Mme Mbụme Oro Mme Andikot Ẹbụpde
Nso utọ “ekikere” ke Jehovah edisịn mme idụt ke esịt ekpri ini ke iso?
Se mi se Bible etịn̄de aban̄a ntọn̄ọ akwa ukụt. Ediyarade 17:16, 17 ọdọhọ: “Nnụk duop oro afo okokụtde, ye idiọk unam oro, mmọ ẹyesua akpara oro ẹnyụn̄ ẹsobo enye ẹnyụn̄ ẹnịm enye iferi, ẹnyụn̄ ẹta obụkidem esie ẹnyụn̄ ẹfọp enye ke ikan̄ ofụri ofụri. Koro edi Abasi ekesịn emi ke esịt mmọ ete ẹnam ekikere imọ, oro edi, ẹnam ekikere kiet ke ndida obio ubọn̄ mmọ nnọ idiọk unam oro.” Ke ini edem, mme n̄wed nnyịn ẹkesidọhọ ke “ekikere” emi Jehovah edisịnde mme idụt ke esịt edidi yak mmọ ẹsobo nsunsu ido ukpono.
Edi, edi se ikpụhọde se ikesikpepde oro. “Ekikere” emi Jehovah edisịnde mme idụt ke esịt edidi yak mmọ ẹyak “obio ubọn̄ mmọ [ẹnọ] idiọk unam oro.” Ẹyak ineme mme mbụme emi ẹtienede mi man an̄wan̄a nnyịn nte oro edisan̄ade isu.
Mme n̄kpọ emi ẹtịn̄de ẹban̄a ke prọfesi oro ẹda ẹban̄a nso? “Akpara oro,” emi ẹkotde enye n̄ko “Akwa Babylon” ada aban̄a kpukpru nsunsu ido ukpono. “Ididuot idiọk unam” oro ada aban̄a esop emi ẹketọn̄ọde ke 1919 man ẹnam emem odu ke ofụri ererimbot. Ẹkesikot enye Esop Ediomi Mme Idụt, edi ẹkot idaha-emi Esop Edidiana Mme Idụt. (Edi. 17:3-5) “Nnụk duop oro” ada aban̄a kpukpru ukara emi ẹberide idiọk unam oro edem.
Akpara oro abuana nso ye ididuot idiọk unam oro? Idịghe mfịn ke akpara oro ọkọtọn̄ọ ‘nditie ke enyọn̄’ idiọk unam oro. Enye eberi unam oro edem onyụn̄ odomo ndinam enye anam se ededi emi enye oyomde; enye akam akara unam oro.
Nso iditịbe inọ akpara oro? Idiọk unam oro ye nnụk duop emi ẹberide enye edem “ẹyesua akpara oro.” Nte mmọ ẹdiwụtde usua emi mmọ ẹsuade enye edidi mmọ ndifịk enye mbọ kpukpru inyene esie nnyụn̄ nyarade kpukpru ibak emi enye esibakde. Jehovah ọkọdọhọ ke mmọ ẹyesobo enye. Mmọ ẹyenyụn̄ enam ntre, ẹsobo enye ẹfep. (Edi. 17:1; 18:8) Utịt kpukpru nsunsu ido ukpono edidi oro. Edi, mbemiso oro etịbede, Jehovah ayanam mme idụt ẹnam n̄kpọ emi mîtịbeke kan̄a tọn̄ọ mme owo ẹketọn̄ọ ndikara ukara.
Nso ke Jehovah edinam mme idụt ẹnam? Enye eyesịn nnụk duop oro ‘ekikere esie’ ke esịt, ekikere oro edidi yak “mmọ ẹyak odudu ye ukara mmọ ẹnọ [ididuot] idiọk unam oro,” oro edi Esop Edidiana Mme Idụt. (Edi. 17:13) Kere se oro ọwọrọde-o. Ndi ukara owo ẹditie ntem ke idem mmọ ẹbiere ndiyak odudu ye ukara mmọ nnọ idiọk unam oro? Ihih-o! Prọfesi oro ọdọhọ ke Abasi ke idemesie edinam mmọ ẹnam oro. (N̄ke 21:1; men Isaiah 44:28 domo.) Ndi oro ọwọrọ ke ẹdikpụhọde ukara sụn̄sụn̄? Ihih-o! Se prọfesi oro etịn̄de owụt ke edi n̄kpọ emi editịbede inikiet inikiet, usọp usọp. Ekem idiọk unam emi ẹnọde obufa odudu do oyosobo kpukpru nsunsu ido ukpono efep fap-fap, kpa nte Jehovah ekebierede ete etịbe.
Nso ndien ke ikeme ndidori enyịn ndikụt? Ẹyak ikûdori enyịn ite ke iyokụt mme mbụk n̄kpọntịbe emi ẹdọhọde nte ukara ẹtọn̄ọde sụn̄sụn̄ sụn̄sụn̄ ndiberi Esop Edidiana Mme Idụt edem. Se ikemede ndidori enyịn ndikụt edi emi: Itibọp enyịn itat, Jehovah eyesịn ekikere ke esịt mme idụt ete mmọ ẹyak odudu mmọ ẹnọ idiọk unam oro. Mmọ ẹma ẹnam ntre, iyọdiọn̄ọ ke akwa ukụt ọmọn̄ ọtọtọn̄ọ. Edi kan̄a ke emi, “ẹyak nnyịn itaba idap inyụn̄ inyene ikike” koro idibịghike n̄kpọ ọmọn̄ okpụhọde usọp usọp!—1 Thess. 5:6.