Okudọk Okụk Iba Emi Edide Ekpri Okụk

Akpan usụn̄ kiet oro nnyịn inọde n̄kpọ Obio Ubọn̄ ibetedem edi nditịp okụk man ẹda ẹse ẹban̄a utom ukwọrọikọ ofụri ererimbot. Edi nso ke ikpanam edieke nnyịn mînen̄ekede inyene okụk?

Isan̄ kiet, Jesus ama okụt nte ubuene ebeakpa esịnde okudọk okụk iba emi edide ata ekpri okụk ke n̄kpọ usịn okụk temple. Ima oro enye akamade Jehovah akanam kpa ye “unana esie” enye ọnọ “kpukpru se enye enyenede, kpa ofụri se enye akpadade odu uwem.” (Mark 12:41-44) Jesus ndiketịn̄ n̄kpọ mban̄a oro okowụt ke etịbe emi n̄wan oro eketịpde ama enen̄ede ọsọn̄ urua ke enyịn Abasi. Kpasụk ntre, mme Christian akpa isua ikie ikekereke ke mme Christian oro ẹnyenede n̄kpọ kpọt ẹkpenyene nditịp okụk man ẹda ẹse ẹban̄a utom ukwọrọikọ. Apostle Paul ama etịn̄ aban̄a mbon Macedonia, oro ekedide kpa ye ‘ọkpọsọn̄ unana, mmọ ẹma ẹka iso ẹben̄e ye ọkpọsọn̄ n̄kpeubọk ẹyom ifet ndinọ n̄kpọ ke mfọnido.’—2 Cor. 8:1-4.

Ke ntre, ekpedi nnyịn ikeme nditịp ‘okudọk okụk iba emi edide ekpri okụk,’ nnyịn ikpenyene nditi nte ke tep tep esiyọhọ aban̄. Edieke itịpde okụk ke ofụri esịt, Ete nnyịn eke heaven oro esitatde ubọk oyokop idatesịt koro “Abasi amama owo eke ọnọde ke idatesịt.”—2 Cor. 9:7.