Kwọrọ Ikọ Nọ “Kpukpru Orụk Owo”
1. Didie ke mme ọkwọrọ eti mbụk oro ẹnyenede uforo ẹbiet nta mme anamutom usọ?
1 Ata anamutom usọ esinyene ediwak n̄kpọutom onyụn̄ ọfiọk ini ye nte enye akpadade n̄kpọutom kiet kiet anam n̄kpọ. Kpasụk ntre, nnyịn imenyene nsio nsio n̄kpọutom ndin̄wam nnyịn inam utom nnyịn nte mme ọkwọrọ eti mbụk. Ke uwụtn̄kpọ, ẹsio ediwak ndiye uduot n̄kpri n̄wed emi ẹnemede nsio nsio n̄kpọ man ẹn̄wam nnyịn ikwọrọ ikọ inọ “kpukpru orụk owo.” (1 Cor. 9:22) Esịne-esịt Utom Obio Ubọn̄ Nnyịn emi asiak ndusụk ndiye uduot n̄kpri n̄wed emi onyụn̄ etịn̄ mbon emi ẹketịmde mmọ ẹnọ ye nte ẹkpenọde mmọ.
2. Ini ewe ke ikpada ndiye uduot n̄kpri n̄wed inam n̄kpọ ke an̄wautom?
2 Ini Emi Ẹkpedade Ndiye Uduot N̄kpri N̄wed Ẹnam N̄kpọ: Anamutom usọ edida n̄kpọutom kiet kiet inam n̄kpọ ini ekededi oro ọfọnde ndinam ntre. Kpasụk ntre, nnyịn imekeme ndinọ owo ediye uduot ekpri n̄wed ke ini ikerede ke eyenyene ufọn ọnọ enye, idịghe n̄kukụre ke mme ọfiọn̄ oro ẹdọhọde ẹnọ ediye uduot ekpri n̄wed. Ke uwụtn̄kpọ, edieke ẹnọde n̄wed Bible Ekpep ndien nnyịn ikwọrọ ikọ ke efakutom emi mme owo mîdịghe mme Christian, mînyụn̄ inyeneke udọn̄ ke Bible, ọkpọfọn inọ ediye uduot ekpri n̄wed oro odotde ndien ekem inọ n̄wed Bible Ekpep ke ima ikedemede owo oro udọn̄.
3. Ntak emi ikpadade mme n̄kpọutom oro idade ikwọrọ ikọ inam n̄kpọ ye usọ?
3 N̄wed Abasi otoro mbon emi ẹnyenede usọ ke utom mmọ. (N̄ke 22:29) Ke akpanikọ, idụhe utom emi edide akpan utom mfịn akan “edisana utom eti mbụk.” (Rome 15:16) Oyom idomo ndida mme n̄kpọutom nnyịn nnam n̄kpọ ye usọ man otodo idi mme “anamutom emi mînyeneke ntak ndikop bụt.”—2 Tim. 2:15.