Oyom Inam Utom Ukwọrọikọ Nnyịn ye Ime
1. Didie ke Jehovah owụt ke imenyene ime ye ubonowo?
1 Abasi enyene ime etieti ye ubonowo. (Ex. 34:6; Ps. 106:41-45; 2 Pet. 3:9) Ẹkeme ndikụt kiet ke otu akakan uwụtn̄kpọ ime esie ke utom ukwọrọikọ Obio Ubọn̄ oro ẹnamde ke ofụri ererimbot. Jehovah amanam n̄kpọ ye ubonowo ke n̄kpọ nte isua 2,000, edi kpa ye oro enye ke aka iso ndidụri mbon oro ẹnyenede esịt akpanikọ nnọ idem esie. (John 6:44) Didie ke ikeme ndikpebe ime Jehovah ke utom ukwọrọikọ nnyịn?
2. Didie ke ikeme ndiwụt ke imenyene ime ke ini inamde utom ke efakutom nnyịn?
2 Utom Ukwọrọikọ eke Ufọk ke Ufọk: Nnyịn ikpebe ime Jehovah ebe ke ndikwọrọ ikọ “ye unana edikpa mba” ke efakutom oro mme owo mîwụtke udọn̄ kan̄a. (Utom 5:42) Nnyịn imesime ime ke ini mme owo mînyeneke udọn̄, ẹsakde nnyịn nsahi, ẹnyụn̄ ẹbiọn̄ọde utom ukwọrọikọ nnyịn. (Mark 13:12, 13) Imesime ime n̄ko ke ndika iso nsịn ukeme nduọk mmọn̄ ke n̄kpasịp akpanikọ idem ke ini ọsọn̄de ndikụt mbon oro ẹnyenede udọn̄, ke ini ikade ufọk mmọ.
3. Ntak oyomde ime ke ini inamde mfiakn̄ka inyụn̄ inịmde mme ukpepn̄kpọ Bible?
3 Ukpepn̄kpọ Bible: Oyom ẹnyene ime ke ini ẹtọde n̄kpọ. Imekeme ndibọk n̄kpọ oro, edi nnyịn ikemeke ndinam enye ọkọri usọp usọp. (Jas. 5:7) Kpasụk ntre, n̄kọri eke spirit esidi sụn̄sụn̄ ye ke adiana ke adiana. (Mark 4:28) Ekeme ndisọn̄ mbon oro nnyịn ikpepde n̄kpọ ndikpọn̄ mme nsunsu ukpepn̄kpọ ido ukpono m̀mê mme ido edinam oro mîkemke ye N̄wed Abasi. Ikpanaha idomo ndinam nditọ ukpepn̄kpọ nnyịn ẹnam n̄kọri usọp usọp ebe ke ndinyenyịk mmọ ẹnam mme ukpụhọde. Oyom inyene ime man inọ eyen ukpepn̄kpọ ini oro ọniọn̄de ekem man spirit Abasi anam utom ke esịt esie.—1 Cor. 3:6, 7.
4. Didie ke ime ekeme ndin̄wam nnyịn ikwọrọ ikọ uforo uforo inọ mme iman oro mînịmke ke akpanikọ?
4 Mme Iman Oro Mînịmke ke Akpanikọ: Okposụkedi emi enen̄erede ọdọn̄ nnyịn ndikụt nte mme iman nnyịn oro mînịmke ke akpanikọ ẹkpepde akpanikọ, iwụt ke imenyene ime ke ini ibetde man inyene nnennen ini ndibuana se inịmde ke akpanikọ ye mmọ, inyụn̄ ikpeme mbak idin̄wan̄a ediwak n̄kpọ ifụk mmọ. (Eccl. 3:1, 7) Kan̄a ke emi, ẹyak inịm eti uwụtn̄kpọ inyụn̄ idu ke mben̄eidem nditịn̄ se inịmde ke akpanikọ ke ifụre ifụre ido ye ntotụn̄ọ ukpono. (1 Pet. 3:1, 15) Ke akpanikọ, utom ukwọrọikọ oro inamde ke ime eyetịm enyene uforo onyụn̄ enem Ete nnyịn eke heaven esịt.