Oyom Ọsọsọp Aka

Tọn̄ọ ikọtọn̄ọ ndida obufa ikpehe Intanet nnyịn nnam n̄kpọ, ata ediwak owo ẹsịn eben̄e ẹte ẹdikpep mmimọ Bible. N̄ko, ke ini inamde an̄wan̄wa unọ ikọ ntiense, ediwak owo ẹsidọhọ ke imoyom ẹdikpep mmimọ n̄kpọ. N̄kọk itieutom ẹsisọp ẹnam n̄kpọ man ẹn̄wam utọ mbon emi. Ke uwụtn̄kpọ, ke ini owo esịnde eben̄e ke jw.org oyom ukpepn̄kpọ Bible, esida n̄kọk itieutom usen iba kpọt ndinam mbiowo oro ẹdude ke efakutom owo emi ẹdiọn̄ọ ẹban̄a. Etop oro ẹbọde ke nsio nsio efakutom edi nte ke owo isikaha ibịne owo oro oyomde ukpepn̄kpọ Bible ke ediwak urua. Nso ke ikpanam man ikụt ke imaka ibịne owo oro ke ini enye osụk enyenede udọn̄ ndikpep Bible?—Mark 4:14, 15.

Edieke owo oro enyenede udọn̄ mîdụhe ke efakutom mbufo, sọsọp wet n̄kpọ yọhọ babru Please Follow Up (S-43) nyụn̄ kpọn̄ enye nọ ewetn̄wed esop mbufo ke mbono esop en̄wen. Ndien ke ufan̄ usen kiet m̀mê iba, ewetn̄wed esop ekpenyene ndisian esop oro enyenede efakutom emi owo oro odude mîdịghe aka ebiet oro ẹwetde Congregation ke jw.org n̄kọnọ etop emi ẹsọk n̄kọk itieutom. Mbiowo ẹkpenyene ndisise ikpehe Intanet kpukpru ini. Edieke mmọ ẹbọde etop oro ọdọhọde mmọ ẹkese owo, mmọ ẹkpenyene ndisọsọp nnam ẹka ẹbịne owo oro. Asuanetop ekededi oro ẹdọhọde aka ekese owo oro ekpenyene ndida emi nte ata akpan n̄kpọ. Edieke owo oro mîdụhe ke ufọk, emekeme ndiwet n̄kpọ nnịm nnọ enye onyụn̄ ewet nọmba fon fo m̀mê ebiet oro odụn̄de.