“Bon Mme Owo Ọtọkiet”
1. Nso ke ikpọ mbono ye mbono ofụri ererimbot ẹda ẹbiet akpan mboho oro nditọ Israel ẹkenyenede esisịt ini ke mmọ ẹma ẹkewọrọ ke Egypt?
1 Esisịt ini ke nditọ Israel ẹma ẹkewọrọ ke Egypt, Jehovah ama ọdọhọ Moses ete ‘obon mme owo ọtọkiet’ ke Obot Sinai man ẹkop ikọ imọ, man mmọ ẹkpebak imọ ẹnyụn̄ ẹkpep nditọ mmọ mme usụn̄ imọ. (Deut. 4:10-13) Emi ama ọsọn̄ọ mbuọtidem mmọ, owo ikonyụn̄ isọpke ifre edinam emi! Ke ọfiọn̄ ifan̄ emi ẹdidide, ikọt Jehovah ẹyesop idem ọtọkiet ke ikpọ mbono ye mbono ofụri ererimbot man Jehovah ekpep mmọ n̄kpọ. Nso ke ana inam man inen̄ede ibọ ufọn ukpep emi?
2. Nso ke inyene ndinam man ‘iben̄e idem’ inọ mbono nnyịn?
2 ‘Ben̄e Idem’: Jehovah ama owụk nditọ Israel ete ‘ẹben̄e idem’ ẹnọ akpan mboho oro ke Obot Sinai. (Ex. 19:10, 11) Kpasụk ntre, oyom kpukpru nnyịn inen̄ede itịm idem, idịghe mbon emi ẹnyenede n̄kpọ ndinam ikpọn̄ ẹkpetịm idem. Ke uwụtn̄kpọ, oyoyom ediwak owo ẹdọhọ eteutom mmọ ọnọ mmimọ ini. Ekeme ndidi afo onyụn̄ etie nte Nehemiah. Enye ekedi akama-cup Edidem Artaxerxes, ndien enye okoyom ẹnọ imọ ini man itiene ika Jerusalem ikan̄wam ke ndibọp ibibene, edi enye ama ọfiọk ke ekeme ndidi Edidem idinyịmeke. Nehemiah ama ọbọn̄ akam, ekem enye etịn̄ eben̄e esie oro enye ama eketịm ekere. Ndien Edidem ama enyịme enye aka onyụn̄ ọnọ enye n̄kpọ ndida n̄kanam utom oro. (Neh. 2:1-9) Ke adianade ye afo ndiben̄e eteutom fo ini, kụt ete ke amanam ndutịm aban̄a n̄kpọisan̄ ye itieidụn̄. Mbiowo ẹyema ndin̄wam mbon oro ẹyomde un̄wam. Diomi ndisịm ke eti ini mbemiso edinam ọtọn̄ọde, nyụn̄ ben̄e idem ‘nditịm n̄kpan̄ utọn̄’ ke se edikopde.—Heb. 2:1.
3. Nso idin̄wam nnyịn itịm esịt nnyịn mbemiso ini mbono emi?
3 Akpan usụn̄ en̄wen oro anade iben̄e idem edi nditịm esịt nnyịn man ikeme ndikpan̄ utọn̄ ke se ẹtịn̄de nnyụn̄ mbọ ukpep. (Ezra 7:10) Ẹyesịn ndutịm mbono ke ikpehe Intanet jw.org/efi. Emi eyesịne ibuotikọ kpukpru utịn̄ikọ, ye akpan itie N̄wed Abasi kiet m̀mê iba oro ibuotikọ kiet kiet enemede. Emi edidi ata eti n̄kpọ ndida nnyene nneme ke mbubreyo Utuakibuot Ubon ke mme urua oro ẹkperede ini mbono nnyịn. Ndusụk mme asuanetop ẹsimịn̄ ndutịm emi ẹnyụn̄ ẹda mmọ ẹwet mme akpan n̄kpọ oro ẹdinemede ke ini mbono.
4. Didie ke mme ete ye eka ẹkeme ndida ini mbono n̄kpep nditọ mmọ n̄kpọ?
4 ‘Kpep Nditọ Fo’: Ntak kiet oro akanamde ẹnịm mbono oro ke Obot Sinai ekedi man nditọ Israel “ẹkpep nditọ mmọ” n̄kpọ. (Deut. 4:10) Mme ete ye eka ẹsinyene eti ifet ndinam ukem oro ke mme ini mbono. Mmọ ẹkpenyene ndinam nditọ mmọ ẹtie ye mmọ ke mme ini edinam ẹnyụn̄ ẹn̄wam mmọ ẹkpan̄ utọn̄ ke se ikade iso. Mme ubon ẹkeme nditie ọtọkiet nneme se ẹkekpepde ke mbono usen kiet kiet asuanade ndien ekem ẹneme ke ini utuakibuot ubon.
5. Didie ke nnyịn idibọ ufọn ke ndidụk mbono oro edide?
5 Akpan mboho oro ke Obot Sinai ama an̄wam nditọ Israel ndiwụt esịtekọm ke akwa ifet oro mmọ ẹkenyenede sia mmọ ẹkedide ikọt Abasi. (Deut. 4:7, 8) Kpasụk ntre, ẹdiomi mbono nnyịn oro edide man ibọ ufọn n̄ko. Nnyịn iyefre iban̄a idiọk ererimbot Satan emi ye akpakịp afanikọn̄ esie ke usen ita ika iketie ọtọkiet idia udia eke spirit inyụn̄ inyene eti ebuana ye nditọete nnyịn ke ndamban̄a paradise nnyịn. (Isa. 35:7-9) Sia usen Jehovah asan̄ade ekpere, ẹyak nnyịn isop idem ọtọkiet nte isinamde ke isua ke isua inyụn̄ isịn udọn̄ inọ nditọete nnyịn!—Heb. 10:24, 25.