Ndi Emenyene Mbuọtidem?

Edieke iyomde ndinem Jehovah esịt, ana inyene mbuọtidem. Edi Bible ọdọhọ ke “idịghe kpukpru owo ẹnyene mbuọtidem.” (2 Thess. 3:2) Apostle Paul eketịn̄ aban̄a “mbon ibak ye mme idiọkowo” emi ẹkekọbọde enye, emi enye okoyomde ẹnyan̄a imọ ẹsio mmọ ke ubọk. Edi se enye eketịn̄de aban̄a mbuọtidem ikaban̄ake mmọ kpọt. Ndusụk owo ẹda enyịn mmọ ẹkụt mme n̄kpọ emi ẹwụtde ke Abasi emi okobotde kpukpru n̄kpọ do, edi mmọ ẹsịn ndinyịme ke Abasi do. (Rome 1:20) Mbon en̄wen ẹdọhọ ke sia inịmde ke enyene n̄kpọ m̀mê owo emi enyenede odudu akan nnyịn, ke oro ọwọrọ ke mmimọ imenyene mbuọtidem. Edi oro kpọt inamke mmọ ẹnyene utọ mbuọtidem emi anamde owo enem Jehovah esịt.

Ana inen̄ede inịm ke Jehovah do, ke enye ‘esinọ’ mbon emi ẹnyenede ata mbuọtidem utịp. (Heb. 11:6) Mbuọtidem esịne ke otu mme edu emi edisana spirit esie esinamde owo enyene. Ikpoyom ndinyene edisana spirit Jehovah, ana ibọn̄ akam idọhọ enye ọnọ nnyịn. (Luke 11:9, 10, 13) Akpan n̄kpọ en̄wen emi edinamde inyene spirit oro edi nnyịn ndikot Bible emi Abasi ọkọnọde spirit esie ẹda ẹwet, ekem ikere se ikotde, inyụn̄ idomo ndinanam se ikpepde. Ima inam ntre, spirit Jehovah ayan̄wam nnyịn idu uwem nte enye oyomde, ndien oro ayanam inyene mbuọtidem emi edinemde Jehovah esịt.