N̄kpọ Ẹdat Se Ẹkpen̄ede ke In̄wan̄
1. Nso akpan utom ke ẹnam idahaemi?
1 Ke Jesus ama ọkọkwọrọ ikọ ọnọ n̄wan Samaria ama, enye ọdọhọ mme mbet esie ete: “Ẹmenede enyịn ẹse in̄wan̄, ẹte n̄kpọ ẹdat se ẹkpen̄ede.” (John 4:35, 36) Ukpen̄e m̀mê idọk eke spirit ama ọtọn̄ọ, ndien Jesus ama ọfiọk ke ẹyenam utom emi ke ofụri ererimbot. Kpa ye oro Jesus odude ke heaven idahaemi, enye ke enyenyene ubọk ke utom emi. (Matt. 28:19, 20) Nso iwụt ke utom emi ke osụk okpokpon nte enye ekperede utịt?
2. Nso iwụt ke utom idọk ofụri ererimbot ke osụk okpokpon?
2 Utom Idọk Ofụri Ererimbot: Ke isua utom 2009, nnyịn ima inyene mbufa mme asuanetop 188,730 ke ofụri ererimbot. Mme idụt oro ẹkpande utom nnyịn ẹma ẹnyene n̄kọri ẹsịm mbahade 14 ke itie ikie. Ibat ukpepn̄kpọ Bible oro ẹketọtde ke ọfiọn̄ ke ọfiọn̄ ama ebe 7,619,000—emi ama awak akan n̄wakn̄kan ibat mme asuanetop ke ofụri ererimbot, onyụn̄ ada n̄kpọ nte 500,000 awak akan ibat ukpepn̄kpọ Bible oro ẹkenịmde ke 2008. Nte utom atarade usọp usọp ke ediwak ebiet, ntre ke ẹnen̄ede ẹyom mme isụn̄utom emi ẹma ẹkeka Ufọkn̄wed Gilead ye mbon oro ẹkekade Ufọkn̄wed Unọ Mme Asan̄autom Ukpep. Ke nsio nsio idụt, utom ukwọrọikọ ke on̄wụm mfri ke mme efakutom emi ẹsemde usem en̄wen. Imenen̄ede ikụt ke Jehovah ke anam utom emi awara ke akpatre ini idọk emi. (Isa. 60:22) Ndi emenyene in̄wan̄-in̄wan̄ edu aban̄a efakutom mbufo?
3. Nso ke ndusụk owo ẹkeme nditịn̄ mban̄a idọk ke efakutom mmọ?
3 Ukpen̄e ke Efakutom Mbufo: Ndusụk owo ẹkeme ndidọhọ, “Efakutom mi inen̄ekede in̄wụm mfri.” Edi akpanikọ, etie nte ndusụk efakutom in̄wụmke mfri nte ndusụk, m̀mê nte ẹkesin̄wụmde mbemiso. Mmọdo, ndusụk Mme Ntiense ẹkeme ndidọhọ ke ẹkpere ndidọk n̄kpọ mma ke mme ebiet emi, ntre ke se isụhọde edi ndisan̄a nyom ọkpọ owo ifan̄ oro ẹsụhọde. Ndi ntre ke edi?
4. Nso edu ke ikpenyene iban̄a utom ukwọrọikọ, ndien ntak-a?
4 Ini idọk esidi ini ọkpọsọn̄ utom, ọtọn̄ọde ke ntọn̄ọ tutu esịm utịt. Kop se Jesus eketịn̄de ndiwụt ke oyom ẹsọsọp ẹnam utom emi: “Idọk okpon, edi mme anamutom iwakke. Mmọdo, ẹben̄e Enyene idọk ẹte osio mme anamutom ọnọ ẹdi ke idọk esie.” (Matt. 9:37, 38) Jehovah emi edide Enyene idọk, edibiere ini ye ebiet emi in̄wan̄ adatde se ẹkpen̄ede. (John 6:44; 1 Cor. 3:6-8) Nso ndien idi utom nnyịn? Bible ọbọrọ ete: “Suan n̄kpasịp fo ke usenubọk; kûnyụn̄ ufara ubọk fo ke mbubreyo.” (Eccl. 11:4-6) Ih, ini emi idọk ekperede utịt idịghe ini emi ikpafarade ubọk!
5. Ntak emi ikpakade iso isịn ifịk ikwọrọ ikọ ke efakutom emi etiede nte in̄wụmke mfri?
5 Ka Iso Ndikpen̄e: Idem ọkpọkọm imesinam utom ndien ndien ke efakutom nnyịn mîdịghe etie nte ke mme owo inọhọ n̄kpan̄utọn̄, imenyene eti ntak ndinam utom ifịk ifịk ye usọp usọp. (2 Tim. 4:2) Mme n̄wọrọnda ukpụhọde ke ererimbot ẹnam mme owo ẹkpụhọde edu mmọ ẹnyụn̄ ẹnen̄ede ẹkere ẹban̄a ini iso. Nte mme uyen ẹkponide, ekeme ndidọn̄ mmọ ndinyene emem ye ifụre. Mbon en̄wen ẹkeme n̄ko nditọn̄ọ ndikpan̄ utọn̄ nnọ nnyịn edieke ikade iso ikwọrọ ikọ. Idem mbon oro mîkesimaha ndikop ukwọrọikọ nnyịn ẹkeme nditọn̄ọ ndikop ndien. Ana ẹdụri mbon oro ẹkoide-koi ẹtre ndikop etop nnyịn utọn̄.—Ezek. 2:4, 5; 3:19.
6. Nso idin̄wam nnyịn isịn ifịk inam utom ukwọrọikọ idem ọkpọkọm mme owo imaha ndikpan̄ utọn̄ ke efakutom nnyịn?
6 Nso idin̄wam nnyịn ika iso isịn ifịk idem ọkpọkọm owo imaha ndikpan̄ utọn̄ ke efakutom nnyịn? Ke ẹsiode edikwọrọ ikọ ke ufọk ke ufọk ẹfep, ọkpọfọn iyom mme usụn̄ en̄wen ndida n̄kwọrọ ikọ, utọ nte edikwọrọ ikọ ke mme itie mbubehe, m̀mê ke telefon. Mîdịghe imekeme ndisikpụhọ ibuot nneme nnyịn man se itịn̄de enyene inem. Imekeme ndikpụhọde ndutịm nnyịn inyụn̄ iwọrọ an̄wautom ke mbubreyo m̀mê ke mme ini efen oro ikemede ndikụt mme owo ke ufọk. Mîdịghe imekeme ndikpep usem en̄wen man ikeme ndikwọrọ eti mbụk nnọ mbon en̄wen. Nnyịn imekeme nditat utom ukwọrọikọ nnyịn ke ndidụk utom usiakusụn̄ ofụri ini. Mîdịghe imekeme ndiwọrọ n̄ka ebiet emi mme anamutom idọk mîwakke. Edieke inyenede in̄wan̄-in̄wan̄ edu iban̄a utom idọk emi, nnyịn iyodomo ndisịn ofụri ukeme nnyịn nnam akpan utom emi.
7. Ini ewe ke idinam utom emi iketre?
7 Mme ọtọin̄wan̄ ẹsinyene ata esisịt ini ndida ndọk mbun̄wụm in̄wan̄ mmọ, ntre mmọ isisịnke ifu tutu idọk okụre. Kpasụk ntre ke oyom isịn idem inam utom idọk eke spirit. Ini ewe ke idinam utom emi iketre? Inyene ndika iso nnam enye ke “utịt editịm n̄kpọ emi,” tutu “utịt” edi. (Matt. 24:14; 28:20) Ukem nte Jesus, kpa akakan Asan̄autom Jehovah, nnyịn inyene ndinam utom emi ẹkenọde nnyịn mma. (John 4:34; 17:4) Ke ntre, ẹyak ika iso isịn ifịk inam utom ukwọrọikọ nnyịn idara idara ye in̄wan̄-in̄wan̄ edu tutu esịm utịt. (Matt. 24:13) Idọk ikụreke kan̄a!
[Se ẹwetde ke ikpọ abisi ke page 2]
Ini idọk esidi ini ọkpọsọn̄ utom, ọtọn̄ọde ke ntọn̄ọ tutu esịm utịt