Nte Ẹkpedade Mmanie Ẹnam Uduak Jehovah Mfịn? Ẹnam N̄kpọ
Obufa Ediye Uduot Ekpri N̄wed Emi Ẹtịmde Man Ẹda Ẹn̄wam Nditọ Ukpepn̄kpọ Bible Ẹdụk Esop Abasi
1. Tịn̄ ntak ita emi ẹtịmde ediye uduot ekpri n̄wed Uduak Jehovah.
1 Ndi ọmọtọn̄ọ ndida obufa ediye uduot ekpri n̄wed Mmanie Ẹnam Uduak Jehovah Mfịn? nnam n̄kpọ? Ẹtịm n̄wed emi man (1) anam nditọ ukpepn̄kpọ Bible ẹmehe ye nnyịn, (2) ekpep mmọ se nnyịn isinamde, ye (3) owụt mmọ se esop nnyịn anamde. Ediye uduot ekpri n̄wed Uduak Jehovah enyene mme ukpepn̄kpọ emi ẹdide page kiet kiet, oro ẹkemede ndida n̄kpọ nte minit ition esịm duop kpọt nneme ke ẹma ẹkekụre ukpepn̄kpọ Bible.
2. Tịn̄ nte ẹtịmde n̄wed emi ye nsio nsio n̄kpọ oro ẹdude ke esịt.
2 Nte Ẹtịmde N̄wed Emi: Ẹbahade n̄wed emi ke ikpehe ita, ikpehe kiet kiet eneme nsio nsio n̄kpọ aban̄a esop Jehovah nte ẹtịn̄de ke akpa ikpehe ekikere. Ẹwet mme ibuotikọ ukpepn̄kpọ 28 oro ẹdude ke n̄wed emi nte mbụme, ndien n̄kpri ibuotikọ oro ẹwetde ke ndodobi ubọkn̄wed ẹbọrọ mme mbụme emi. Ẹdọn̄ se iwakde ibe ndise idụt 50 ke n̄wed emi ndiwụt mme ebiet emi utom nnyịn atarade ekesịm ke ofụri ererimbot. Ediwak ukpepn̄kpọ ẹnyene ekebe emi ọdọhọde “Nam N̄kpọ Emi,” emi ẹsịnede mme n̄kpọ oro afo ekemede ndidọhọ eyen ukpepn̄kpọ fo anam.
3. Didie ke ikeme ndida ediye uduot ekpri n̄wed Uduak Jehovah nnam n̄kpọ?
3 Nte Akpadade N̄wed Emi Anam N̄kpọ: Tọn̄ọ ke ndiwụt eyen ukpepn̄kpọ mbụme oro edide ibuotikọ ukpepn̄kpọ. Ekem, nte mbufo ẹkotde se idude ke ukpepn̄kpọ emi, tịn̄ n̄kpọ ban̄a n̄kpri ibuotikọ oro ẹwetde ke ndodobi ubọkn̄wed. Ke akpatre, neme mme mbụme ndụn̄ọde emi ẹdude ke utịt page oro. Afo emekeme ndikot ofụri ukpepn̄kpọ inikiet mbemiso enemede mîdịghe okot onyụn̄ eneme ikpehe kiet kiet. Biere ke idemfo m̀mê ewe itie N̄wed Abasi ke edikot. Kûfre ndineme mme ndise oro ẹdude ye ekebe oro ọdọhọde “Nam N̄kpọ Emi.” Ọkpọfọn ẹneme mme ukpepn̄kpọ emi ke adiana ke adiana, edi emekeme ndibe ndusụk ukpepn̄kpọ n̄keneme ukpepn̄kpọ en̄wen oro oyomde ẹsọsọp ẹneme ye eyen ukpepn̄kpọ. Ke uwụtn̄kpọ, edieke edide mbono mbufo ẹkpere, emekeme ndibe n̄keneme ọyọhọ ukpepn̄kpọ 11.
4. Ntak emi afo okopde inemesịt ndinyene obufa n̄wed emi?
4 Ke ini ikpepde owo Bible, nnyịn in̄wam enye emehe ye Ete nnyịn eke heaven. Edi, oyom nnyịn ikpep enye n̄ko iban̄a esop Jehovah. (N̄ke 6:20) Esịt enen̄ede enem nnyịn ndinyene obufa n̄wed emi anamde emem nnyịn utom ndinam emi.