Mbemiso Ọkwọrọde Ikọ, Eyedi Eyebem Iso Oyom Mbon Usem Mbufo
1. Ntak emi ẹbaharede efakutom esop, ke ebiet oro esemde ediwak usem, ẹtiene mme usem oro mme owo ẹsemde?
1 Ke mme mbet Jesus ẹma ẹkebọ edisana spirit ke Pentecost eke 33 E.N., mmọ ẹma “ẹtọn̄ọ ndisem nsio nsio usem” nnọ mbon oro ẹketode nsannsan ikpehe isọn̄ ẹdi. (Utom 2:4) Nte utịp, owo 3,000 ẹma ẹna baptism. Etie nte ata ediwak isenowo oro ẹkedude do ẹma ẹkeme ndisem usem kiet, edide Hebrew m̀mê Greek. Edi Jehovah okoyom ete ẹkwọrọ etop Obio Ubọn̄ ẹnọ mmọ ke usem emana mmọ. Nte eyịghe mîdụhe, ntak kiet oro enye akanamde emi edi koro mme owo ẹsisọp ndikop eti mbụk ke usem emana mmọ. Mmọdo, mfịn, ẹbahade efakutom esop, ke ebiet oro ẹsemde ediwak usem, ẹtiene mme usem oro mme owo ẹsemde. (Se n̄wed Ẹtịm, p. 107, ikp. eki. 2-3.) Owo isinọhọ otu oro ẹsemde usem en̄wen efakutom, edi mmọ ẹsikwọrọ ikọ ẹnọ mbon oro ẹsemde usem mmọ ke efakutom esop oro esede aban̄a mmọ ye ke efakutom mme esop eken oro ẹdude ke n̄kann̄kụk oro.
2. (a) Nso idi utom uyom mme owo, ndien m̀mọ̀n̄ ke ẹkpenam? (b) Didie ke mme esop ẹkeme ndin̄wam kiet eken ẹnam utom ke efakutom oro ẹsemde ediwak usem? (c) Nso ke ikpanam edieke ikụtde owo usem en̄wen oro owụtde udọn̄?
2 Edieke odụn̄de ke ebiet emi kpukpru owo ẹsemde ukem usem, afo emekeme ndikwọrọ ikọ ke kpukpru ufọk. Edi ididịghe ntre edieke odụn̄de ke akwa obio oro ẹsemde ediwak usem. Mme esop oro ẹsemde usem en̄wen ẹkeme ndikwọrọ ikọ kpa ke n̄kann̄kụk oro. Ke adan̄aemi mme esop oro ẹkemede ndisian fi ebiet oro mmọ ẹkụtde mbon oro ẹsemde usem mbufo, edi utom esop m̀mê otu oro afo odude ndiyom mbon oro ẹsemde usem mbufo man ọkwọrọ ikọ ọnọ. (Se ekebe oro “Ẹn̄wam Kiet Eken.”) Mmọdo, emekeme ndinam utom uyom mme owo, oro edi, anam ndụn̄ọde man okụt mbon oro ẹsemde usem mbufo. Didie ke ẹkeme ndinam utom uyom mme owo?
3. Nso ke ẹda ẹbiere ebiet emi esop m̀mê otu ediyomde owo ye udomo ini emi mmọ ẹkpedade ẹnam emi?
3 Ndidiomi Utom Uyom Mme Owo: Udomo ini oro ẹsịnde ke ndiyom mme owo ke ebiet oro ẹsemde ediwak usem ọkọn̄ọ ke nte mme n̄kpọ ẹtiede ke n̄kann̄kụk oro. Ke uwụtn̄kpọ, owo ifan̄ ke efakutom oro ẹsem usem mbufo? Mme asuanetop ifan̄ ẹdu do? Adres owo ifan̄ ke esop m̀mê otu mbufo ẹnyenyene kan̄a? Iyomke esop ẹyom mme owo ke kpukpru n̄kann̄kụk ukem ukem, edi mmọ ẹkeme ndimek ndinọ ntịn̄enyịn ke mme ikpehe oro mme owo ẹnen̄erede ẹwak ke efakutom mmọ ye ke mme ebiet oro mînen̄ekede iyom usụn̄ ikpọn̄ efakutom mmọ. Nte ededi, ndinyene eti ndutịm uyom mme owo edi akpan n̄kpọ man ẹnọ ediwak owo nte ẹkekeme ifet ndikot enyịn̄ Jehovah.—Rome 10:13, 14.
4. (a) Didie ke ẹkpediomi utom uyom mme owo? (b) Mme usụn̄ ewe ke ẹkeme ndida nyom mbon oro ẹsemde usem mbufo?
4 Mbak mme owo ẹdifiak ẹka ebiet oro mbon en̄wen ẹma ẹkedodụk ẹkeyom mme owo, otu mbiowo, akpan akpan esenyịn utom, ẹkpenyene ndidiomi nnyụn̄ nse mban̄a utom uyom owo. (1 Cor. 9:26) Ke mme otu oro ẹsemde usem en̄wen, eyenete oro odotde, emi otu mbiowo ke esop oro esede aban̄a otu emi ẹmekde, ekeme ndida usụn̄. Ọkpọfọn enye edi ebiowo m̀mê asan̄autom unamutom. Edieke odotde, otu mbiowo esop oro esede aban̄a otu oro esemde usem en̄wen ẹkeme ndidiomi man ofụri esop ẹtiene ẹbuana ke utom uyom mme owo ke ini ke ini.—Se ekebe oro “Nte Ẹkpeyomde Mbon Oro Ẹsemde Usem Mbufo.”
5. (a) Nso idi ndusụk ekikere oro ẹnọde mme asuanetop oro ẹnamde utom uyom mme owo? (b) Nso ke ikpetịn̄ ke ini inamde utom uyom mme owo?
5 Oyom inyene akpan uduak ini ekededi oro nnyịn ibuanade ke utom uyom mme owo. Sia utom emi edide ubak ikpehe utom ukwọrọikọ, oyom nnyịn isịne n̄kpọ nte mme ọkwọrọikọ. Ediwak owo ẹkụt ke ndifiak ndụn̄ọde se mmọ ẹditịn̄de, nnyụn̄ nda usem esop mmọ nnyene nneme ke ini ẹyomde mme owo, ẹsinam mmọ ẹnam utom emi ye ifiopesịt onyụn̄ anam mmọ ẹsem usem oro ọdọnọ. Imekeme ndibat ini oro idade inam utom emi edi idibatke ini oro idade itịm n̄wed ndise efakutom ye mme n̄wed enyịn̄ efakutom. Ke ini ikụtde owo emi esemde usem nnyịn, nnyịn ikpenyene ndidomo ndibuana eti mbụk ye enye ndien ke oro ebede isọsọp isian esenyịn utom m̀mê owo oro enye emekde man ẹwet enyịn̄ esie ẹsịn ke n̄wetnnịm n̄kpọ efakutom. Ẹkpenyene ndinam emi edide owo oro owụt udọn̄ m̀mê iwụtke. Okposụkedi emi utom uyom mme owo edide akpan n̄kpọ, nnyịn ikpenyene ndibuana n̄ko ke kpukpru ikpehe utom ukwọrọikọ.—Se ekebe oro “Se Ẹkpetịn̄de ke Ini Ẹnamde Utom Uyom Mme Owo.”
6. Nso isinam ọsọn̄ utom ndiyom mme inan?
6 Ndiyom Mme Inan: Ndiyom mme inan isimemke utom, esinyụn̄ oyom ẹnen̄ede ẹsịn ukeme ẹnyụn̄ ẹnam ndien ndien. Owo ikemeke ndida enyịn̄, nte owo etiede, m̀mê ọfọn̄, ndiọn̄ọ mbon emi ẹdide inan. Ke adianade do, mbonubon ye mme ufan isimaha mme owo ẹkụt mmọ mîdịghe mmọ ẹsikop bụt, isinyụn̄ iyomke ndinọ mme asuanetop ntọt oro mmọ ẹyomde. Mme ekikere oro ẹnọde mi ẹban̄a nte ẹkpeyomde mme inan ẹkeme n̄ko ndinyene ufọn ke ini ẹyomde mbon oro ẹkemede nditịn̄ ikọ.
7. (a) Nso ke ẹkpebụp mme owo ke ini ẹyomde mme inan ke ebiet oro mme owo ẹdụn̄de? (b) Didie ke ikpanam n̄kpọ man enyeneufọk okûyịk m̀mê nnyịn idi mmanie?
7 Mme esop ye mme otu usem idiọn̄ọ ẹsikụt unen ke ini ẹbụpde mme owo ẹban̄a mme inan ke ebiet oro mme owo ẹdụn̄de. Ekeme ndidi enyeneufọk esikụt nte mbọhọidụn̄, nsan̄autom, m̀mê nsan̄a ufọkn̄wed esie esidade usem idiọn̄ọ etịn̄ ikọ. Ekeme ndidi enye esikụt idiọn̄ọ oro ẹwetde ke efak ndinam mbọhọidụn̄ ẹfiọk ke nditọwọn̄ emi ẹdide inan ẹdu ke n̄kann̄kụk oro. Mîdịghe enye enyene iman emi edide inan. Fiọk ete ke mme owo ẹkeme ndiyịk ntak emi afo edide. Nte ededi, enyeneufọk idikopke ndịk edieke etiede ufan ufan, anam nneme fo edi ibio ibio ye in̄wan̄-in̄wan̄, onyụn̄ etịn̄ ikọ ukpono ukpono. Ndusụk owo ẹkụt unen ke ndiwụt enyeneufọk Bible ye mme DVD usem idiọn̄ọ eken ke ini mmọ ẹbụpde enye m̀mê enye ọfiọk owo emi edide inan. Ekem mmọ ẹdọhọ enye ke iyom ndibuana etop Bible ye utọ mbon oro. Edieke enyeneufọk mîmaha ndisian fi n̄kpọ, enye ekeme ndibọ kad oro ewetde enyịn̄ ye adres fo m̀mê n̄wedikot mbono esop man ọnọ iman m̀mê ufan esie emi edide inan.
8. Didie ke esop efen oro odude ekpere ekeme ndin̄wam esop usem idiọn̄ọ?
8 Usen kiet m̀mê iba ke isua, esop usem idiọn̄ọ ekeme ndidọhọ esop kiet ke n̄kann̄kụk mmọ oro esemde usem en̄wen ẹte ẹdin̄wam mmimọ ẹyom mme inan ke kiet ke otu ikpọ itie oro ẹdude ke akamba efakutom mmọ. Ke mbono an̄wautom oro esop usem idiọn̄ọ ẹnịmde, ẹkeme nditịn̄ nte ẹdinamde utom emi ẹnyụn̄ ẹnam ẹwụt. Ke nsụhọde n̄kaha, ẹkeme ndisịn asuanetop kiet oro odude ke esop usem idiọn̄ọ ke otu mbono an̄wautom kiet kiet ẹnyụn̄ ẹnọ n̄wed ndise obio oro owụtde akpan ebiet oro ẹdikade ikoyom mme owo.
9. Didie ke ẹkeme ndiyom mme inan ke ebiet emi mmọ ẹnyenede mboho ye ebiet oro mmọ ẹsopde idem man ẹnọ idem inemesịt m̀mê ẹbọ un̄wam oro ẹsinọde?
9 Ẹkeme n̄ko ndiyom mme inan ke ebiet emi mmọ ẹnyenede mboho ye ebiet oro mmọ ẹsopde idem man ẹnọ idem inemesịt m̀mê ẹbọ un̄wam oro ẹsinọde ke obio. Mme asuanetop ẹkpenyene ndisịne ọfọn̄ oro odotde n̄ka mme itie emi. Ọkpọfọn ndinyene nneme ye owo kiet m̀mê iba oro ẹdude do ndinyụn̄ nnam n̄kpọ ke mbufiọk utu ke nditịn̄ ikọ nnọ ofụri otu oro. Edieke mme owo ẹkpan̄de utọn̄, imekeme ndinọ mmọ enyịn̄ ye adres nnyịn inyụn̄ ibọ eke mmọ.
10. Didie ke mme asuanetop ẹkeme ndiyom mme owo ke mme itie mbubehe?
10 Ke ndusụk itie mbubehe, nnyịn imekeme ndibụp m̀mê odu mme anamutom m̀mê mbon oro ẹsidide ẹdinam mbubehe ye mmọ kpukpru ini, emi esidade usem idiọn̄ọ etịn̄ ikọ. Edieke ufọkn̄wed inan odude ke efakutom oro, imekeme ndinọ mmọ ndusụk DVD nnyịn ẹnịm ke itie ubon n̄wed mmọ.
11. Ntak emi utom uyom mme owo edide akpan ikpehe utom ukwọrọikọ?
11 Akpan Utom: Ndiyom mme enyeneufọk emi ẹdide inan m̀mê oro ẹsemde usem mbufo ekeme ndisọn̄ utom. Ke adianade do, mbon oro ẹsemde isio isio usem ndidi ndidụn̄ ke efakutom mîdịghe ẹwọrọ ẹka efakutom efen ekeme ndinam ọsọn̄ ndinyene nnennen n̄wetnnịm n̄kpọ mban̄a efakutom. Edi kpa ye oro, utom uyom mme owo edi akpan ikpehe utom ukwọrọikọ nnyịn ke ata ediwak ebiet. Jehovah, kpa enye emi ọdọhọde nnyịn ikwọrọ ikọ, inamke asari. (Utom 10:34) ‘Uduak esie edi ete kpukpru orụk owo ẹnyene edinyan̄a ẹnyụn̄ ẹsịm nnennen ifiọk akpanikọ.’ (1 Tim. 2:3, 4) Mmọdo, ẹyak ibere ye Jehovah ye kiet eken man iyom mme owo ke kpukpru usem emi ẹnyenede “eti esịt eke ọfọnde.”—Luke 8:15.
[Ekebe ke page 5]
Ẹn̄wam Kiet Eken
Edieke esop m̀mê otu ediyomde ẹn̄wam mmimọ ẹyom mbon usem mmọ man ẹkwọrọ ikọ ẹnọ, esenyịn utom ekeme ndisian mbiowo ke mme esop oro ẹsemde usem en̄wen ke n̄kann̄kụk oro. Ọkpọfọn ẹsian sụk mme esop oro mînen̄ekede iyom usụn̄ m̀mê emi ẹnyenede ediwak mbon oro ẹsemde usem oro. Ndien mme esop oro ẹdọhọde ẹn̄wam mi ẹkeme ndien ndidọhọ mme asuanetop ẹte edieke mmọ ẹkụtde owo ekededi oro esemde usem oro, mmọ ẹkpenyene ndiwet adres owo oro nnọ esenyịn utom man ọkpọn̄ ọnọ esop oro m̀mê otu oro oyomde un̄wam do. Mme esenyịn utom nsio nsio esop emi ẹyediana kiet ẹnam ndutịm oro ọfọnde man ẹnam utom ke efakutom oro ẹsemde nsio nsio usem ẹnyụn̄ ẹwụt mbon oro ẹnyenede udọn̄ nnennen esop m̀mê otu oro mmọ ẹkpebuanade.
Edieke mme asuanetop ẹkụtde owo emi esemde usem en̄wen ndien enye enen̄ede enyene udọn̄ (mîdịghe okụt inan), mmọ ẹkpenyene ndisọsọp n̄wet n̄kpọ nyọhọ babru Please Follow Up (S-43) ẹnyụn̄ ẹkpọn̄ ẹnọ ewetn̄wed esop mmọ. Emi ayanam ẹn̄wam owo oro ke n̄kan̄ eke spirit usọp usọp.—Se km 5/11 p. 3.
[Ekebe ke page 6]
Nte Ẹkpeyomde Mbon Oro Ẹsemde Usem Mbufo
• Bụp mbon en̄wen—nditọ ukpepn̄kpọ fo, mbonubon fo, mbon itieutom fo, ye mbon eken.
• Da mbufiọk bụp n̄kpọ ban̄a mmọ ke mme utọ itie nte itie ubon n̄wed, itieutom ukara, ye ke ufọkn̄wed ntaifiọk.
• Se n̄wed mbụk n̄kpọntịbe m̀mê oyokụt ntọt aban̄a mme edinam emi mbon oro ẹsemde usem en̄wen ẹdiomide.
• Ka mme itie mbubehe oro mbon esenidụt ẹsiwakde ndika.
• Kụt mbon oro ẹsede enyịn ke itie mbubehe, ufọkn̄wed ntaifiọk, m̀mê ke mme itie emi ẹsidụkde n̄kpọisan̄, emi mme owo oro ẹsemde usem mbufo ẹsiwakde ndika, bọ unyịme nyụn̄ nịm okpokoro do dori mme n̄wed nnyịn.
[Ekebe ke page 7]
Se Ẹkpetịn̄de ke Ini Ẹnamde Utom Uyom Mme Owo
Ndinam n̄kpọ ufan ufan ye in̄wan̄-in̄wan̄ idiyakke mme owo ẹnyene eyịghe ke ini isobode mmọ. Akpa n̄kpọ oro esifọnde ẹnam esidi ndiwụt owo oro n̄wed ke usem nnyịn.
Ke ama ọkọkọm enye, emekeme ndidọhọ: “Nnyịn iyom mbon oro ẹsemde usem ․․․․․ man ikeme ndinyene nneme ye mmọ mban̄a idotenyịn oro Bible ọnọde. Ndi ọmọfiọk owo oro esemde usem emi?”
Ke ini oyomde inan, emekeme ndidọhọ: “Mmọkọm-o. Ndi mmekeme ndiwụt fi n̄kpọ? [Da ekpri n̄kpọ ubre vidio bre ufan̄ikọ kiet ke New World Translation—On DVD.] Ufan̄ikọ kiet ke Bible Usem Idiọn̄ọ Mbon America edi emi. Ke adianade ye Bible, imenyene ediwak vidio oro mîdịghe unyam, emi ẹnamde man ẹda ẹn̄wam mme inan ẹkpep Ikọ Abasi. Ndi ọmọfiọk owo emi edide inan m̀mê oro mîkopke n̄kpọ ọfọn, emi esitịn̄de ikọ ke usem idiọn̄ọ?” Edieke enyeneufọk mîtịghi owo ndomokiet, ọyọfọn asiak mme itie oro ekemede ndidi enye ama okụt inan, utọ nte itieutom, ufọkn̄wed, m̀mê ke mbọhọ.