“Ẹnyene Ikike, Ẹnyụn̄ Ẹdu ke Ukpeme”

1. Nso ke Jesus eketịn̄ ye mme mbet esie aban̄a ini emi utịt edidide? Enye ọkọdọhọ mmọ ẹnam nso?

USEN ifan̄ mbemiso Jesus akpade, mbet esie inan̄ ẹma ẹkebụp enye ẹte: ‘Nso ididi idiọn̄ọ akpatre ini editịm n̄kpọ emi?’ (Matt. 24:3) Anaedi mme mbet oro ẹkekere nte mmọ ẹdisan̄ade ifiọk ini emi ẹdisobode Jerusalem ye temple esie. Ini Jesus ọbọrọde mbụme oro, enye iketịn̄ke iban̄a ini emi ẹdisobode Jerusalem ye temple esie kpọt, ama etịn̄ n̄ko aban̄a “akpatre ini editịm n̄kpọ emi,” emi idude uwem idahaemi. Kop se Jesus eketịn̄de aban̄a ini emi editịm n̄kpọ emi edisịmde utịt: “Baba owo kiet ifiọkke usen m̀mê hour oro, mme angel ke heaven ifiọkke, Eyen inyụn̄ ifiọkke, ke mîbọhọke Ete.” Ekem enye ama ọdọhọ kpukpru mme mbet esie “ẹdu ke edidemede” ẹfiak “ẹdu ke ukpeme.”​—Mark 13:32-37.

2. Ntak akanade mme Christian eyo mme apostle emi ẹkedide mme Jew ẹdu ke ukpeme?

² Akana mme Christian eyo mme apostle emi ẹkedide mme Jew ẹka iso ẹdu ke ukpeme man mmọ ẹkeme ndibọhọ. Jesus ama ọdọhọ mme mbet esie se mmọ ẹdidade ẹfiọk ke ẹmọn̄ ẹsobo Jerusalem ye temple esie. Enye ọkọdọhọ ete: “Ke ini mbufo ẹkụtde nte mbonekọn̄ ẹkande Jerusalem ẹkụk, ẹfiọk ndien ẹte n̄wụre esie asan̄a ekpere.” Ini oro ke akana mmọ ẹnam item Jesus ẹnyụn̄ “ẹfehe ẹka ikpọ obot.” (Luke 21:20, 21) Mbon oro ẹkenamde item oro ẹma ẹbọhọ ini mbon Rome ẹkedisobode Jerusalem.

3. Nso ke idineme ke ibuotikọ emi?

³ Se idodu emi, ẹmọn̄ ẹsosobo idiọk ererimbot emi. Ana nnyịn n̄ko itat enyịn ise se ikade iso, ifiak idu ke ukpeme. Ke ibuotikọ emi, imọn̄ ise nte ikemede ndinam n̄kpọ ke ifiọk ke adan̄aemi isụk isede se ikade iso ke ererimbot, nte ikpekpemede idem, ye mfọnn̄kan n̄kpọ emi ikpadade ini emi osụhọde mi inam.

NAM N̄KPỌ KE IFIỌK NTE OSỤK ESEDE SE IKADE ISO KE ERERIMBOT

4. Ntak ọkpọdọn̄de nnyịn ndikụt nte se ikade iso ke ererimbot ẹsude prọfesi Bible?

⁴ Enyene nti ntak emi ẹnamde iyom ndikụt nte se ikade iso ke ererimbot ẹsude prọfesi Bible. Ke uwụtn̄kpọ, Jesus ama etịn̄ mme n̄kpọ emi ẹdin̄wamde nnyịn ifiọk ke utịt ererimbot Satan emi enen̄ede ekpere. (Matt. 24:3-14) Apostle Peter ama ọdọhọ itịn̄ enyịn ise nte prọfesi Bible osude man ika iso ibuọt idem ye Jehovah. (2 Pet. 1:19-21) Akpa ufan̄ikọ ke akpatre n̄wed ke Bible ọdọhọ: “Ediyarade emi otode Jesus Christ, emi Abasi ọkọnọde enye, ete owụt ifịn esie mme n̄kpọ eke ẹditịbede ke mîbịghike.” (Edi. 1:1) Ntre, enen̄ede ọdọn̄ nnyịn ndikụt se ikade iso ke ererimbot ndinyụn̄ ndiọn̄ọ nte oro ekemede ndisu mme prọfesi Bible. Ekeme ndinyụn̄ ndọn̄ nnyịn ndineme mme n̄kpọ oro ye nditọete.

5. Nso ke nnyịn mîkpanamke? Nso ke ikpakam inam? (Se mme ndise n̄ko.)

⁵ Enyene n̄kpọ emi anade ikpeme ima ineme iban̄a prọfesi Bible. Inaha idọhọ ke edisu ntem m̀mê ntem, ke ini esop Abasi mîtịn̄ke kan̄a. Ntak edi ke nnyịn iyomke nditịn̄ n̄kpọ ndomokiet emi edinamde esop ẹkûdiana kiet. Ke uwụtn̄kpọ, imekeme ndikop nte ikpọ owo ukara ererimbot ẹdọhọde ke iyom ndinam emi ye oko man mfịna ntem etre, emem ye ifụre onyụn̄ odu. Utu ke nnyịn ndikere ke se mmọ ẹtịn̄de oro osu prọfesi emi odude ke 1 Thessalonica 5:3, ẹyak ikam idụn̄ọde se esop Abasi ẹtịn̄de ndondo emi ẹban̄a n̄kpọ oro. Edieke isitịn̄de se idude ke n̄wed esop Abasi, iyan̄wam nditọete ẹdiana kiet “ke nte [mmọ] ẹkerede n̄kpọ.”​—1 Cor. 1:10; 4:6.

6. Nso ke ikeme ndikpep nto 2 Peter 3:11-13?

⁶ Kot 2 Peter 3:11-13. Apostle Peter an̄wam nnyịn itịm ikere ntak emi iyomde ndidiọn̄ọ nte prọfesi Bible osude. Enye ọkọdọhọ ‘isọn̄ọ inyene edidu usen Jehovah ke ekikere.’ Ntak idịghe man idomo ndidiọn̄ọ “usen ye hour” emi Jehovah edinamde Armageddon an̄wana, akam edi man ida ini emi osụhọde mi idu edisana uwem inyụn̄ inam se iwụtde ke imeten̄e Abasi. (Matt. 24:36; Luke 12:40) Oro ọwọrọ yak inam se inende inyụn̄ ikụt ite ke ofụri se inamde inọ Jehovah edi ke ntak emi inen̄erede ima enye. Edi ana ikpeme idem man ikeme ndinam oro.

NNYỊN NDIKPEME IDEM ỌWỌRỌ NSO?

7. Didie ke ikpowụt ke imekpeme idem? (Luke 21:34)

⁷ Jesus ikọdọhọke mme mbet esie ẹtịn̄ enyịn ẹse se ikade iso ke ererimbot kpọt, ama ọdọhọ n̄ko yak mmọ ẹkpeme idem. Se idude ke Luke 21:34 anam oro enen̄ede an̄wan̄a. (Kot.) Jesus ọkọdọhọ ete: “Ẹkpeme idem.” Owo emi ekpemede idem edi owo emi adade-da okụt n̄kpọ ekededi emi ekemede ndinam enye okûdi ufan Jehovah aba, onyụn̄ anam se enye ekekeme ndifep utọ n̄kpọ oro. Enye ama anam ntre, Abasi iditreke ndima enye.​—N̄ke 22:3; Jude 20, 21.

8. Nso item ke apostle Paul ọkọnọ mme Christian?

⁸ Apostle Paul ama ọdọhọ mme Christian ẹkpeme idem. Ke uwụtn̄kpọ, enye ọkọdọhọ mme Christian ke Ephesus ete: “Ẹtịm ẹkpeme nte mbufo ẹsan̄ade, mbak ẹdisan̄a nte mbon ndisịme edi ẹsan̄a nte mbon ọniọn̄.” (Eph. 5:15, 16) Satan idehe idap-o, enye ke oyom nsio nsio usụn̄ ndinam nnyịn ikûdi ufan Jehovah aba. Oro anam Bible ọdọhọ ‘ika iso ifiọk se uduak Jehovah edide’ man ikeme ndikpeme idem ke mfịna ekededi emi Satan edimende ibịne nnyịn.​—Eph. 5:17.

9. Idinam didie idiọn̄ọ se Jehovah oyomde inam?

⁹ Idịghe kpukpru n̄kpọ emi ẹkemede ndinam nnyịn ikûdi ufan aba ye Jehovah ke Bible etịn̄. Ediwak ini, enyene mme n̄kpọ emi idibierede emi Bible mîtịn̄ke nnennen nnennen nte ẹkpenamde n̄kpọ oro. Man ikeme ndibiere n̄kpọ emi mîdịghe n̄kpọn̄ do nnyịn itua n̄kpọfiọk, ana ifiọk “uduak Jehovah” kaban̄a n̄kpọ oro. Se idin̄wamde nnyịn ifiọk uduak esie edi nnyịn ndisikot Bible kpukpru usen nnyụn̄ ntie n̄kere se ikotde. Nte uduak Jehovah an̄wan̄ade nnyịn aka, inyụn̄ idomode ndinyene “ekikere Christ,” ntre ke idisan̄a “nte mbon ọniọn̄” idem ke ini ibet mîdụhe ndidọhọ nnyịn ‘nam emi, kûnam oko.’ (1 Cor. 2:14-16) Enyene ndusụk n̄kpọ emi isisọpde idiọn̄ọ ke ẹyeda mfịna edi, edi onyụn̄ enyene ndusụk emi nnyịn mîsisọpke idiọn̄ọ.

10. Nso idi ndusụk n̄kpọ emi ẹkemede ndida mfịna ndi, emi anade ikpeme idem?

¹⁰ Ndusụk n̄kpọ emi ẹkemede ndida mfịna ndi, emi anade ikpeme idem ẹsịne ndibre ima ye owo emi mîdịghe n̄wan m̀mê ebe nnyịn, ndin̄wọn̄ mmịn m̀mê ndidia udia mbe ubọk, nditịn̄ ikọ emi etiede nte ẹkịm owo ke ikwa, ndise fim afai, ndise m̀mê ndikpan̄ utọn̄ n̄kop oburobụt n̄kpọ, ye mme n̄kpọ ntre. (Ps. 101:3) Devil emi edide asua nnyịn iduọkke odudu-o, enye adada ebet nsio nsio usụn̄ emi enye edidade inam nnyịn ikûdi ufan Jehovah aba. (1 Pet. 5:8) Nnyịn mîkpemeke, Satan ekeme ndinam ke isọn̄ esịt nnyịn, nnyịn itọn̄ọ ndisịn owo enyịn, ikari n̄kari, idiọk itọn̄, isua owo, iseri iseri, inyụn̄ isịn owo ke esịt. (Gal. 5:19-21) Nsonso oro, ekeme nditie nnyịn nte mme n̄kpọ emi idịghe idiọkn̄kpọ sia ẹsịnede nnyịn ke esịt kpọt. Nnyịn mîsọpke-sọp ision̄o mmọ ifep ke esịt nnyịn, edidi eyo esiere, mmọ ẹdọn̄ n̄kam ẹnyụn̄ ẹnọ nnyịn mfịna. Ẹditie nte mbiet emi esikọride ofụk eti n̄kpọ emi ẹketọde owot.​—Jas. 1:14, 15.

11. Tịn̄ n̄kpọ kiet emi edide owo mîtịmke ise ifiọkke ke mfịna ke edi. Ntak anade ikpeme idem ye n̄kpọ oro?

¹¹ N̄kpọ kiet emi edide edieke owo mîtịmke ise ifiọkke ke mfịna ke edi, edi idiọk nsan̄a. Yak idọhọ ke anam utom ye owo emi mîdịghe Ntiense Jehovah. Ndien sia oyomde enye ada Mme Ntiense Jehovah nte nti owo, afo esifọn uwem ye enye onyụn̄ an̄wam enye. Ama esịm ini nduọkodudu uwemeyo, afo etie ye enye ndusụk ini adia udia, mbufo ẹnyụn̄ ẹsat n̄kpri nneme ẹneme. Edi ibịghike, edidi kwa ini kwa ini mbufo mbiba ẹtie ẹdia, ẹneme. Ke ini ke ini enye osio oburobụt nneme ọtọ. Nsonso oro, afo amia nneme oro eberi. Edi aka ko, nneme oro emehe fi tutu idiọkke fi aba ke utọn̄. Usen kiet utom akasuana, enye ọdọhọ fi edi ikoyom ekpri n̄kpọ in̄wọn̄, afo enyịme etiene aka. Aka ko, afo ọtọn̄ọ ndikere n̄kpọ nte enye. Ekere ke edibịghi didie mbemiso editọn̄ọde ndinam n̄kpọ nte enye? Imesifọn ido inyụn̄ ikpono kpukpru owo; idiọkke. Edi ana iti ke idibiet owo ekededi emi isidụkde ndụk. (1 Cor. 15:33) Ikpekpeme idem nte Jesus ọkọdọhọde, nnyịn idisidụkke ndụk ye mbon emi mîdụhe uwem nte Jehovah ọdọhọde ẹdu. (2 Cor. 6:15) Iyokụt afanikọn̄ emi osụk efịtde edi do inyụn̄ ikọhọde.

MFỌNN̄KAN N̄KPỌ EMI AKPADADE INI FO ANAM

12. Nso ke akana mme mbet Jesus ẹnam nte mmọ ẹsụk ẹbetde nsobo Jerusalem ye temple esie?

¹² Ikanaha mbet Jesus ẹwawan̄ ubọk ẹtie nte mmọ ẹsụk ẹbetde nsobo Jerusalem ye temple esie. Jesus ama ọnọ mmọ utom ẹnam. Enye ọkọdọhọ mmọ ẹkwọrọ eti mbụk “ke Jerusalem ye ke ofụri Judea ye Samaria tutu esịm ata utịt ikpehe isọn̄.” (Utom 1:6-8) Idịghe ekpri utom ke Jesus ọkọnọ mmọ oro! Mfọnn̄kan n̄kpọ emi mmọ ẹkedade ini mmọ ẹnam ekedi ndisịn idem nnam se Jesus ọkọdọhọde mmọ oro.

13. Ntak anade ida ini nnyịn inam se ifọnde ikan? (Colossae 4:5)

¹³ Kot Colossae 4:5. Se idin̄wamde nnyịn ikpeme idem edi nditịm n̄kere se isidade ini nnyịn inam. N̄kpọ emi owo mîkodorike enyịn ekeme nditịbe nnọ owo nnyịn ekededi. (Eccl. 9:11) Imekeme ndikpa ke ini owo mîkodorike enyịn.

14-15. Nso idi mfọnn̄kan n̄kpọ emi ikpadade ini nnyịn inam? (Mme Hebrew 6:11, 12) (Se ndise n̄ko.)

¹⁴ Idida ini nnyịn inam se idide akpan n̄kpọ ikan edieke inamde se Jehovah ọdọhọde inam inyụn̄ inam se idinamde inen̄ede ikpere enye. (John 14:21) Ana ‘isọn̄ọ ida, ikûyak n̄kpọ esehede nnyịn, inyene ekese ndinam ke utom Ọbọn̄ kpukpru ini.’ (1 Cor. 15:58) Ima inam ntre, ekpededi n̄kpa ada nnyịn ke iso, mîdịghe nnyịn idu ikụt utịt ererimbot emi, nnyịn idibiomke ubọk ke ibuot idọhọ ubaha ekpedide ima inen̄ede isịn idem inam n̄kpọ Abasi.​—Matt. 24:13; Rome 14:8.

¹⁵ Jesus ke aka iso ada mme mbet esie usụn̄ yak mmọ ẹkwọrọ ẹban̄a eti mbụk Obio Ubọn̄ Abasi ke ofụri isọn̄. Enye anam udeme esie. Jesus ada mme mbono esop ye mme n̄wed esop Abasi ekpep nnyịn nte ikpọkwọrọde eti mbụk. Enye onyụn̄ ọnọ nnyịn kpukpru se iyomde man inam utom oro. (Matt. 28:18-20) Ima isịn idem ikwọrọ ikọ, ikpep mme owo n̄kpọ, inyụn̄ idu ke ukpeme ke adan̄aemi ibetde Jehovah edisobo editịm n̄kpọ emi, ọwọrọ imanam udeme nnyịn. Iyomụm idotenyịn nnyịn ikama ubọk ọsọn̄ “tutu esịm utịt” edieke inamde item emi odude ke Mme Hebrew 6:11, 12.​—Kot.

16. Nso ke ibiere ndinam?

¹⁶ Jehovah enenịm usen ye hour emi enye edisobode ererimbot Satan emi. Usen oro ama esịm, Jehovah ayanam kpukpru prọfesi emi ẹdude ke Ikọ esie ẹsu. Edi sia mîdịghe kan̄a, ekeme nditie nnyịn nte ke usen oro ebịghi akaha. Usen Jehovah “idibehe ini!” (Hab. 2:3) Ntre ẹyak ibiere ‘ndidori enyịn ke Jehovah’ ke adan̄aemi ‘itiede ibet Abasi edinyan̄a nnyịn.’​—Mic. 7:7.