Usen Ita Oro Ididade Ibọ Nduọkodudu Eke Spirit
1. Nso ke idori enyịn ndibọ ke mbono district isua emi?
1 Ke ererimbot Satan emi mme owo ẹkopde nsatitọn̄ ikọ Abasi mi, Jehovah ke aka iso ndinọ ikọt esie nduọkodudu. (Isa. 58:11) Ndutịm kiet oro Jehovah adade ọnọ nnyịn nduọkodudu edi mme mbono district eke isua ke isua. Nte mbono district eke isua emi asan̄ade ekpere, didie ke ikeme nditịm idem man ibọ nduọkodudu eke spirit inyụn̄ inam mbon en̄wen ẹbọ nduọkodudu emi?—N̄ke 21:5.
2. Mme ndutịm ewe ke oyom inam ikụre?
2 Edieke mûkanamke ntre kan̄a, tọn̄ọ idahaemi nditịm ọkpọkpọ mbubehe fo m̀mê ndinam ndutịm ke itieutom fo man ekeme ndidụk mbono district ofụri usen ita emi. Ndi emetie ekere m̀mê edida fi minit m̀mê hour ifan̄ ndikesịm itie mbono oro kpukpru usen man ekeme ndisịm nnyụn̄ nda itie ke eti ini mbemiso edinam ọtọn̄ọde? Ke akpanikọ, nnyịn ikpamaha nditaba ekededi ke otu nti udia eke spirit oro Jehovah etịmde ọnọ nnyịn! (Isa. 65:13, 14) Ndi amanam ndutịm kaban̄a ufọkidụn̄ ye n̄kpọisan̄ okụre?
3. Mme ekikere ewe ẹdin̄wam nnyịn ye ubon nnyịn inen̄ede ibọ ufọn ito ndutịm emi?
3 Nso idin̄wam fi enen̄ede akpan̄ utọn̄ ke ini edinam osụk akade iso? Edieke ekemede, babak dụk idap kpukpru okoneyo ke ama ọkọnyọn̄ mbono. Wụk enyịn se etịn̄ikọ. Kûbọde Bible fo ka kpukpru itie N̄wed Abasi oro ẹsiakde. Wet akpan n̄kpọ mbio mbio. Mme ubon ẹkpenyene nditie ọtọkiet man mme ete ye eka ẹkeme ndin̄wam nditọ mmọ ẹnen̄ede ẹkpan̄ utọn̄. (N̄ke 29:15) Ẹmekeme nditie ọtọkiet nte ubon kpukpru mbubreyo nneme mme akpan n̄kpọ ke mbono oro. Man ubon mbufo ẹkeme ndika iso mbọ ufọn idem ke mbono ama okokụre, ẹmekeme ndisio ini ke ini mbubreyo Utuakibuot Ubon mbufo nnịm man ẹda ẹneme mme akpan n̄kpọ oro ubon mbufo ẹkpedade ẹsịn ke edinam.
4. Didie ke ikeme ndin̄wam mbon efen ke esop nnyịn ẹbọ nduọkodudu eke spirit?
4 N̄wam Mbon Efen Ẹtiene Ẹbọ Nduọkodudu: Imoyom mbon efen ẹtiene ẹbọ nduọkodudu eke spirit n̄ko. Ndi ẹmenyene mme asuanetop oro ẹsọn̄de m̀mê mbon en̄wen ke esop mbufo oro ẹyomde un̄wam man ẹkeme ndidụk mbono emi? Ndi emekeme ndin̄wam mmọ? (1 John 3:17, 18) Mbiowo, akpan akpan mme esenyịn otu, ẹkpenyene ndikụt ẹte ke ẹn̄wam utọ mme asuanetop oro.
5. Didie ke idideme n̄wedikot mbono? (Se n̄ko ekebe oro odude ke enyọn̄ emi.)
5 Kpa nte isinamde ke ini edem, urua ita mbemiso mbono nnyịn ọtọn̄ọ, iyanam ubịnikọt ndikot mme owo ẹditiene nnyịn ẹdụk mbono emi. Mme esop ẹkpenyene ndinịm utịtmbuba edideme kpukpru n̄wedikot mmọ nnyụn̄ nsịn ukeme nte ẹkekeme ndikụre efakutom mmọ. Ubon mbufo ẹkpenyene ndida n̄wedikot oro ẹyọhọde ẹsụhọ ke ẹma ẹkekụre ubịnikọt oro ndi itie mbono man ẹda ẹnam n̄kpọ ke ini ẹnọde ikọ ntiense ido nneme. Ke ndutịm Friday, ẹyenọ ntọt aban̄ade nte ẹdidade n̄wedikot oro ẹnam n̄kpọ. Ẹkpenyene ndikpọn̄ nyọhọ-nsụhọ n̄wedikot oro ubon mbufo mîdidaha inam n̄kpọ ke ini mbufo ẹdude ke obio mbono oro nnọ adaidaha ke ini mbufo ẹdụkde itie mbono. Mbọk nịm idem n̄wedikot kiet nọ idemfo, koro ayada enye anam n̄kpọ ke ini akpatre utịn̄ikọ ke Sunday.
6. Mme usụn̄ ewe ke ikeme ndiwụt ke imenyene nti ido ke ini idụkde mbono?
6 Eti Ido Esinam Uwem Enem: Enem didie ntem ndidu n̄kpere nditọete nnyịn oro ẹdomode ndiwụt nti ido ke ini emi ediwak owo ẹdide “mme ama idem” mi, mînyụn̄ ikereke iban̄a mbon en̄wen! (2 Tim. 3:2) Nnyịn isiwụt ke imenyene nti ido ke ini isan̄ade sụn̄sụn̄ ye ukpono ukpono idụk itie mbono ye ke ini iwọrọde ke mbono ama akasuana, ke ini imụmde itie inịm kpọt inọ mbon oro idụn̄de kiet m̀mê oro isan̄ade kiet ke n̄kpọisan̄, m̀mê mbon oro isụk ikpepde Bible ye mmọ. Nnyịn iyetiene ndausụn̄ etieibuot okpokoro ikpehe edinam ke ini enye ọdọhọde ika iketie ke itie nnyịn ikpan̄ utọn̄ inọ ikwọ ukwak oro ẹdidade ẹtọn̄ọ mme ikpehe edinam kiet kiet. Iyowụt ke imenyene nti ido edieke nnyịn mîyakke akama-ke-ubọk telefon m̀mê ekpri ukwak ubọ etop etịmede mbon en̄wen ke ini edinam akade iso. Iyowụt n̄ko ke imenyene nti ido ke ini itrede nditịn̄ ikọ, ndinọ owo etop ke telefon, ndidia udia, m̀mê ndikpọrọde nsan̄a ke ini edinam akade iso.
7. Didie ke ikeme ndikop inem mbono nnyụn̄ nnam nditọete nnyịn ẹtiene ẹkop?
7 Inem Inem Itie Ebuana: Mme mbono district ẹsinọ nnyịn akwa ifet ndidara edidianakiet ye inem inem itie ebuana ye nditọete nnyịn. (Ps. 133:1-3) Ntak ‘mûtatke esịt’ uneme nneme ye nditọete nnyịn iren ye iban oro ẹtode mme esop en̄wen ẹdi mbono oro? (2 Cor. 6:13) Kpukpru usen, afo emekeme ndinam edi utịtmbuba fo ndimehe ye owo kiet m̀mê ubon kiet ke nsụhọde n̄kaha. Imenyene eti ifet ndinam emi ke ini nduọkodudu uwemeyo. Ntre, utu ke ndiwọrọ n̄ka itie unyamudia n̄kedep m̀mê n̄kadia n̄kpọ, da mfefere udia di ditie ye mbon en̄wen ke itie mbono dia nyụn̄ dara inem inem itie ebuana ye mmọ. Emi ekeme ndinam itọn̄ọ inyụn̄ inyene mme ufan oro ẹbịghide.
8. Ntak emi ikpọnọde idem nnyịn unyịme unyịme ndinam utom ke mbono, ndien didie ke ikeme ndinam oro?
8 Enem didie ntem ndidiana ọtọkiet ye nditọete nnyịn nnam edisana utom! Ndi emekeme ndinọ idem unyịme unyịme man an̄wam ke itieutom mbono m̀mê an̄wam esop mbufo ẹnam utom oro ẹnọde mmọ ndinịm ebiet asana? (Ps. 110:3) Edieke mûnyeneke kan̄a ebiet oro edinamde utom, mbọk sịn ke ekikere ndika Itieutom Utom Unyịmesịt ke mbono oro. Ke ini mme owo ẹwakde, utom eyefere onyụn̄ enem.
9. Ntak emi ikpenen̄erede ikpeme edu uwem ye ukamaidem nnyịn ke ini mbono?
9 Edu Uwem Nnyịn Esiye Mbon Oro Ẹkụtde Nnyịn: Nnyịn idịghe mme andidụk mbono ke ini edinam akade iso kpọt, idi ke ofụri usen ita oro. Mbon oro ẹkụtde nnyịn ke ini idude ke obio mbono ẹkpenyene ndikụt ukpụhọde ke ufọt nnyịn emi idide Mme Ntiense ye mbon oro mîdịghe. (1 Pet. 2:12) Ọfọn̄ ye ukamaidem nnyịn ke itie mbono, ke ufọkidụn̄, ye ke itie unyamudia ẹkpenyene ndiwụt ukpono nnọ Jehovah. (1 Tim. 2:9, 10) Ndidian kad idiọn̄ọ nnyịn ayan̄wam mme owo ẹfiọk ke idi Mme Ntiense Jehovah, onyụn̄ ekeme ndinam inyene ifet ndisian mmọ n̄kpọ mban̄a mbono nnyịn nnyụn̄ nnọ mmọ ikọ ntiense.
10. Didie ke ikpanam n̄kpọ man mbon oro ẹnamde utom ke ufọkisen ye ke itie unyamudia ẹnyene eti ekikere ẹban̄a mbono nnyịn?
10 Didie ke ikeme ndibere ye mbon oro ẹnamde utom ke ufọkisen ye itie unyamudia? Nnyịn ikpọbọhọ ubet ke ufọkisen awak akan se iyomde, koro emi ayanam ọsọn̄ mbon eken oro ẹdụkde mbono ndikụt ubet mbọ onyụn̄ edi ntakurua ọnọ mme andinyene ufọkisen koro mmọ ẹkpekenọ mbon en̄wen mme ubet oro. Edieke owo mîsọpke inọ nnyịn ntịn̄enyịn ke ini ikade ufọkisen m̀mê ke ini iyomde ndikpọn̄ do, akpana inyene ime inyụn̄ ifọn ido. (Col. 4:6) Akpana iyom ekpri n̄kpọ inọ mbon oro ẹmende n̄kpọ ẹsọk nnyịn ke itie unyamudia ye mme anamutom ke ufọkisen oro ẹmende ẹkpat nnyịn ẹkenịm, ẹnamde ubet nnyịn asana, ẹnyụn̄ ẹnamde mme n̄kpọ eken ẹnọ nnyịn.
11. Mme ifiọkutom ewe ẹwụt ke nti edu Christian nnyịn ẹsinọ eti ikọ ntiense?
11 Didie ke nti edu oro iwụtde ke ini mbono ẹsitụk mbon en̄wen? Ibuotikọ n̄wedmbụk n̄kpọntịbe kiet ọkọdọhọ ke etubom ke ebiet oro ẹsidade ẹnịm mbono eketịn̄ ntem: “Mbon emi ẹnyene ido etieti. Esinem nnyịn mmọ ndidụk mbono mi kpukpru isua.” Isua oko, ete kiet emi mîdịghe Ntiense ama ọduọk ekpatokụk esie ke ufọkisen oro mme andidụk mbono ẹkedụn̄de. Ke ini ẹkemende ekpatokụk oro ye kpukpru n̄kpọ ke esịt ẹsọk etubom ufọkisen oro, enye ama ọdọhọ enyene ekpatokụk oro ete: “Ọmọfọn iso ke Mme Ntiense Jehovah ẹkenịm mbono mmọ ke n̄kann̄kụk emi ndien ediwak mmọ ẹdidụn̄ ke ufọkisen emi. Ke ebede oro, etie nte ukpukwe ekpatokụk fo emi aba.”
12. Nte mbono district asan̄ade ekpere, nso ke ikpebiere ndinam, ndien ntak?
12 Mbono district isua emi ke asan̄a ekpere. Ẹsịn ekese ini ye ukeme ndinam ndutịm mbono emi ye itie mbono ẹnem owo ke idem ẹnyụn̄ ẹnọ nduọkodudu. Biere ndidụk mbono ofụri usen ita emi, nyụn̄ ben̄e idem ndibọ se Jehovah ye esop esie ẹtịmde ẹben̄e fi. Biere ndinam mbon en̄wen ẹkop inem ebe ke ndinyene nti edu, inem inem itie ebuana, nnyụn̄ mfọn ido ye mmọ. Do, ekeme nditie fi ye mbon en̄wen ke idem nte eketiede kiet ke otu mme andidụk mbono isua oko, emi ekewetde ete, “Ntịghi m̀mê enyene n̄kpọ oro enemde mi ntem akanam!”
[Se ẹwetde ke ikpọ abisi ke page 1]
Kpa nte isinamde ke ini edem, urua ita mbemiso mbono nnyịn ọtọn̄ọ, iyanam ubịnikọt ndikot mme owo ẹditiene nnyịn ẹdụk mbono emi
[Se ẹwetde ke ikpọ abisi ke page 3]
Ọfọn̄ ye ukamaidem nnyịn ke itie mbono, ke ufọkidụn̄, ye ke itie unyamudia ẹkpenyene ndiwụt ukpono nnọ Jehovah
[Se ẹwetde ke ikpọ abisi ke page 4]
Biere ndinam mbon en̄wen ẹkop inem ebe ke ndinyene nti edu, inem inem itie ebuana, nnyụn̄ mfọn ido ye mmọ
[Ekebe ke page 2-4]
Se Ẹtide Owo Ẹban̄a Mbono District Eke 2011
◼ Mme Ini Ndutịm: Ke usen mbita emi, ndutịm editọn̄ọ ke usenubọk ke n̄kanika ebede 9 ke minit 20. Ke ini ẹtọtde ikwọ ediberede, kpukpru nnyịn ikpenyene ndidu ke itie nnyịn man ndutịm ekeme nditọn̄ọ ke ido nte eyede. Ke Friday ye Saturday, mbono edisuana ke ayakde minit ition ndimia n̄kanika ition mbubreyo; ndien ke Sunday, ke ayakde minit edịp ndimia n̄kanika inan̄ mbubreyo.
◼ Itie Ubon N̄kpọisan̄: Mme adaidaha ẹyedu ke kpukpru an̄wa mbono ndiwụt mme owo ebiet oro ẹdibonde n̄kpọisan̄ mmọ. Mbọk ẹtiene ndausụn̄ mmọ ke ini ẹbonde n̄kpọisan̄ mbufo.—1 Cor. 14:40.
◼ Edimụm Itie Nnịm: N̄kukụre mbon oro ẹkemede ndimụm itie nnịm nnọ ẹdi mbon oro ẹdụn̄de ye nnyịn m̀mê mbon oro ẹsan̄ade ye nnyịn ke n̄kpọisan̄ nnyịn, m̀mê mbon oro nnyịn ikpepde mmọ Bible idahaemi.—1 Cor. 13:5.
◼ Udia Uwemeyo: Mbọk ẹda udia uwemeyo ẹdi utu ke ndikpọn̄ itie mbono man ẹkedep udia ke ini nduọkodudu uwemeyo. Ẹmekeme ndikama ekpri n̄kpọ udọn̄ udia emi ẹkemede ndinịm ke idak n̄kpọitie. Owo inyịmeke ẹmen ikpọ n̄kpọ udọn̄ udia ye mme ọtọ-akpa ẹdụk efe mbono.
◼ Mme Etịbe: Nnyịn imekeme ndiwụt esịtekọm mban̄a ndutịm oro ẹnamde ke mbono emi ebe ke nditịp n̄kpọ ke imaesịt nsịn ke itie mbono kaban̄a utom ofụri ererimbot. Ẹkpenyene ndiwet “Watch Tower,” nte ikọ iba, ke babru ubọ okụk ekededi oro ẹnọde nte etịbe ke itie mbono.
◼ Mme Mbabuat N̄kpọntịbe: Edieke oyomde ẹsọsọp ẹnọ owo usọbọ ke itie mbono, mbọk ẹneme ye adaidaha oro odude ekpere, emi edisọpde an̄wam man ẹmen owo udọn̄ọ oro ẹka Itieutom Akpa Usọbọ oro mme ọnọ usọbọ emi ẹdotde, emi ẹdude ke itie mbono ẹkemede ndise nte idem esie ọdiọkde eketre nnyụn̄ nnọ un̄wam.
◼ Ibọk Usọbọ: Edieke edide afo emenyene san̄asan̄a ibọk oro afo esidade, mbọk kụt ete ke amakama enye awak ekem, koro owo mîdinyeneke orụk ibọk emi ke itie mbono.
◼ Ikpaukot: Mbak idida unan, ọfọn isịne ukeuke ikpaukot oro ekemde nnyịn ọfọn, emi ediyakde isan̄a ifụre ifụre.
◼ Drama: Idiwụtke ima edieke nditọete iban ẹbọbọde ikpọ bọkịt emi mîdiyakke mbon oro ẹtiede mmọ ke edem ẹkụt drama. Akpana mbon oro ẹtiede mmọ ke edem ẹkeme ndikụt drama, akpan akpan ke ntak ukeuke usụn̄ oro ẹbọpde Ufọk Mbono nnyịn ye mme Ufọkmbono Obio Ubọn̄ oro ẹsidade ẹnịm mbono n̄ko.—Phil. 2:4.
◼ Ufuọn̄: Oyowụt mfọnido edieke iduọkde esisịt m̀mê itrede-tre ndiduọk ufuọn̄ emi ọsọn̄de utebe, utọ nte perfume, mbak edifịna mbon oro ẹnyenede utọ udọn̄ọ nte ikọn̄ obun̄wek.—1 Cor. 10:24.
◼ Babru Please Follow Up (S-43): Ẹkpenyene ndida babru Please Follow Up nnọ ntọt mban̄a owo ekededi oro ẹkekwọrọde ikọ ẹnọ enye ke ido nneme ke ini mbono oro ndien enye owụt udọn̄. Mme asuanetop ẹkpenyene ndida idem babru emi kiet m̀mê iba ndi itie mbono. Ẹmekeme ndiyak babru oro ẹma ẹkewet n̄kpọ ẹyọhọ nnọ Itieutom Unọ N̄wed mîdịghe ẹyak ẹnọ ewetn̄wed esop mbufo ke ẹma ẹkenyọn̄ọ mbono.—Se Utom Obio Ubọn̄ Nnyịn eke November 2009, page 4.
◼ Itie Unyamudia ye Mme Anyam N̄kpọ: Yak nti edu fo ẹnọ enyịn̄ Jehovah ubọn̄ ke ini akade itie unyamudia. Iwụtke eti ibuot ndikedep n̄kpọ ke ini edinam osụk akade iso. Ọkpọfọn nnyịn idep se ededi oro iyomde mbemiso mbono ọtọn̄ọde m̀mê ke mbono ama akasuana.
◼ Mme Ufọkidụn̄: (1) Ke ẹsịmde itiembono, ẹnam n̄kpọ nte mbon emi spirit Abasi adade usụn̄ ke ini ẹbọde ufọkidụn̄. (2) Ẹkûdụn̄ ke mme dọmitri edieke Itieutom Unọ Ufọkidụn̄ mîdọhọke mbufo ẹdụn̄ do. Ẹdụn̄ ke ebiet oro ẹnọde mbufo. (3) Nditọete iren ikpenyeneke ndidu tutu eyo ọsọn̄ m̀mê ndide ke mme ufọkidụn̄ oro ẹnọde iban m̀mê iban ndinam ntre ke eke irenowo. (4) Edieke mfịna odude ke ebiet oro odụn̄de, kụt ete ke ọmọsọsọp asian Itieutom Unọ Ufọkidụn̄ ke ini osụk odude ke an̄wa mbono. (5) Edieke ẹnọde fi itie ke ufọkisen, tiene ndausụn̄ oro mme andise mban̄a ufọkisen oro ẹnọde. (6) Ẹtem udia n̄kukụre ke mme ebiet oro ẹnọde unyịme. (7) Ẹkûtem udia ke ini edinam osụk akade iso sia emi ediwọrọ ke nnyịn iwụtke esịtekọm iban̄a mme n̄kpọ eke spirit.—Luke 10:38-42.
◼ Utom Unyịmesịt: Edieke inọde idem unyịme unyịme ndin̄wam ke utom oro ẹyomde mme owo, emi ayanam inemesịt oro nnyịn inyenede ke mbono oro enen̄ede okpon. (Utom 20:35) Owo ekededi oro akpamade ndinọ idem esie unyịme unyịme ekpenyene ndika Itieutom Utom Unyịmesịt ke mbono oro. Nditọwọn̄ oro mîyọhọke isua 16 ẹkeme nditiene n̄n̄wam ke utom emi ke nditiene ete m̀mê eka mmọ nnam, mîdịghe ẹtiene akwa owo emi ete m̀mê eka mmọ ẹnyịmede, m̀mê owo oro akamade mmọ.
[Ekebe ke ke page 2]
Didie ke Idinọ Mme Owo N̄wedikot Emi?
Man ikeme ndikụre efakutom nnyịn, ikpenyene ndinam nneme nnyịn edi ibio ibio. Imekeme ndidọhọ ite: “Mmọkọm-o. Nnyịn itiene ibuana ke ubịnikọt ofụri ererimbot ndisuan n̄wedikot emi. Okwo edi emi. Oyokụt ntọt efen efen ke n̄wedikot emi.” Ikpaedem n̄wedikot oro eye eti eti onyụn̄ edemede owo udọn̄, ntre yak enye nọ enyeneufọk ke usụn̄ oro enye edikụtde se idude ke ikpaedem esie. Nam nneme fo etie ufiop ufiop. Ke ini ẹdemede n̄wedikot ke mme utịturua, ẹkpenyene ndinọ mme magazine n̄ko ke ini odotde ndinam ntre.