udọn̄ọ mmọdo.

(7) Ẹdọhọ ke owo inyeneke iyịp edieke udọn̄ọ anamde ndatndat nsen iyịp esie osụhọde. Ndatndat nsen iyịp emi esimen eti ofụm oro ẹkotde oxygen asan̄a ke idem owo. Owo ekeme ndidu uwem mbịghi adan̄a didie edieke ananade iyịp? Owo oro mînyeneke iyịp ekeme ndidu uwem mbịghi n̄kan nte ẹkekerede ke akpa. Man udomo iyịp afiak ọdọk, mbiausọbọ ẹdọhọ ẹda ibọk emi ekemede ndinam udomo iyịp afiak ọdọk (blood volume expander). (8) Didie ke ẹkeme ndinam owo udọn̄ọ enyene ndatndat nsen iyịp? Ke ndida n̄kpọ emi esịnede iron. Ke ndusụk idaha, ibọk oro ẹkotde erythropoietin ekeme ndinam owo enyene udomo iyịp oro akpanade enye enyene. Ke ndusụk idụt, ẹsisịn n̄kpọ emi esibọkde obụkidem oro ẹkotde albumin emi ẹdade ẹto iyịp ke erythropoietin. Christian enyene ndida ubieresịt esie mmek m̀mê iyenyịme utọ usọbọ oro m̀mê idinyịmeke. (9) Mme usụn̄ usọbọidem ewe ke ẹsida ẹsụhọde uwọrọiyịp ke ini usiakidem? Edinen̄ede ntịn̄ enyịn ke ini usiakidem; edikama ikwa ilektrik; edinọ mme ibọk oro ẹsụhọrede uwọrọiyịp; ye edida masịn n̄kot iyịp oro ọwọrọde, ndụhọde, nnyụn̄ nnam afiak okodụk owo udọn̄ọ idem. Owo kiet kiet enyene ndida ubieresịt esie mbiere m̀mê ikpenyene ndibọ ibọk m̀mê usụn̄ usọbọidem emi.

(10) Nte ibọkusọbọ efen oro ẹnọde utu ke edikịm iyịp nsịn ke idem ẹkeme ndifọn ye n̄kpri nditọ m̀mê ye mme owo oro ẹsobode mbabuat idaha oro ẹkemede ndiwot mmọ? Ih. Vidio oro ama owụt eyen isua inan̄ oro akamanade ye ata idiọk ndo ke esịt, emi ẹkesiakde enye esịt ekese ini ye unana edisịn enye iyịp ke idem. Ke kiet ke otu ufọkibọk oro ẹsisede ẹban̄a mbon unọmọ ke United States, emi kpukpru isua ẹsisiakde ediwak Mme Ntiense Jehovah idem edi owo isịnke iyịp, etie nte ibat mbon oro ẹsikpan̄ade osụhọde. (11) Akpan edumbet ido uwem kiet oro aban̄ade eti ibọkusọbọ edi ndikpono unen oro owo udọn̄ọ enyenede ndinyịme m̀mê ndisịn ndusụk orụk usọbọ. Ntem, ọfọn mme Christian ẹbem iso ẹmek utọ usọbọ oro owo mîsịnke iyịp oro mmọ ẹdinyịmede.

Ndi emebiere ibọk ye usụn̄ usọbọidem oro afo ye nditọ fo ẹdinyịmede ndien ekem ewet n̄kpọ ọyọhọ kad DPA? Edieke oyomde ndifiọk se ẹnemede ọyọhọ ọyọhọ ẹban̄a n̄kpọ emi, tịm dụn̄ọde “Mme Mbụme Ẹtode Mme Andikot” ke nsiondi Enyọn̄-Ukpeme eke June 15, 2004, ye eke October 15, 2000, ye ibuot 7 ke n̄wed “God’s Love” ye mme n̄wed ndụn̄ọde oro ẹsiakde do. Se n̄ko esịne-esịt Utom Obio Ubọn̄ Nnyịn eke December 2006 oro “Didie ke N̄kpese N̄kpri N̄kpatan̄a N̄kpọ Emi Ẹdade Ẹto Iyịp ye Mme Usụn̄ Usọbọidem Oro Ẹbuanade Iyịp Mi?” Ke akpatre, kụt ete ke emewet se emekde nnennen nnennen esịn ke kad DPA. Ekpenyene ndisian owo oro emekde nte anditịn̄ ikọ ke ibuot fo ye mbonubon fo oro mîdịghe Mme Ntiense ofụri ofụri se idide ubiere fo.

[Ndise ke page 3]

• Ndi emebiere ibọk ye usụn̄ usọbọidem oro afo ye nditọ fo ẹdinyịmede?

• Ndi emesikama kad DPA oro ẹma ẹkewet n̄kpọ ẹyọhọ mbak ndusụk n̄kpọ etịbe?