Mme Ifiọkutom

◼ Australia: John emi ekedide ọfiọkn̄wed owo ama esika ufọkabasi ke ini enye ekedide eyenọwọn̄ edi nte ini akade enye ikenịmke aba ke Abasi odu. Asiakusụn̄ kiet ama ọnọ enye ediye uduot ekpri n̄wed Was Life Created? ndien ekem afiak aka ọkọnọ enye ediye uduot ekpri n̄wed Origin of Life. Man an̄wam enye enyene udọn̄, asiakusụn̄ emi ama esida mbufa magazine ọsọk enye onyụn̄ eneme ibuotikọ ekededi oro aban̄ade edibotn̄kpọ m̀mê ntịn̄nnịm ikọ Bible ye enye. Ke ini enye okụtde ke John ọtọn̄ọ ndinyene udọn̄, enye ọnọ enye n̄wed The Bible—God’s Word or Man’s? Ke John ama okokot n̄wed emi, enye ama ọtọn̄ọ ndikere ke ekeme ndidi Abasi odu. Ekem asiakusụn̄ oro ọnọ John n̄wed Bible Ekpep, onyụn̄ owụt enye ikpehe ekikere 8 ke page 20 ye ikpehe ekikere 13-16 ke page 23-24. John ama enen̄ede ama mme itie N̄wed Abasi oro ẹsiakde ẹsịn ke mme ikpehe ekikere oro tutu enye ọdọhọ ete, “Akpana mfiak ntọn̄ọ ndikot Bible.”

◼ Mexico: Ete kiet ama ọdọhọ asuanetop kiet ete ke imọ inịmke ke ẹkeda odudu spirit Abasi ẹwet Bible. Asuanetop oro ama ọdọhọ ke iyowụt enye mme n̄kpọ oro ẹwụtde ke ẹkeda odudu spirit ẹwet Bible. Nte ini akakade, se ete oro ekekpepde ke Bible ama ọtọn̄ọ nditụk enye esịt. Se enye ekekpepde aban̄a mme ibet Abasi okotụk enye akan. Enye ama ọdọhọ asuanetop oro ete: “Akpa ekesidi ima ikot Bible enye etie nte ikot item emi ẹkemede ndinọ ke n̄wed ekededi, inyụn̄ itụkke mi. Edi idahaemi ima ikot Bible, akpan akpan item esie oro aban̄ade eti ido uwem, esịt esifịna mi.”

◼ United States: Ke adan̄aemi ebe ye n̄wan kiet ẹnamde san̄asan̄a unọ ikọ ntiense ke ebiet emi mme owo ẹwakde ke ikpọ obio, mmọ ẹma ẹsobo ye n̄wan kiet emi otode Taiwan, emi enịmde ke Abasi odu edi ekere ke Bible edi n̄wed mbon America. Enye akasan̄a aka okpokoro oro mmọ ẹkedoride mme n̄wed koro enye ikọfiọkke se enye akpanamde okposụkedi emi enye ekenyenede n̄kpọ. Enye ekekere ke Bible ayan̄wam imọ ifiọk se ikpadade uwem imọ inam. Mme asuanetop emi ẹma ẹda n̄wed Bible Ekpep ye ediye uduot ekpri n̄wed Lasting Peace and Happiness—How to Find Them ẹtọn̄ọ ukpepn̄kpọ ye enye. Utu ke mmọ ndikpep ibuot 2 ke n̄wed Bible Ekpep, mmọ ẹma ẹneme ikpehe oro ọdọhọde “A Guidebook for the Blessing of All Mankind” ke ediye uduot ekpri n̄wed oro. Ke mmọ ẹma ẹkeneme ikpehe ekikere 1-6, idem ama akpa n̄wan oro, enye onyụn̄ ọdọhọ ke Bible edi ata isio ye mme n̄wed ido ukpono eken. Ke mmọ ẹma ẹkeneme mme ntịn̄nnịm ikọ Bible oro ẹma ẹkesosu, n̄wan oro ama ọdọhọ ete, “N̄kereke ke enyene n̄wed ndomokiet oro enende nte Bible!”

◼ Japan: Okposụkedi emi enyeneufọk kiet ọkọdọhọde asuanetop kiet ete ke imọ inịmke ke Abasi odu, asuanetop oro ama aka iso awaha ese enye onyụn̄ enyene nneme ye enye ke ibuotikọ Ẹdemede! emi ọdọhọde “Ndi Ẹkebobot?” Nte ini akakade, ete oro ama okpụhọ ekikere onyụn̄ ọtọn̄ọ ndinyịme ke ekeme ndidi Andibot odu. Idahaemi enye enịm ke Abasi odu ndien asuanetop oro ke ekpep n̄kpọ ye enye ke ediye uduot ekpri n̄wed Eti Mbụk Emi Otode Abasi!

◼ Canada: Eyenete an̄wan kiet ama ọnọ n̄wan kiet obufa magazine ke ini enye ọkọwọrọde ke ufọk esie aka ndidụk moto esie. Ke ini eyenete oro akafiakde aka, n̄wan oro ama ọsọn̄ọ etịn̄ ete ke imọ inyeneke udọn̄ inyụn̄ inịmke ke Abasi odu. Eyenete oro ikakpaha mba edi ama ebiere ndida ediye uduot ekpri n̄wed A Satisfying Life—How to Attain It nsọk enye. Ke ini asuanetop oro okokụtde n̄wan oro ke ufọk, enye ama ọdọhọ ke okposụkedi emi imọ idiọn̄ọde ke enye inịmke ke Abasi odu, imọ ikosụk ikekere iban̄a enye koro imọdiọn̄ọ ke enye ọbọk nditọ ikpọn̄. Enye ama owụt n̄wan oro ọyọhọ ikpehe ekikere 6 ke page 4 ke ediye uduot ekpri n̄wed oro, emi etịn̄de n̄kpọ aban̄a ebiet emi ẹkpebọde nti item. Onyụn̄ esịn udọn̄ ọnọ enye ete okot mme ekikere oro ẹnọde ke ọyọhọ ukpepn̄kpọ 2 ẹban̄a nte ẹkpebọkde nditọ. N̄wan oro ama okop inemesịt etieti onyụn̄ ọbọ n̄wed oro.