SE AKPANAMDE MAN ETRE NDISUA OWO

3 | Kûkere Mme N̄kpọ Emi Ẹdinamde Asua owo

Se Bible Ọdọhọde:

“Ẹkpụhọde oto ke edinam ekikere mbufo edi obufa, man mbufo ẹkpedomo ẹfiọk uduak Abasi eke edide eti onyụn̄ enemde enye esịt onyụn̄ ọfọnde ama.”—ROME 12:2.

Se Itien̄wed Emi Ọwọrọde:

Abasi ọdiọn̄ọ se ikerede. (Jeremiah 17:10) Inaha itịn̄ m̀mê inam n̄kpọ emi owụtde ke imasua owo, edi ikụreke ke oro. Usua esitọn̄ọ ke esịt. Ntre, ana isọsọp isio se ededi oro akpanamde itọn̄ọ ndisua owo ifep ke esịt nnyịn. Oro ediwụt ke imenen̄ede ikpụhọde, ke nnyịn inyụn̄ isuaha owo aba.

Se Akpanamde:

Nen̄ede tie kere nte afo esidade mbon en̄wen, akpan akpan mbon emi mîtoho edem mbufo. Bụp idemfo ete: ‘Nsida mmọ didie? Ndi se ndiọn̄ọde mban̄a mmọ anam nda mmọ ntre? Mîdịghe ndi nda mmọ ntre sia mmaha mmọ?’ Kûse fim kûnyụn̄ ukot n̄kpọ ke Intanet emi owụtde nte ẹsuade owo ẹnyụn̄ ẹnamde afai.

Ikọ Abasi ekeme ndin̄wam nnyịn itre ndisua owo

Isimemke utom ndinyịme ke nte idade mbon en̄wen ifọnke. Edi Ikọ Abasi ekeme ndin̄wam nnyịn idụn̄ọde idem nnyịn inyụn̄ ikpụhọde. (Mme Hebrew 4:12) Ntre ka iso kot Bible. Men se esikotde domo ye nte esikerede n̄kpọ nyụn̄ nam ofụri se ekemede man okụt ete ke se ekerede ekem ye se ekpepde ke Bible. Ikọ Abasi ekeme ndin̄wam nnyịn itre ndisua owo, ọkpọkọm usua ama enen̄ede adia nnyịn idem.—2 Corinth 10:4, 5.

Se Iketịbede—STEPHEN

Ama Okpụhọ Nte Enye Esikerede N̄kpọ

Mbon mbakara ẹma ẹsua Stephen ye mbonubon mmọ. Ndien oro ama anam Stephen ọtọn̄ọ ndinam n̄kpọ nte mbon n̄ka emi ẹsin̄wanade ẹyom unen owo. Nte ini akakade, enye ama esisịn ntịme ye mbon emi enye akasuade. Enye ọdọhọ ete: “Ami ye mme ufan mi ima isika ufọk fim ikese fim, ndien ndusụk ini ẹma ẹsisio nte mbakara ẹketụhọrede ifịn emi mmọ ẹkedepde ke Africa. N̄kpọ emi ama esiyat nnyịn tutu nnyịn itọn̄ọ ndimia nditọ mbakara oro ẹkedude do. Ekem ima isiwọrọ ika ebiet emi mbakara mbakara ẹdụn̄de ikoyom mbon en̄wen imia.”

Ini Stephen ọkọtọn̄ọde ndikpep Bible ye Mme Ntiense Jehovah, enye ama okpụhọ nte enye ekesikerede n̄kpọ. Enye ọdọhọ ete: “Se n̄kokụtde ke otu Mme Ntiense Jehovah ama akpa mi idem etieti sia mma n̄kụt asari toto ke edet iba. Ke uwụtn̄kpọ, ke ini Ntiense emi edide mbakara okoyomde ndika isan̄, enye ama ọdọhọ ubon emi ẹdide mbubịt owo ẹse nditọ imọ enyịn tutu imọ inyọn̄ idi. N̄ko, ubon emi ẹdide mbakara ẹma ẹnyịme eyen obubịt owo kiet odụn̄ ye mmọ sia enye mîkenyeneke ebiet ndidụn̄.” Emi ama anam Stephen okụt ke Mme Ntiense Jehovah ẹnen̄ede ẹma idemmọ nte Jesus eketịn̄de.—John 13:35.

Nso ikan̄wam Stephen etre afai onyụn̄ etre ndisua mme owo? Se Bible etịn̄de ke n̄wed Rome 12:2 ekenen̄ede an̄wam enye. Enye ọdọhọ ete: “Mma ndikụt ke ana n̄kpụhọde nte nsikerede n̄kpọ man n̄keme nditie emem emem; mma nnyụn̄ n̄kụt ke idụhe se ifọnde ntem.” Ebe isua 40 idahaemi tọn̄ọ Stephen eketre afai ye ndisua owo.