Nte Ekọn̄ ye En̄wan Ẹdisan̄ade Itre

ABASI OYOSOBO UKARA OWO OFỤRI OFỤRI EFEP

Abasi edida se Bible okotde ekọn̄ Armageddona isobo ukara owo ifep. (Ediyarade 16:16) Ini oro ama ekem, ẹyetan̄ “ndidem ofụri isọn̄” ẹbon ọtọkiet ẹnọ “ekọn̄ akwa usen Abasi Ata Ọkpọsọn̄.” (Ediyarade 16:14) Armageddon edi ekọn̄ emi Abasi edidade itre kpukpru ekọn̄.

Obio Ubọn̄ Abasi ayada itie ukara owo. Obio Ubọn̄ oro edidu ke heaven ikara isọn̄ emi, owo idinyụn̄ ikemeke ndisobo enye mfep tutu amama. (Daniel 2:44) Abasi emek Jesus Christ, Eyen esie, ndidi Edidem Obio Ubọn̄ oro. (Isaiah 9:6, 7; Matthew 28:18) Ukara oro edi Obio Ubọn̄b emi Jesus Christ ekekpepde mme mbet esie ndibọn̄ akam mben̄e. (Matthew 6:9, 10) Kpukpru owo ke ererimbot ẹdidu ke idak ukara oro, Jesus onyụn̄ edi Andikara.

Jesus iditiehe nte mbon oro ẹkarade idaha-emi. Enye ididaha odudu esie inam n̄kpọ ke ufọn idemesie. Sia Jesus mîsisarike owo mînyụn̄ iten̄eke owo enyịn, owo ndomokiet iditịmekede esịt ikere ke owo idaha imọ ke n̄kpọ ke ntak emi idide afia m̀mê obubịt, m̀mê ke ntak idụt m̀mê obio emi imọ itode. (Isaiah 11:3, 4) Mme owo idinyụn̄ in̄wanake iyom unen. Ntak-a? Sia Jesus eyekere aban̄a nte n̄kpọ etiede ye kpukpru owo. “Enye ayanyan̄a ubuene emi esemede oyom un̄wam, ye owo ukụt ye owo ekededi emi mînyeneke andin̄wam. . . . Enye ayafak ukpọn̄ mmọ osio ke ufịk ye afai.”​—Psalm 72:12-14.

Obio Ubọn̄ Abasi oyosobo kpukpru n̄kpọ-ekọn̄ oro ẹsidade ẹwot mme owo ke isọn̄ emi. (Micah 4:3) Enye oyonyụn̄ osobo kpukpru ndiọi owo oro mîyomke nditre en̄wan mînyụn̄ iyakke mbon en̄wen ẹdu ke emem. (Psalm 37:9, 10) Kpukpru owo, iren ye iban ye nditọwọn̄, idikopke ndịk ndika ebiet ekededi oro mmọ ẹyomde ndika ke isọn̄ emi.​—Ezekiel 34:28.

Ke ini Obio Ubọn̄ Abasi editọn̄ọde ndikara isọn̄ emi, mme owo ẹyekop inem uwem. Obio Ubọn̄ oro eyetre kpukpru mfịna oro ẹsinamde mme owo ẹn̄wana, utọ nte ubuene, biọn̄, ye unana itie ndidụn̄. Kpukpru owo ẹyenyene nti udia ẹdia ẹnyụn̄ ẹnyene eti itie ndidụn̄.​—Psalm 72:16; Isaiah 65:21-23.

Obio Ubọn̄ Abasi ọyọdiọn̄ kpukpru se ekọn̄ abiatde. Enye ayanam kpukpru mbon oro ẹkedade unan ye mbon oro ẹkebiomode ndo ẹfiak ẹkop nsọn̄idem. Edi ikụreke do, enye ayanam kpukpru mbon oro ẹkenyenede mfịna ibuot ye editimede esịt ke ntak ekọn̄ ẹkop nsọn̄idem n̄ko. Abasi ayanam idem mbon oro ẹkpan̄ade ẹfiak ẹset ẹdidu uwem ke isọn̄ emi. (Isaiah 25:8; 26:19; 35:5, 6) Mme owo ẹyefiak ẹkụt mbonubon mmọ oro ẹkekpan̄ade, mme owo idinyụn̄ itịghi aba kpukpru ndiọi n̄kpọ oro ẹketịbede ke ini ekọn̄ sia Bible ọdọhọ ke “n̄kani n̄kpọ ẹma ẹbe ẹfep.”​—Ediyarade 21:4.

ABASI OYOSIO IDIỌKN̄KPỌ EFEP

Obio Ubọn̄ Abasi ayanam kpukpru owo ẹdiana kiet ẹkpono ata Abasi, Jehovahc, kpa “Abasi ima ye emem.” (2 Corinth 13:11) Mme owo ẹyekpep ndidụn̄ kiet ke emem. (Isaiah 2:3, 4; 11:9) Kpukpru mbon oro ẹkopde uyo Abasi ẹyefọn ẹma ẹnyụn̄ ẹbọhọ ufen idiọkn̄kpọ.​—Rome 8:20, 21.

ABASI OYOSOBO SATAN YE MME DEMON ESIE

Obio Ubọn̄ Abasi oyosobo Satan ye mme demon esie emi ẹsisịnde nsọk ẹnọ mme owo ndin̄wana ekọn̄. (Ediyarade 20:1-3, 10) Sia mmọ mîdidụhe aba, “emem oyodu” ke ofụri isọn̄.​—Psalm 72:7.

Nịm ke Abasi eyetre ekọn̄ ye afai nte enye ọn̄wọn̄ọde. Enye enyene odudu nditre ekọn̄ onyụn̄ ọdọdọn̄ enye ndinam oro.

• Abasi enyene ọniọn̄ ye odudu ndida ntre ekọn̄ ye afai. (Job 9:4) Idụhe se isọn̄de enye ndinam.​—Job 42:2.

• Esibabiak Abasi ndikụt mme owo ẹbọde ufen. (Isaiah 63:9) Enye onyụn̄ “asasua owo ekededi eke amade afai.”​—Psalm 11:5.

• Abasi isitreke ndinam se enye ọn̄wọn̄ọde; enye isisụhu nsu.​—Isaiah 55:10, 11; Titus 1:2.