Da Mbukpek Kpep Mme Owo N̄kpọ
1. Ndida Ikọ Abasi nnam n̄kpọ uforo uforo ke an̄wautom esibuana nso?
1 Ukem nte apostle Paul, mme asan̄autom oro ẹkụtde unen ẹfiọk ke ‘nditịm nsiak ikọ akpanikọ’ abuana se ikande editịn̄ se Edisana N̄wed Abasi etịn̄de. (2 Tim. 2:15) Ke ini inemede Ikọ Abasi, didie ke ikeme ndida “mbukpek” n̄kpep n̄kpọ?—Utom 28:23.
2. Didie ke ikeme ndinam mme owo ẹnen̄ede ẹkpono Ikọ Abasi?
2 Wụt Mme Owo Se Ikọ Abasi Ọdọhọde: Akpa kan̄a, dụri mme owo ntịn̄enyịn wụt Bible ke usụn̄ oro edinamde mmọ ẹkpono ẹnyụn̄ ẹfiọk ọniọn̄ Abasi oro odude ke Bible. Nnyịn ndibuọt idem ke se Ikọ Abasi etịn̄de ekeme ndinam owo oro itịn̄de ikọ inọ enen̄ede akpan̄ utọn̄ ke ini ikotde itie N̄wed Abasi. (Heb. 4:12) Imekeme ndidọhọ: “Mmokụt ke ọfọn ise nte Abasi ekerede aban̄a n̄kpọ emi. Tịm fiọk se Ikọ esie ọdọhọde mi.” Ini ekededi oro ekemede, wụt mme owo se Ikọ Abasi ọdọhọde ebe ke ndikot nnennen nto Bible.
3. Ke ẹma ẹkekot itie N̄wed Abasi, didie ke ikeme ndin̄wam owo oro itịn̄de ikọ inọ ọfiọk se itie N̄wed Abasi oro ọwọrọde?
3 Ọyọhọ iba, nam itie N̄wed Abasi oro okotde an̄wan̄a. Esisọn̄ ediwak owo ndifiọk se itie N̄wed Abasi ọwọrọde ke akpa ini oro ẹkotde. Esiyom iwụt nte itien̄wed oro ikotde enyenede ebuana ye se nnyịn inemede. (Luke 24:26, 27) Sio mme akpan n̄kpọ wụt. Ndibụp mbụme ekeme ndinam ẹfiọk m̀mê se ẹtịn̄de enen̄ede an̄wan̄a owo.—N̄ke 20:5; Utom 8:30.
4. Nso idi akpatre n̄kpọ oro oyomde inam man ikeme ndikpek mme owo ke ini ikpepde mmọ n̄kpọ?
4 Da Se N̄wed Abasi Etịn̄de Kọk Ibuot ye Mme Owo: Ọyọhọ ita, domo ndisịm esịt. N̄wam enyeneufọk okụt nte itien̄wed oro enen̄erede ebehe enye. Ndida N̄wed Abasi n̄kọk ibuot ekeme ndinam owo okpụhọde ekikere. (Utom 17:2-4; 19:8) Ke uwụtn̄kpọ, ke ima ikokot Psalm 83:18, imekeme nditịn̄ nte ndifiọk enyịn̄ owo ekemede ndinam mme owo ẹtọn̄ọ ndidi ufan. Ndien emekeme ndibụp ete, “Ndi emekere ke afo ndifiọk enyịn̄ Abasi ayanam mme akam fo enyene se ẹwọrọde?” Ke ini owụtde enyeneufọk nte itie N̄wed Abasi otụkde uwem esie, emi oyowụt ke itien̄wed oro enen̄ede enyene ufọn. Ndida Ikọ Abasi n̄kpek owo ntem anam mbon eti esịt ẹdi ẹdituak ibuot ẹnọ Jehovah, kpa Abasi uwem ye Abasi akpanikọ.—Jer. 10:10.