Ndi Ọkpọkpọ Efakutom Eyenyene Ufọn Ọnọ Fi?
1. Nso idi ọkpọkpọ efakutom?
1 Nso idi ọkpọkpọ efakutom? Enye edi efakutom oro ẹbaharede ẹnọ owo ndinam utom ke mme esop oro ẹnyenede ediwak efakutom, enye ekeme ndidi efakutom oro odude ekpere ebiet emi afo odụn̄de. N̄wed Ẹtịm ke page 103, anam an̄wan̄a ete: “Ndinyene ọkpọkpọ efakutom oro ekperede ayanam fi ekeme ndisịn ekese ini oro ekemede ke an̄wautom. N̄ko, afo emekeme ndikot mme asuanetop en̄wen ẹdinam utom ye afo ke ọkpọkpọ efakutom fo.”
2. Didie ke ẹkeme ndinam utom ke ọkpọkpọ efakutom ndian ye unọ ikọ ntiense otu?
2 Nanam Dian ye Unọ Ikọ Ntiense Otu: Edieke ọbọde ọkpọkpọ efakutom ekpere itieutom fo, afo emekeme ndiwọrọ an̄wautom ke ini nduọkodudu uwemeyo ye asuanetop en̄wen emi anamde utom ekpere do, mîdịghe mbemiso ọnyọn̄de ufọk ke utom ama akasuana. Edieke ọbọde efakutom emi ekperede ufọk fo, afo ye ubon fo ẹmekeme ndisinam unọ ikọ ntiense mbubreyo ke ini emi eferede mbufo ndinam. Nte ededi, edieke mûdụkke mbono an̄wautom, ọyọfọn ọbọn̄ akam eben̄e Jehovah ndausụn̄ mbemiso ọtọn̄ọde ukwọrọikọ. (Phil. 4:6) Ke adianade do, yak edi anam utom ke ọkpọkpọ efakutom fo onyụn̄ etiene abuana ke unọ ikọ ntiense otu oro esop ẹdiomide. Enen̄ede ọfọn ndiwọrọ an̄wautom ye otu an̄wautom mbufo akpan akpan ke mme utịturua emi ediwak owo ẹsisopde idem man ẹwọrọ an̄wautom.
3. Nso idi mme ufọn edinyene ọkpọkpọ efakutom?
3 Mme Ufọn: Edieke enyenede ọkpọkpọ efakutom, afo emenyene itie ndikwọrọ ikọ ini ekededi oro oyomde. Emekeme ndisịn ekese ini ke an̄wautom sia mîdiyomke asan̄a oyom usụn̄ mbemiso esịmde efakutom. Ndutịm emi anam ndusụk owo ẹkeme ndinam utom usiakusụn̄ unọ un̄wam m̀mê eke ofụri ini. Sia mme enyeneufọk oro ẹnyenede udọn̄ ẹdude ẹkpere fi, emem utom ndifiak n̄ka n̄kenyene nneme ye mmọ nnyụn̄ nnịm ukpepn̄kpọ Bible. Ediwak owo ẹkụt ẹte ke ndikwọrọ ikọ ke ọkpọkpọ efakutom anam mmọ ẹtịm ẹmehe ye mme enyeneufọk, ndien mme enyeneufọk ẹsinyene mbuọtidem ke idem mme ọkwọrọikọ emi akpan akpan edieke mmọ ẹnamde utom ke efakutom oro ẹbe ini kiet mbemiso ẹkpọn̄de enye ẹnọ man mbon en̄wen ẹtiene ẹnam utom do. Ndi afo ndinam utom ke ọkpọkpọ efakutom ayan̄wam fi ye ubon fo ẹnam utom ukwọrọikọ mbufo ọyọhọ ọyọhọ ẹma?—2 Tim. 4:5.