Ndi Akpana Mme Christian Ẹtiene Ẹn̄wana Ekọn̄?​—Nso ke Bible Etịn̄ Aban̄a Emi?

Nte ikụtde ke ekọn̄ Russia ye Ukraine, ediwak ikpọ owo ufọkabasi ke ẹdọn̄ nsọk ẹnọ mme Christian ẹtiene ẹn̄wana ekọn̄. Kop mi se ikpọ owo ufọkabasi ẹtịn̄de ẹnyụn̄ ẹnamde ndiwụt n̄kan̄ emi mmọ ẹdade ẹnọ ke ekọn̄ emi:

• N̄wedmbụk n̄kpọntịbe emi ẹkotde Jerusalem Post, eke March 16, 2022 ọdọhọ ke akwaowo Ufọkabasi Orthodox ke Ukraine, emi ẹdiọn̄ọde nte Metropolitan Epiphanius I ke Kyiv ọkọdọhọ ete: “Imenen̄ede ikọm kpukpru mbufo mbonekọn̄ nnyịn emi ẹsiode esịt ẹn̄wana ye mme asua ẹnọ idụt nnyịn Ukraine . . . Nnyịn do ye mbufo, ke inyụn̄ ibọn̄ akam ke ofụri esịt ite mbufo ẹkan ke ekọn̄ emi iyonyụn̄ inam se ikekeme man in̄wam mbufo ke ekọn̄ emi.”

• N̄wedmbụk n̄kpọntịbe emi ẹkotde Reuters, eke April 3, 2022 ọdọhọ ete: “Akwaowo Russian Orthodox Church ama enịm san̄asan̄a edinam ke ufọkabasi ke Sunday ọnọ mbonekọn̄ Russia onyụn̄ ọdọhọ mmọ ẹsio esịt ẹn̄wana ẹnọ idụt mmọ, ke mmọ iditreke-tre ndikan Ukraine.”

Ndi akpana mme Christian ẹtiene ẹsịn idem ke ekọn̄? Nso ke Bible etịn̄ aban̄a emi?

Se Bible etịn̄de

Se Bible etịn̄de owụt ke ikpanaha ata mme mbet Jesus Christ ẹtiene ẹsịn idem ke ekọn̄.

• Matthew 26:52 ọdọhọ ete: “Sịn akan̄kan̄ fo ke itie esie, koro kpukpru owo eke ẹmende akan̄kan̄ ẹdikpa ke akan̄kan̄.”

  Ndi owo emi an̄wamde ẹn̄wana ekọn̄ m̀mê emi etienede an̄wana ekọn̄ anam item Jesus emi?

• John 13:34, 35 ọdọhọ ete: “Ami mmọnọ mbufo obufa ewụhọ, nte mbufo ẹma kiet eken; kpa nte n̄kamade mbufo, nte mbufo n̄ko ẹma kiet eken. Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.”

  Ndi owo emi an̄wamde ẹn̄wana ekọn̄ etiene enyene utọ ima emi Jesus ọkọdọhọde ke ẹdida oro idiọn̄ọ mme mbet imọ?

Edieke oyomde ndifiọk n̄kpọ en̄wen en̄wen, kot ibuotikọ emi “Ndi Odot Mme Christian Ẹn̄wana Ekọn̄?”

Ndi akpana mme Christian mfịn ẹtiene ẹsịn idem ke ekọn̄?

Ndi ọfọn nte ata mme Christian mfịn mîsịnke idem ke ekọn̄? Ih. Bible ama etetịn̄ ke eyo nnyịn emi, emi ẹkotde “mme akpatre usen,” ke mme owo emi ẹtode nsio nsio idụt ‘idikpepke aba ekọn̄’; se Jesus okonyụn̄ ekpepde edi emi.​—Isaiah 2:2, 4.

• Edieke oyomde ndifiọk n̄kpọ en̄wen en̄wen, kot Enyọn̄-Ukpeme emi “Didie ke Abasi Ese Ekọn̄?”

Ibịghike Jehovah,a “Abasi emem,” ayada ukara esie eke heaven anyan̄a mme owo “osio ke ufịk ye afai.”​—Philippi 4:9; Psalm 72:14.

• Man okụt nte enye edinamde emi, se vidio oro Nso Idi Obio Ubọn̄ Abasi?