Ndi Se Nnamde Ekem?
1. Nso ye nso ikeme ndinam Christian oro anamde akpanikọ etịmede esịt?
1 Ndi akanam omobụp idemfo mbụme oro? Ekeme ndidi afo ukemeke ndinam aba kpukpru se ekesinamde ke an̄wautom ke ntak usọn̄, unana nsọn̄idem, m̀mê ke ntak emi esede aban̄a ekese n̄kpọ ke ubon, ndien emi anam idem emem fi. Eyenete an̄wan kiet emi enyenede nditọ ita ekewet ete ke esịt esibiom imọ koro ini ye odudu oro isidade ise iban̄a ubon isiyakke inen̄ede isịn idem ke utom ukwọrọikọ. Nso idin̄wam nnyịn inyene nnennen ekikere iban̄a n̄kpọ emi?
2. Nso ke Jehovah oyom oto nnyịn?
2 Se Jehovah Oyomde Oto Nnyịn: Edi akpanikọ ke kpukpru nnyịn ikpama ndinam ekese ke an̄wautom. Edi se ikpamade ndinam esiwak ndikpụhọde ye se ikemede ndinam. Nnyịn ndima ndinam ekese owụt ke imenyene udọn̄ ndinam n̄kọri. Ana iti ke Jehovah ọfiọk ukeme nnyịn ndien ke enye idọhọke nnyịn inam se nnyịn mîdikemeke ndinam. (Ps. 103:13, 14) Nso ke enye oyom oto nnyịn? Enye oyom nnyịn inam n̄kpọ imọ ke ofụri ukpọn̄, inam ofụri se nnyịn ikemede.—Col. 3:23.
3. Didie ke ikeme ndidụn̄ọde se inamde ke an̄wautom?
3 Nso idin̄wam nnyịn ifiọk se idide ofụri ukeme nnyịn? Imekeme ndidọhọ Jehovah an̄wam nnyịn inen̄ede ifiọk se ikemede ndinam. (Ps. 26:2) Imekeme n̄ko ndibụp eyenete oro edide ata ufan nnyịn, emi ọkọride esịm ọyọhọ idaha, oro ikemede ndiberi idem, emi enen̄erede ọfiọk nte isinamde n̄kpọ, edinyụn̄ amade ndisian nnyịn m̀mê oyom inam ukpụhọde. (N̄ke 27:9) Ti n̄ko ete ke sia edide mme n̄kpọ ẹkeme ndikpụhọde, ọkpọfọn isidụn̄ọde idaha nnyịn ke ini ke ini.—Eph. 5:10.
4. Didie ke ikpese mme n̄kpọ oro ẹdade Bible ẹti nnyịn ẹban̄a utom nnyịn?
4 Nte Ikpesede Mme N̄kpọ Oro Ẹtide Nnyịn: Ke ini mme owo ẹfehede mbuba itọk, mme ndanse ẹsikpọk ukịbe. Ẹsinam emi man ẹn̄wam mbon oro ẹfehede mbuba oro ẹfehe ẹsịm utịt, utu ke ndisasak mmọ. Kpasụk ntre, ikọ nsịnudọn̄ ye mme n̄kpọ oro ẹdade ke Bible ẹti nnyịn ke mme mbono esop ye mme n̄wed nnyịn ẹte ‘isịn ifịk ikwọrọ ikọ’ ẹdi ke ufọn nnyịn, iwọrọke ke se nnyịn inamde ikemke. (2 Tim. 4:2) Imekeme nditịm nnịm ke Jehovah ọyọdiọn̄ nnyịn ke ntak ‘ima ye utom nnyịn,’ ke adan̄aemi idomode ndinam ofụri se ikemede.—Heb. 6:10.