‘Ẹmụm Edidianakiet Eke Spirit Ẹkama’

“Edidianakiet” emi inyenede oto “spirit.” Oro ọwọrọ ke ikeme ndidiana kiet ke ntak emi inyenede spirit Abasi. Edi se Paul eketịn̄de anam ikụt ke ana ẹnam n̄kpọ man ika iso idiana kiet. Anie edinam? Christian kiet kiet ana anam udeme esie “ndimụm edidianakiet eke spirit n̄kama.”

Yak inọ uwụtn̄kpọ yak an̄wan̄a. Yak idọhọ ke owo ọnọ fi obufa moto, anie edisitịm moto oro ikama man idibiara? Enye oro idịghe se ẹkpebobụp. Akpasana moto oro ayak usehe uban̄a ndien enye abiara, udûkemeke ndiduọhọ owo emi ọkọnọde fi moto oro.

Ukem oro n̄ko ke edi ye edidianakiet emi itịn̄de iban̄a mi. Nte nnyịn mme Christian idianade kiet edi enọ emi Jehovah ọnọde nnyịn, ntre edi utom nnyịn owo kiet kiet ndikụt ete ke n̄kpọ idian̄akede nnyịn. Edieke inyenede mfịna ye brọda m̀mê sista, edi se ibụpde idem nnyịn ite, ‘Ndi mmanam se n̄kemede ndibiere mfịna oro man n̄ka iso mmụm edidianakiet eke spirit n̄kama?’

‘SỊN IFỊK N̄WANA’ NDIMỤM EDIDIANAKIET N̄KAMA

Kpa nte Paul ama eketetịn̄, ndusụk ini ekeme ndidi se inen̄ede isịn idem inam n̄kpọ man imụm edidianakiet eke spirit ikama, akpan akpan ekpedi brọda m̀mê sista edue nnyịn. Ndi ndimụm edidianakiet n̄kama ọwọrọ ke kpukpru ini emi owo eduede nnyịn, ke ana ika ibịne enye ikeneme n̄kpọ oro? Inen̄ekede idi ntre-o. Bụp idemfo ete: ‘N̄kposụk nyịre ndineme n̄kpọ oro ye enye, ndi oro ayanam idiana kiet m̀mê edikam itie nte ẹn̄wan̄a petrol ẹdọn̄ ke ikan̄?’ N̄kpọ ntre ama etịbe, ndusụk ini mfọnn̄kan n̄kpọ esidi ndimen iso mfep m̀mê ndifen nnyụn̄ mfre mban̄a.​—N̄ke 19:11; Mark 11:25.

Apostle Paul ekewet ete yak “[iyọ] kiet eken ke ima.” Ẹyak ika iso inam oro. (Eph. 4:2) N̄wed kiet emi etịn̄de n̄kpọ aban̄a Bible ọdọhọ ke usụn̄ en̄wen emi ẹkemede ndikabade ikọ oro “[iyọ] kiet eken ke ima” edi “da mmọ nte mmọ ẹtiede.” Oro ọwọrọ yak ida ke nditọ-ete nnyịn ẹdi mme anamidiọk, kpa nte nnyịn n̄ko idide mme anamidiọk. Idem n̄kpọ, n̄kọ nnyịn n̄ko ke itịme ndimen “obufa owo” nsịne. (Eph. 4:23, 24) Imọdiọn̄ọ ke idụhe owo nnyịn ndomokiet emi edikemede ndinam oro ndudue idụhe. (Rome 3:23) Ima inyịme ke se ẹtịn̄de oro edi akpanikọ, ayafiak emem nnyịn utom ndiyọ kiet eken nnyụn̄ mfen kiet eken, ndien oyoto ke oro nnyịn ‘imụm edidianakiet eke spirit ikama.’

Ima ifen owo ke se enye akanamde nnyịn, ekpededi ifen ke esịt kpọt idịghe nte ke ima ikụbọde inua idọhọ enye “Mmefen nnọ fi,” iyaka iso idu ke “mbọbọ emem.” Ikọ Greek emi ẹkabarede nte “mbọbọ” ke Ephesus 4:3 ke ẹkabade nte “esịp” ke Colossae 2:19. Esịp ẹdi n̄kpọ emi ẹsọn̄de idem, mmọ ẹsinyụn̄ ẹmụm ọkpọ kiet ẹyịri ye ọkpọ en̄wen. Kpa ke ukem usụn̄ oro, ndidu ke emem ye nditọ-ete nnyịn ye ima emi imade mmọ ẹsin̄wam nnyịn ika iso idiana kiet ye mmọ ekpededi nnyịn imaha kpukpru se mmọ ẹtịn̄de m̀mê se mmọ ẹnamde.

Ke ntak oro, eyenete ama edue fi, anam se ibiakde fi, m̀mê se iyatde fi, domo ndinyene esịt mbọm, utu ke ndikere adan̄a nte enye ọdiọkde eketre. (Col. 3:12) Sia mîdụhe eke ọfọnde ama ke ererimbot emi, usen kiet afo n̄ko oyonyụn̄ edue owo. Ama eti oro, oro ayan̄wam fi anam udeme fo “ndimụm edidianakiet eke spirit n̄kama.”