Ntak Emi Ẹkotde Jesus Eyen Abasi?
Se Bible ọdọhọde
Bible awak ndikot Jesus “Eyen Abasi.” (John 1:49) Ndikot Jesus “Eyen Abasi” owụt ke Abasi edi Andibot, m̀mê Anditọn̄ọ uwem kpukpru n̄kpọ, esịnede Jesus. (Psalm 36:9; Ediyarade 4:11) Bible idọhọke ke akananam Abasi obon eyen ke ukem usụn̄ emi mme ete ẹsibonde nditọ.
Bible ọdọhọ n̄ko ke mme angel ẹdi “nditọ ata Abasi.” (Job 1:6) Bible afiak ọdọhọ ke Adam emi edide akpa owo emi Abasi okobotde ekedi “eyen Abasi.” (Luke 3:38) Edi Bible ọdọhọ ke Jesus edi akakan ke otu kpukpru nditọ Abasi sia enye ke Abasi ekebem iso obot, enye onyụn̄ edi n̄kukụre owo emi Abasi okobotde ke idemesie.
Ndi Jesus ama ododu ke heaven mbemiso edimanade ke isọn̄?
Ih. Jesus ekenyene ukem idem mme angel ini enye okodude ke heaven mbemiso edimanade nte owo ke isọn̄. Jesus ọkọdọhọ ete: “N̄koto heaven nsụhọde ndi.”—John 6:38; 8:23.
Abasi ekebem iso obot Jesus mbemiso obotde n̄kpọ efen ekededi. Kop se Bible etịn̄de mi aban̄a Jesus:
“Enye edi . . . akpan ke otu kpukpru edibotn̄kpọ.”—Colossae 1:15.
Enye edi “ntọn̄ọ edibotn̄kpọ Abasi.”—Ediyarade 3:14.
Bible ama etetịn̄ ke owo oyodu “emi ntọn̄ọ esie edide toto ke eset, ko ke ata anyan ini” ndien se ẹketịn̄de emi ama osu Jesus ke idem—Micah 5:2; Matthew 2:4-6.
Nso ke Jesus ekesinam mbemiso edide isọn̄?
Jesus ama okpon itie etieti ke heaven. Ke akam oro Jesus ọkọbọn̄de, enye ama etịn̄ ke ima ikpon itie ke heaven. Enye ọkọdọhọ ete: “Ete, nọ mi ubọn̄ oro n̄kenyenede ye afo mbemiso ererimbot ekedide edidu.”—John 17:5.
Jesus akan̄wam Ete esie obot kpukpru n̄kpọ eken. Jesus akanam utom ye Abasi “nte ata anamutom.” (Mme N̄ke 8:30) Bible ọdọhọ ntem aban̄a Jesus, ete: “Ẹkebot kpukpru n̄kpọ eken ke heaven ye ke isọn̄ oto ke enye.”—Colossae 1:16.
Abasi akada Jesus obot kpukpru n̄kpọ eken. Mme n̄kpọ emi Jesus okobotde mi esịne mme angel, ye ofụri ekondo. (Ediyarade 5:11) Ke ata ata usụn̄, Abasi ye Jesus ndikadiana kiet mbot mme n̄kpọ onyụn̄ etie nte owo emi esidrọde plan ufọk emi adianade ye ọbọpufọk anam utom. Owo emi esidrọde plan ufọk esidrọ nte ufọk editiede, edi ọbọpufọk edida se enye ọkọdrọde oro ọbọp ufọk oro osio.
Jesus ekedi Ikọ. Ke Bible, ẹsiwak ndikot Jesus “Ikọ” ẹma ẹyom nditịn̄ n̄kpọ mban̄a enye ini enye okodude ke heaven mbemiso edide isọn̄. (John 1:1) Emi ọwọrọ ke Abasi akada eyen esie etịn̄ kpukpru se enye okoyomde mme angel eken ẹkop ọnọ mmọ.
Jesus n̄ko ama esitịn̄ ikọ ke ibuot Abasi ọnọ mme owo mi ke isọn̄. Etie nte Jesus ke Abasi ekesida etịn̄ ikọ ọnọ Adam ye Eve ke in̄wan̄ Eden. (Genesis 2:16, 17) Ekeme ndidi Jesus n̄ko akada nditọ Israel eset usụn̄ ini mmọ ẹkedude ke wilderness, onyụn̄ etie nte uyo esie ke nditọ Israel ẹkesikop.—Exodus 23:20-23.a
a Idịghe Ikọ kpọt edi n̄kukụre angel emi Abasi ekesidade etịn̄ ikọ ọnọ ikọt esie. Ke uwụtn̄kpọ, Enye ama ada mme angel en̄wen, idịghe Akpan esie kpọt, ọnọ nditọ Israel Ibet.—Utom 7:53; Galatia 3:19; Mme Hebrew 2:2, 3.