Kûbiat Ini Ndina Baptism

1. Tịn̄ ndusụk nti ntak emi akpanamde owo ana baptism.

NDI amama Jehovah Abasi emi ọnọde fi kpukpru nti enọ emi enyenede, sịm idem uwem emi osụk odude mi? Ndi omoyom ndiwụt ke amama enye? Mfọnn̄kan usụn̄ emi ekemede ndinam oro edi ndiyak idem nnọ enye, ekem ana baptism ndiwụt ke ama ayak idem ọnọ enye. N̄kpọ iba oro ayanam ẹtiene ẹbat fi ẹsịn ke ubon Jehovah. Ke ntak oro, Ete fo ye Ufan fo ayada fi usụn̄ onyụn̄ ese aban̄a fi sia enye edinyene fi idaha-oro. (Ps. 73:24; Isa. 43:1, 2) Ama ayak idem ọnọ Abasi onyụn̄ ana baptism, eyenyene idotenyịn ndidu uwem ke nsinsi, oyonyụn̄ okop inem uwem oro.​—1 Pet. 3:21.

2. Idineme nso ke ibuotikọ emi?

² Ndi enyene se ikpande fi ndina baptism? Ekpedi ntre, idịghe afo ikpọn̄ ke edi. Ediwak miliọn mme owo emi ẹkenade baptism mbemiso afo akana ẹkpụhọde edu mmọ ye nte mmọ ẹsikerede n̄kpọ man ẹdot ndina baptism. Idaha-emi mmọ ke ẹnam n̄kpọ Jehovah ye idatesịt, mmọ inyụn̄ idaha edem ke n̄kpọ Abasi. Nso ke ekeme ndikpep nto ndusụk owo emi ẹkenade baptism ke eyo mme apostle? Ẹyak ineme ndusụk n̄kpọ emi okoyomde ndikpaha mmọ ukot, inyụn̄ ise se ikemede ndikpep nto uwụtn̄kpọ mmọ.

MBON SAMARIA ẸMA ẸNA BAPTISM

3. Nso ye nso ikekeme ndikpaha ndusụk mbon Samaria ukot, iyakke mmọ ẹna baptism?

³ Ke eyo Jesus, mbon Samaria ẹma ẹnyene ido ukpono abasi eke mmọ. Ediwak mmọ ẹkedụn̄ ke Shechem ye Samaria, emi ẹkekperede edere edere Judea. Mbemiso mbon Samaria ẹkekemede ndina baptism, akana mmọ ẹnen̄ede ẹdiọn̄ọ ẹnyụn̄ ẹnyịme ofụri N̄wed Abasi emi okodude ini oro. N̄kukụre n̄wed ke Bible emi mbon Samaria ẹkenyịmede ke Abasi ọkọnọ spirit esie ẹwet ẹkedi akpa n̄wed ition ke Bible, oro edi, Genesis, Exodus, Leviticus, Numbers, ye Deuteronomy. Etie nte mmọ ẹma ẹnyịme n̄wed Joshua n̄ko. N̄kpọ en̄wen edi ke mmọ ẹma ẹdori enyịn ke Messiah ke edi, ke ntak se Abasi ọkọn̄wọn̄ọde ke Deuteronomy 18:18, 19. (John 4:25) Akana mmọ ẹnyịme ke Jesus edi Messiah emi ẹken̄wọn̄ọde man mmọ ẹdot ndina baptism. Se “ediwak mbon Samaria” ẹkenamde edi oro. (John 4:39) Etie nte mfịna emi mbon eken akanade ẹkan ubọk ekedi asari emi okodude ke ufọt mbon Samaria ye mme Jew. Asari okokop mi ama ọsọn̄ ubọk eti-eti.​—Luke 9:52-54.

4. Didie ke Utom 8:5, 6, 14 owụt se ndusụk mbon Samaria ẹkenamde ini mmọ ẹkopde ukwọrọ-ikọ Philip?

⁴ Nso ikan̄wam mbon Samaria ẹna baptism? Ini Philip emi ekedide ọkwọrọ eti mbụk ọkọkwọrọde ‘Christ ọnọ mmọ,’ ndusụk mbon Samaria ẹma “ẹbọ ikọ Abasi.” (Kot Utom 8:5, 6, 14.) Philip ekedi eyen Jew, edi mmọ ikayakke oro akpan mmọ ndikpan̄ utọn̄ nnọ enye. Ekeme ndidi mmọ ẹma ẹti mme ufan̄ikọ ke akpa n̄wed ition ke Bible, emi ẹdọhọde ke Abasi isinamke asari. (Deut. 10:17-19) M̀mê enye oro ekedi ntak-o m̀mê ikedịghe, mmọ ẹma ‘ẹnọ ntịn̄enyịn ke se Philip eketịn̄de’ aban̄a Christ ẹnyụn̄ ẹkụt n̄kpọ emi ekenen̄erede owụt ke Abasi ọkọdọn̄ Philip edikwọrọ ikọ ọnọ mmimọ. Philip ama onyụn̄ anam ediwak utịben̄kpọ, utọ nte ndikọk mme owo udọn̄ọ nnyụn̄ nsion̄o mme owo demon ke idem.​—Utom 8:7.

5. Nso ye nso ke ekeme ndikpep nto mbon Samaria?

⁵ Mbon Samaria oro ẹkpekeyak asari m̀mê ukpepn̄kpọ emi mmọ mîkopke akanam akpan mmọ ndikpep n̄kpọ nto Philip. Edi mmọ ikayakke utọ n̄kpọ oro etịbe. Mbon Samaria ikabiatke ini ndina baptism ke mmọ ẹma ẹkenen̄ede ẹkụt ke Philip ekekpep mmimọ akpanikọ. Mbụk oro ke Bible ọdọhọ ete: “Ke ini mmọ ẹnịmde Philip, emi akatan̄ade eti mbụk aban̄ade obio ubọn̄ Abasi ye enyịn̄ Jesus Christ, ke akpanikọ, mmọ ẹna baptism, iren ye iban.” (Utom 8:12) Ndi emenen̄ede enịm ke Ikọ Abasi edi akpanikọ, ke Mme Ntiense Jehovah isinamke asari, ke mmọ ẹsinyụn̄ ẹdomo ndiwụt ke ima kiet eken ata ima, ke ima oro onyụn̄ owụt ke mmọ ẹdi ata mme Christian? (John 13:35) Ekpedi ntre, nyene uko nam se akpanade anam nyụn̄ nịm ke Jehovah ọyọdiọn̄ fi.

6. Didie ke uwụtn̄kpọ Ruben ekeme ndin̄wam fi?

⁶ Ruben emi otode Germany okokpon ke ufọk emi kpukpru mmọ ẹdide Mme Ntiense Jehovah. Edi ini enye edide akparawa, enye ikenen̄ekede inịm ke Jehovah do. Nso ikan̄wam enye? Enye ama edikụt ke imọ inen̄ekede idiọn̄ọ n̄kpọ iban̄a Jehovah, onyụn̄ ebiere ndinen̄ede ndiọn̄ọ n̄kpọ mban̄a enye. Enye ọkọdọhọ ete: “Ini n̄ketiede ke idemmi n̄kpep Ikọ Abasi, akana ndomo ndidiọn̄ọ se idide akpanikọ ye se mîdịghe akpanikọ mban̄a n̄kpọ oro. Ediwak ini, akana nnam ndụn̄ọde mban̄a ukpepn̄kpọ emi ọdọhọde ke mme n̄kpọ ẹkefoforo.” Enye ama okot n̄wed Is There a Creator Who Cares About You? N̄wed oro ama an̄wam Ruben tutu. Enye ama etie ekere ke idemesie ete: ‘Hau! Jehovah mmọdo.’ Ini Ruben akakade ekese ibuot itie-utom Mme Ntiense Jehovah, se enye okokụtde do ama anam enye enen̄ede ama nte kpukpru nditọ-ete ke ererimbot ẹdianade kiet. Ini Ruben afiakde ọnyọn̄ Germany, enye ama akana baptism ini enye edide isua 17. Ekpedi enyene se afo ekpepde ke Bible emi eyịkde, da mme n̄wed esop Abasi nam ndụn̄ọde ban̄a n̄kpọ oro. “Nnennen ifiọk” ekeme ndin̄wam fi okûyịk n̄kpọ oro aba. (Eph. 4:13, 14) Nte osụk okopde nsio nsio mbụk emi aban̄ade utọ ima ye edidianakiet emi odude ke otu ikọt Jehovah ke mme ikpehe efen ke ererimbot onyụn̄ okụtde ukem oro ke esop mbufo, eyenen̄ede ama kpukpru nditọ-ete ke ofụri ererimbot.

SAUL OWO TARSUS AMA ANA BAPTISM

7. Nso ke Saul ekesikere emi akanade enye okpụhọde?

⁷ Kere ban̄a uwụtn̄kpọ Saul owo Tarsus. Ẹma ẹnen̄ede ẹkpep enye Ibet mme Jew, enye ama onyụn̄ ọdiọn̄ọ Ibet oro eti-eti. Enye ikedịghe kwe-kwe-kwe eyen Jew; okoto ubon emi ẹwọrọde iso. (Gal. 1:13, 14; Phil. 3:5) Ini ediwak mme Jew ẹkedade mme Christian nte mbon emi ẹkekpọn̄de ata Abasi, Saul ama ọkọbọ mme Christian n̄kpa n̄kpa. Enye ekekere ke inam uduak Abasi, edi enye ikenenke. (Utom 8:3; 9:1, 2; 26:9-11) Akana Saul ke idemesie enyịme ukọbọ emi ẹdikọbọde enye edieke enye okoyomde ndibuọt idem ye Jesus onyụn̄ oyom ndina baptism n̄kabade Christian.

8. (a) Nso ikan̄wam Saul ana baptism? (b) Utom 22:12-16 ọdọhọ ke didie ke Ananias akan̄wam Saul? (Se ndise n̄ko.)

⁸ Nso ikan̄wam Saul ana baptism? Ini Ọbọn̄ Jesus emi ẹma ẹkenam eset owụtde Saul idem, Saul ikekwe usụn̄ aba. (Utom 9:3-9) Ke ofụri usen ita, enye ama etie utre-udia. Imenịm ke enye ama ada ini oro etie ekere se iketịbede inọ enye usen ita emi ekebede. Saul ama edinen̄ede enịm ke Jesus ekedi Messiah, ke mme mbet Jesus ẹkekpono ata Abasi. Ana-edi Saul ama enen̄ede ofụhọ nte enye ekenyenede ubọk ke n̄kpa Stephen! (Utom 22:20) Ke usen ita oro ama ekebe, mbet Jesus kiet emi ekekerede Ananias ama aka ebịne Saul, anam n̄kpọ ye enye ufan ufan, atat enye enyịn, onyụn̄ ọdọhọ enye ana baptism, okûbiat ini. (Kot Utom 22:12-16.) Saul ama osụhọde idem enyịme ẹn̄wam enye onyụn̄ ọtọn̄ọ obufa uwem.​—Utom 9:17, 18.

9. Nso ye nso ke ekeme ndikpep nto Saul?

⁹ Enyene nsio nsio n̄kpọ emi ikemede ndikpep nto Saul. Enye akpakayak ntan̄idem m̀mê enye ndifehe owo enyịn akpan enye ndina baptism. Edi enye ikayakke utọ n̄kpọ oro etịbe. Ini Saul enyịmede akpanikọ emi aban̄ade Christ, enye ama osụhọde idem enyịme ndikpụhọde se enye akadade uwem esie anam. (Utom 26:14, 19) Saul ama enyịme ndikabade Christian kpa ye edide enye ama ọdiọn̄ọ ke ẹyekọbọ imọ. (Utom 9:15, 16; 20:22, 23) Ke enye ama akana baptism, enye ama aka iso eberi edem ke Jehovah yak an̄wam enye ọyọ nsio nsio mfịna emi ẹkesịmde enye. (2 Cor. 4:7-10) Ama ana baptism akabade edi Ntiense Jehovah, oro ekeme ndidi ntak idomo mbuọtidem m̀mê nsio nsio mfịna emi ẹdisịmde fi. Edi mbon emi ẹdin̄wamde fi mmọdo. Nen̄ede nịm ke Abasi ye Christ iditreke ndin̄wam fi.​—Phil. 4:13.

10. Didie ke mbụk Anna ekeme ndin̄wam fi?

¹⁰ Anna okokpon ke Eastern Europe. Enye ye mbonubon mmọ ẹdi mbon Kurd. Ke eka Anna ama akana baptism, ete Anna ama enyịme Anna ọtọn̄ọ ndikpep Bible ini enye edide isua 9. Edi n̄kpọ oro ama anam enye enyene mfịna ye iman mmọ emi ẹkedụn̄de ye mmọ. Iman mmọ ẹkeda ke owo ndikpọn̄ ido ukpono mme ete-ete esie edi ndiyet ubon ndọk. Ini Anna edide isua 12, enye ama ọkọdọhọ ete esie ke imọ iyom ndina baptism, m̀mê enye enyịme. Ete esie okoyom ndidiọn̄ọ m̀mê enye ebiere ke idemesie ndinam ntre, m̀mê ẹnyenyịk enye. Anna ama ọbọrọ ete esie ete, “Mmama Jehovah.” Ete esie ama enyịme enye ana baptism. Ke Anna ama akana baptism ama, iman mmọ ẹma ẹsak enye ẹnyụn̄ ẹfiomo enye ke nsio nsio usụn̄. Owo mmọ kiet ọkọdọhọ enye ete: “Afo ndidi adan̄ ye enye emi, adan̄ ye enye oko, ọn̄wọn̄ sika, ọn̄wọn̄ se akpamama ọfọn akan afo ndidi Ntiense Jehovah.” Anna ekekeme didie ndiyọ kpukpru oro? Enye ọkọdọhọ ete: “Jehovah ama an̄wam mi onyụn̄ ọsọn̄ọ mi idem. Ete ye eka mi ẹma ẹberi mi edem eti-eti.” Anna esiwewet nsio nsio ini emi enye okụtde ubọk Jehovah ke uwem esie enịm. Ke ini ke ini, enye esimen se enye ekewetde ese man enye idifre nte Jehovah an̄wamde enye. Edieke ndịk anamde fi ke ẹyekọbọ fi, ti ke Jehovah ayan̄wam fi n̄ko.​—Heb. 13:6.

CORNELIUS AMA ANA BAPTISM

11. Nso ye nso ikpakanam Cornelius emen̄e ndina baptism?

¹¹ Mbụk owo efen emi Bible ọnọde nnyịn edi Cornelius. Enye ekedi “akwa owoekọn̄” emi ekesede aban̄a n̄kpọ nte mbonekọn̄ Rome 100. (Utom 10:1) Ọwọrọ enye ekedi ọwọrọ-iso owo, ikonyụn̄ idịghe ekpri owo ke ekọn̄. Enye ama “esinọ mme owo ediwak enọ mbọm.” (Utom 10:2) Jehovah ama ọdọn̄ apostle Peter ọkọkwọrọ eti mbụk ọnọ enye. Ndi Cornelius ama ayak se enye ekedide anam enye emen̄e ndina baptism?

12. Nso ikan̄wam Cornelius ana baptism?

¹² Nso ikan̄wam Cornelius ana baptism? Bible ọdọhọ ke enye ekedi owo emi “abakde Abasi ọkọrọ ye ofụri mbonufọk esie.” N̄kpọ efen edi ke Cornelius ama esibọn̄ akam ekpe Abasi ubọk kpukpru ini. (Utom 10:2) Ini Peter ọkwọrọde eti mbụk ọnọ Cornelius, enye ye ofụri ubon esie ẹma ẹnyịme Christ ẹnyụn̄ ẹna baptism, ibiatke ini. (Utom 10:47, 48) Imenịm ke Cornelius ama eben̄e idem ndikpụhọde se ededi emi ẹkpeyomde enye okpụhọde man enye ye mbonubon esie ẹtuak ibuot ẹnọ Jehovah.​—Josh. 24:15; Utom 10:24, 33.

13. Nso ye nso ke ekeme ndikpep nto Cornelius?

¹³ Kpa nte okonyụn̄ edide ye Saul, Cornelius akpakayak se enye ekedide akpan enye ndikabade ndi Christian. Edi enye ikayakke utọ n̄kpọ oro etịbe. Ndi mme n̄kpọ emi anade okpụhọde man ekeme ndidot ndina baptism ẹdi ikpọ n̄kpọ? Ekpedi ntre Jehovah mmọdo, enye ayan̄wam fi. Jehovah ọyọdiọn̄ fi nte ebierede ndinam se Bible etịn̄de man ekeme ndinam n̄kpọ nnọ enye.

14. Didie ke mbụk Tsuyoshi ekeme ndin̄wam fi?

¹⁴ Tsuyoshi emi otode Japan akana osion̄o ubọk ke ndusụk n̄kpọ emi enye ekesinamde ke utom esie man odot ndina baptism. Enye ekedi udiana etubom ke ufọkn̄wed ke Ikenobo emi ẹkesikpepde mme owo nte ẹkpebonde flawa yak eye odụk owo enyịn. Etubom ufọkn̄wed oro mîkemeke ndika edinam ubụkowo, Tsuyoshi ekesiwak ndika ke ibuot esie, ama esinyụn̄ etiene anam mme n̄kpọ emi mbon ido ukpono Buddha ẹkesinamde. Edi ini Tsuyoshi ekedidiọn̄ọde se Bible ekpepde aban̄a n̄kpa, enye ama edikụt ke edieke imọ ikade iso inam n̄kpọ mbon Buddha oro, ke imọ ididotke ndina baptism. Ntre enye ama ebiere ke imọ idisitieneke inam n̄kpọ oro aba. (2 Cor. 6:15, 16) Tsuyoshi ama ekeneme n̄kpọ oro ye etubom ufọkn̄wed oro. Utịp ekedi nso? Ẹma ẹyak Tsuyoshi aka iso anam utom esie, edi enye ikesitieneke isịn ubọk ke n̄kpọ mbon Buddha oro aba. Ke n̄kpọ nte isua kiet ama ekebe tọn̄ọ enye ọkọtọn̄ọ ndikpep Bible, enye ama ana baptism.a Ekpedi se okpụhọde ndusụk se esinamde ke utom fo man enem Jehovah Abasi esịt, nen̄ede nịm ke enye ayanam afo ye mbonubon fo ẹnyene se ẹdade ẹdu uwem.​—Ps. 127:2; Matt. 6:33.

MBON CORINTH ẸMA ẸNA BAPTISM

15. Nso ye nso ikpekekeme ndikpaha mbon Corinth ukot, iyakke mmọ ẹna baptism?

¹⁵ Mbon Corinth ke eset ẹkedi mbon emi ẹmade inyene eti-eti; oburobụt ido eke mmọ ama onyụn̄ enyene ndịk. Ediwak mbon emi ẹkedụn̄de do ẹkedu uwem emi Abasi mîmaha. Imenen̄ede ikụt do ke ndikenyịme eti mbụk ke utọ obio oro ekedi ekọn̄. Edi ini apostle Paul akade obio oro ọkọkwọrọ eti mbụk aban̄a Christ, “ediwak mbon Corinth emi ẹkekopde [ẹma] ẹtọn̄ọ ndinịm ke akpanikọ ẹnyụn̄ ẹna baptism.” (Utom 18:7-11) Ekem Ọbọn̄ Jesus Christ ama owụt Paul idem ke n̄kukụt onyụn̄ ọdọhọ enye ete: “Mmenyene ediwak owo ke obio emi.” Ntre Paul ama odu do aka iso ọkwọrọ ikọ ke isua kiet ye ubak.

16. Nso ikan̄wam ndusụk owo ke Corinth ẹkan mme n̄kpọ emi ẹkeyomde ndikpan mmọ ndina baptism? (2 Corinth 10:4, 5)

¹⁶ Nso ikan̄wam mbon Corinth ẹna baptism? (Kot 2 Corinth 10:4, 5.) Ikọ Abasi ye okopodudu edisana spirit Abasi ama an̄wam mmọ ẹkpụhọde ke usụn̄ emi akakpade owo idem. (Heb. 4:12) Mbon Corinth emi ẹkenyịmede eti mbụk emi aban̄ade Christ ẹma ẹkeme nditre utọ ido nte ndikpa mmịn, ndiyịp inọ, erenowo ndidan̄ ye erenowo, ye n̄wan ndidan̄ ye n̄wan.​—1 Cor. 6:9-11.b

17. Nso ke ekeme ndikpep nto mbon Corinth?

¹⁷ Omokụt do ke kpa ye emi ndusụk owo ke Corinth ẹkenade ẹkan mme ido emi ama ọkọdọn̄ mmọ n̄kam ke idem, ke mmọ ikọdọhọke ke mmimọ idikemeke ndidi Christian, ke ọsọn̄ akaha. Mmọ ẹma ẹsịn ibuot ẹsịn itọn̄ ẹnam se akanade mmọ ẹnam man ẹkeme ndisan̄a ke mfafaha usụn̄ emi adade esịm nsinsi uwem. (Matt. 7:13, 14) Ndi enyene idiọkn̄kpọ emi emehede fi m̀mê idiọk uwem emi osụk etịmede ndikan ubọk man odot ndina baptism? Ka iso tịme, kûyak idem emem fi! Kpe Jehovah ubọk ete ọnọ fi edisana spirit esie yak an̄wam fi yak edi idiọkn̄kpọ ama ọdọn̄ fi, afo ekeme ndikan enye ubọk.

18. Didie ke mbụk Monika ekeme ndin̄wam fi?

¹⁸ Monika emi otode Georgia ama etịme eti-eti man enye esitre ndikpe ntịme onyụn̄ etre ndise m̀mê ndikpan̄ utọn̄ n̄kop n̄kpọ emi mîfọnke man enye odot ndina baptism. Enye ọkọdọhọ ete: “Ini n̄kedide n̄ka-iferi, akam akan̄wam mi n̄kpụhọde. Jehovah ama ọdiọn̄ọ ke nyom ndinam nnennen n̄kpọ, ntre enye ama esin̄wam mi onyụn̄ ada mi usụn̄.” Monika akana baptism ini enye edide isua 16. Ndi enyene ndiọi n̄kpọ emi anade osion̄o ubọk ọkpọn̄ man ekeme ndinam n̄kpọ nnọ Jehovah nte enye oyomde? Ka iso dọhọ enye ọsọn̄ọ fi idem yak okpụhọde. Jehovah esitatat ubọk ọnọ mme owo edisana spirit esie.​—John 3:34.

MBUỌTIDEM FO EKEME NDIWỤHỌDE IKPỌ OBOT

19. Nso ikeme ndin̄wam fi akan mme mfịna emi ẹtiede nte ikpọ obot? (Se ndise n̄ko.)

¹⁹ Mbọk nen̄ede nịm ke Jehovah ama fi onyụn̄ oyom fi esịne ke ubon esie. Enye oro edi akpanikọ inamke n̄kpọ m̀mê nso ye nso isụk idomo ndinam ọsọn̄ fi ndina baptism. Jesus ọkọdọhọ ndusụk mme mbet esie ke eyo mmọ oro ete: “Edieke mbufo ẹnyenede mbuọtidem eke ekpride nte n̄kpasịp mustard, mbufo ẹyedọhọ obot emi ẹte, ‘Wụhọde mi kowụhọ ko,’ ndien enye oyowụhọde, n̄kpọ ndomokiet idinyụn̄ isọn̄ke ikan mbufo.” (Matt. 17:20) Mbon emi ẹkedude ẹkop ikọ oro akana ẹka iso ẹnam n̄kpọ man mmọ ẹtetịm ẹnyene mbuọtidem sia isua ifan̄ kpọt ekebe tọn̄ọ mmọ ẹketọn̄ọ ndidi mbet Jesus. Edi Jesus ama anam mmọ ẹkụt ke edieke mmọ ẹnyenede mbuọtidem yak ekem, ke Jehovah ayan̄wam mmọ ẹkan mme mfịna emi ẹtiede nte ikpọ obot. Jehovah oyonyụn̄ an̄wam fi anam ukem oro!

20. Didie ke uwụtn̄kpọ mme Christian ke eyo mme apostle ye mme Christian mfịn, emi inemede ke ibuotikọ emi ẹnam ọdọn̄ fi ndinam se akpanade anam?

²⁰ Ekpedi omokụt mme n̄kpọ ke uwem fo emi ẹkpande fi ndina baptism, sọsọp nam n̄kpọ man akan mme n̄kpọ oro ubọk. Yak uwụtn̄kpọ mme Christian ke eyo mme apostle ye mme Christian mfịn ọdọn̄ fi esịt onyụn̄ ọsọn̄ọ fi idem. Akam nnyịn edi yak uwụtn̄kpọ mmọ ọsọn̄ọ fi idem onyụn̄ anam ọdọn̄ fi ndiyak idemfo nnọ Jehovah nnyụn̄ nna baptism. Mfọnn̄kan n̄kpọ emi ekemede ndibiere ndinam edi oro!