Urua N̄kpọ ke Ọdọk ke Ofụri Ererimbot​—Nso ke Bible Etịn̄ Aban̄a Emi?

Etieibuot ke World Bank Group ọkọdọhọ ke June 2022 ke ‘n̄kpọ ọmọn̄ afiak ọsọn̄ etieti ke ofụri ererimbot. Edi isan̄ enye emi, okụk ayanana n̄ko etieti.’

Esop emi ẹkotde International Monetary Fund ẹdọhọ ke ‘urua petrol, kerosene, gas, ye mme n̄kpọ ntre ọdọk etieti idahaemi, ndien ke mbon oro ẹbọde ufen nsọn̄ọ-n̄kpọ emi ẹkan ẹdi mme ubuene emi ẹdude ke mme idụt emi mînen̄ekede inyene okụk.’

Bible anam idiọn̄ọ ntak emi n̄kpọ ọsọn̄de ntem; enye etịn̄ se ikpanamde idahaemi ye se iditrede nsọn̄ọ-n̄kpọ ke ofụri ererimbot ke nsinsi nsinsi.

N̄kpọ ọyọsọn̄ ke “mme akpatre usen”

• Bible okot eyo nnyịn emi “mme akpatre usen.”​—2 Timothy 3:1.

• Jesus ọkọdọhọ ke n̄kpọ eyetịbe emi anamde mme owo ndịk ke eyo nnyịn emi. (Luke 21:11) Nte n̄kpọ ọsọn̄de idahaemi anam idem enyek mme owo, anam mmọ ẹkere m̀mê n̄kpọ editie didie n̄kpọn̄, m̀mê iyosụk ikeme ndise mban̄a ubon mmimọ aba.

• N̄wed Ediyarade 6:6 ama etịn̄ ke udia ọyọsọn̄ urua etieti ke eyo nnyịn emi. Itie N̄wed Abasi oro ọdọhọ ete: “Ndien n̄kop uyo emi . . . ọdọhọde ete: ‘Udomo wheat kiet ke denarius kiet, ye udomo barley ita ke denarius kiet.’”

Edieke oyomde ndidiọn̄ọ n̄kpọ mban̄a “mme akpatre usen” emi ye mme prọfesi emi ẹdude ke N̄wed Ediyarade, se vidio emi, The World Has Changed Since 1914, nyụn̄ kot ibuotikọ emi “Mmanie Ẹdi Mme Awat Enan̄-Mbakara Inan̄?”

Se iditrede nsọn̄ọ-n̄kpọ ke ofụri ererimbot ke nsinsi nsinsi

• Ikọ Abasi ke Isaiah 65:21, 22 ọdọhọ ke mme owo “ẹyebọp ufọk ẹnyụn̄ ẹdụn̄ ke esịt; mmọ ẹyenyụn̄ ẹtọ in̄wan̄ vine ẹnyụn̄ ẹdia mbun̄wụm mmọ. Mmọ idibọpke ndien owo en̄wen odụn̄; mmọ iditọhọ ndien owo en̄wen adia.”

• Psalm 72:16 ọdọhọ ke ‘uwak n̄kpasịp, oro edi ediwak udia, oyodu ke isọn̄; Ọyọyọhọ ọduọhọ ke mme enyọn̄ obot.’

• Jehovah’a Abasi ọdọhọ ke Psalm 12:5 ete: ‘Ke ntak emi ẹbụmede mbon ukụt, ke ntak eseme mme ubuene, ami nyadaha nda nnyụn̄ n̄kpeme mmọ.

Abasi ayanam n̄kpọ ọfọn ye kpukpru owo ukem ukem ke ofụri ererimbot. Edieke oyomde ndifiọk nte Abasi edinamde emi, mbọk kot ibuotikọ emi, “Ndi Enyene Ini Emi N̄kpọ Edifọnde ye Kpukpru Owo Ukem Ukem?”

Bible ekeme ndin̄wam nnyịn ifiọk nte ikpodude uwem ke ini nsọn̄ọ-n̄kpọ emi. Didie? Bible eteme nnyịn se ikpanamde mbak nnyịn idibiat okụk ntịme ntịme. (Mme N̄ke 23:4, 5; Ecclesiastes 7:12) Edieke oyomde ndidiọn̄ọ nte akpabiatde okụk, kot ibuotikọ emi, “Diọn̄ọ Nte Abiatde Okụk,” ye “Se Akpanamde ke Ini Okụk Asatde Fi ke Ekpat.”