Se Ifọnde ye Se Idiọkde: Ewe ke Edimek
Ediwak ini, se isibierede ndinam ekeme ndinam ikop inemesịt m̀mê ikûkop. Jehovah Abasi ọdiọn̄o oro, oro anam enye oyom nnyịn idu uwem nte enye oyomde.
Jehovah oyom nnyịn inyene emem inyụn̄ ikop inem uwem.
“Ami Jehovah, ndi Abasi fo, Enye emi ekpepde fi man afo ọbọ ufọn, Enye emi anamde fi asan̄a ke usụn̄ emi afo akpasan̄ade. Afo akpakam akpan̄ utọn̄ ke mme ewụhọ mi! Do emem fo ekpetie nte akpa mmọn̄, edinen ido fo okponyụn̄ etie nte mbufụt inyan̄.”—Isaiah 48:17, 18.
Nte Andibot nnyịn, Abasi ọdiọn̄ọ nte ikpodude uwem man ọfọn ye nnyịn. Enye ọdọhọ idu uwem nte imọ idọhọde sia oro ọyọfọn ye nnyịn. Edieke idude uwem nte Abasi ọdọhọde, idem idinyekke nnyịn m̀mê se ikebierede ndinam oro ọyọfọn. Iyesibiere se ifọnde, ndien oro oyonyụn̄ anam inyene emem inyụn̄ ikop inemesịt.
Jehovah idọhọke inam se isọn̄de ikan nnyịn.
“Ewụhọ emi ami n̄wụkde fi mfịn emi isọn̄ke ikan fi ndinam, inyụn̄ iyomke usụn̄.”—Deuteronomy 30:11.
Edieke iyomde ndidu uwem nte Abasi ọdọhọde, ekeme ndiyom ikpụhọde nte isikerede n̄kpọ inyụn̄ inamde n̄kpọ. Edi, se Jehovah ọdọhọde inam isọn̄ke ikan nnyịn. Sia Enye edide Andibot nnyịn, Enye ọdiọn̄ọ se nnyịn ikemede ndinam ye se nnyịn mîkemeke ndinam. Nte inen̄erede idiọn̄ọ Jehovah, iyedikụt ke “mme ewụhọ esie idobike owo mbiomo.”—1 John 5:3.
Jehovah ọn̄wọn̄ọ ndidiọn̄ mbon oro ẹmekde ndidu uwem nte enye ọdọhọde.
“Ami Jehovah Abasi fo mmụm fi ubọk nnasia, Enye emi ọdọhọde fi ete, ‘Kûfehe ndịk. Ami nyan̄wam fi.’”—Isaiah 41:13.
Imekeme ndidu uwem nte Jehovah ọdọhọde sia enye ọn̄wọn̄ọ ke iyan̄wam nnyịn. Enye esida Bible ọsọn̄ọ nnyịn idem, onyụn̄ anam inyene idotenyịn.
Ediwak miliọn owo ke ofụri ererimbot ẹdikụt ke ndidu uwem nte Bible ọdọhọde esinam uwem mmọ ọfọn. Ntre emekeme ndikpep nti item oro ọdọn̄ọde ke Bible. Tọn̄ọ ye ndikot ekpri ediye n̄wed emi Du Ata Uwem ke Nsinsi! Emekeme ndisio enye ke mfọn ke jw.org. Enye ọdọn̄ọ mme ibuotikọ emi:
Bible Ekeme Ndin̄wam Fi
Bible Ọnọ Nnyịn Idotenyịn
Ndi Emekere ke Se Bible Etịn̄de Edi Se Owo Ekpenịmde?
Nte odụn̄ọrede Ikọ Abasi, eyedikụt ke enye idịghe n̄wed eset; se enye etịn̄de edi se ‘ẹmụmde ẹkama ke nsinsi.’ (Psalm 111:8) Ndidu uwem nte Bible ọdọhọde ọfọn akan. Edi, Abasi isinyịkke nnyịn idu uwem nte enye ọdọhọde. (Deuteronomy 30:19, 20; Joshua 24:15) Ntre ana kpukpru nnyịn imek enye idinamde.